যশস্বী জয়ছোৱাল

যশস্বী ভূপেন্দ্ৰ কুমাৰ জয়ছোৱাল (Yashasvi Jaiswal, জন্ম ২৮ ডিচেম্বৰ ২০০১) ভাৰতীয় আন্তঃৰাষ্ট্ৰীয় ক্ৰিকেটাৰ যি ভাৰতীয় ক্ৰিকেট দলৰ হৈ টেষ্ট আৰু টি-২০ত খেলে। ২০২৩ চনৰ জুলাই মাহত ৱেষ্ট ইণ্ডিজৰ বিৰুদ্ধে প্ৰথমখন টেষ্টত তেওঁ আন্তঃৰাষ্ট্ৰীয় পৰ্যায়ত অভিষেক ঘটায় আৰু টেষ্ট ক্ৰিকেটৰ প্ৰথম ইনিংছত শতক অৰ্জন কৰে।^১ ঘৰুৱা ক্ৰিকেটত তেওঁ মুম্বাই আৰু ইণ্ডিয়ান প্ৰিমিয়াৰ লীগ (আই পি এল) ফ্ৰেঞ্চাইজি ৰাজস্থান ৰয়েলছৰ হৈ খেলে। ২০১৯ চনত তেওঁ তালিকা এ ক্ৰিকেটত দ্বৈত শতক অৰ্জন কৰা আটাইতকৈ কম বয়সীয়া ক্ৰিকেটাৰ হিচাপে পৰিগণিত হয়।^২

২০২৩ চনত যশস্বী জয়ছোৱাল ২০২২ চনৰ এছিয়ান গেমছত সোণৰ পদক লাভ কৰা ভাৰতীয় দলৰ সদস্য আছিল৷ তেওঁ ২০২০ চনৰ ১৯ অনুৰ্ধ ক্ৰিকেট বিশ্বকাপৰ চূড়ান্ত প্ৰতিযোগী দলৰ সদস্য আছিল, য'ত তেওঁ প্ৰতিযোগিতাখনৰ শ্ৰেষ্ঠ খেলুৱৈ^৩ আৰু সৰ্বাধিক ৰাণ সংগ্ৰহকাৰী আছিল ৷^৪ ২০২৩ চনৰ আইচিচি বিশ্ব টেষ্ট চেম্পিয়নশ্বিপৰ ফাইনেল খেলি ৰানাৰ্ছ আপ হিচাপে অন্ত পেলোৱা ভাৰতীয় দলৰ তেওঁ ষ্টেণ্ডবাই সদস্য আছিল।^৫ইয়াৰ উপৰি তেওঁ ২০২৪ চনৰ টি-২০ বিশ্বকাপ জয় কৰা ভাৰতীয় দলৰ প্ৰতিনিধি আছিল৷ অৱশ্যে প্ৰতিযোগিতাখনৰ কোনো এখন মেচতে তেওঁ অংশগ্ৰহণ কৰা নাছিল।

২০২৪ চনত ইংলেণ্ডৰ বিৰুদ্ধে ৫খন মেচৰ টেষ্ট শৃংখলাত একেৰাহে দুখন টেষ্ট মেচত দ্বৈত শতক অৰ্জন কৰাৰ সময়ত তেওঁ বিশেষ চৰ্চা লাভ কৰিছিল৷ বিনোদ কাম্বলী আৰু বিৰাট কোহলীৰ পিছত এই কৃতিত্ব অৰ্জন কৰা তেওঁ তৃতীয় ভাৰতীয় বেটছমেন। টেষ্ট ইতিহাসত ছাৰ ডন ব্ৰেডমেন আৰু বিনোদ কাম্বলিৰ পিছত দুটা ডাবল চেঞ্চুৰী কৰা তৃতীয়জন কনিষ্ঠ ক্ৰিকেটাৰ হৈছে যশস্বী।^৬ তেওঁ সুনীল গাভাস্কাৰৰ পিছত টেষ্ট শৃংখলাত ৭০০ ৰান কৰা মাত্ৰ দ্বিতীয়জন ভাৰতীয় হিচাপে পৰিগণিত হয়।^৭