ববী এলয়চিয়াছ

ববী এলয়চিয়াছ (জন্ম: ২২ জুন ১৯৭৪) কেৰালাৰ এগৰাকী ভাৰতীয় এথলীট, যিয়ে ওখ জাঁপ (high jump) প্ৰতিযোগিতাত অংশগ্ৰহণ কৰে। বৰ্তমান তেওঁ কেৰালাৰ তিৰুৱনন্তপুৰমত বাস কৰে। ১৯৯৫ চনৰ পৰা ২০১২ চনলৈকে তেওঁ ১.৯১ মিটাৰ উচ্চ জম্পৰ সৈতে ভাৰতীয় আৰু দক্ষিণ এছিয়াৰ অভিলেখ গঢ়িছিল।^১ ববীয়ে ২০০৪ চনৰ এথেন্স অলিম্পিকত অংশগ্ৰহণ কৰিছিল,^২ ২০০২ চনৰ বুছান এছিয়ান গেমছত ৰূপৰ পদক লাভ কৰিছিল আৰু জাকাৰ্টা এছিয়ান চেম্পিয়নশ্বিপত স্বৰ্ণ পদক জয় কৰিছিল।^৩

ব্যক্তিগত জীৱন

ববীৰ জন্ম হৈছিল ভাৰতৰ কেৰালাৰ কান্নুৰৰ চেম্পেৰীত।^৪ তেওঁ কেইবাবাৰো বিশ্ব ভ্ৰমণ কৰিছে আৰু ২০০৯ চনলৈকে যুক্তৰাজ্যৰ শ্ৰুচবেৰীত বাস কৰিছিল। ২০১৩ চনলৈকে তেওঁ তিৰুৱনন্তপুৰমত কেৰালা ৰাজ্যিক ক্ৰীড়া পৰিষদৰ সহকাৰী সম্পাদক (কাৰিকৰী) হিচাপেও কাম কৰিছিল। তেওঁ 'মৰুনাদান টিভি' নামৰ এটা অনলাইন চেনেলৰ প্ৰতিষ্ঠাপক তথা মুখ্য সংবাদ পাঠক ছাজন স্কাৰিয়াৰ সৈতে বিবাহপাশত আবদ্ধ হয়। তেওঁলোকৰ তিনি সন্তান— ষ্টিফেন হোম স্কাৰিয়া, গংগোত্ৰী স্কাৰিয়া আৰু ঋত্বিক স্কাৰিয়া। তেওঁ কালিকট বিশ্ববিদ্যালয়ৰ প্ৰাক্তন ছাত্ৰী।^৫

কৰ্মজীৱন

ববীয়ে ২০০৪ চনত চেন্নাইত অনুষ্ঠিত অলিম্পিক যোগ্যতা অৰ্জনকাৰী প্ৰতিযোগিতাত মহিলাৰ উচ্চ জম্পত ১.৯১ মিটাৰৰ ৰাষ্ট্ৰীয় অভিলেখ গঢ়িছিল।^৬ ২০১১ চনত মহাৰাজ ষ্টেডিয়ামত দিয়া এটা সাক্ষাৎকাৰত তেওঁ কৈছিল, "মই অলিম্পিকৰ বাবে যোগ্যতা অৰ্জন কৰিবলৈ খুবেই বিচাৰিছিলোঁ আৰু চেন্নাইৰ সেই জম্পটোত মই মোৰ সকলো শক্তি প্ৰয়োগ কৰি ১.৯১ মিটাৰ অতিক্ৰম কৰিছিলোঁ।"^৭ ২০১২ চনত লণ্ডন অলিম্পিকৰ বাবে চাহানা কুমাৰীয়ে ১.৯২ মিটাৰ অতিক্ৰম নকৰা পৰ্যন্ত তেওঁৰ এই ৰাষ্ট্ৰীয় অভিলেখ অপৰাজিত হৈ আছিল।^৮ আন্তৰ্জাতিক বিজয়ৰ উপৰিও ববীয়ে ২০০৩ চনত চেন্নাইত অনুষ্ঠিত নেশ্যনেল ডমেষ্টিক চাৰ্কিট মিটৰ মহিলা উচ্চ জম্প প্ৰতিযোগিতাতো জয়ী হৈছিল।^৯

ববীয়ে নিজৰ ৰাজ্যৰ ক্ৰীড়া উন্নয়নৰ বাবে কেৰালা চৰকাৰৰ সৈতে কাম কৰিছে। কেৰালা ৰাজ্যিক ক্ৰীড়া পৰিষদৰ সহকাৰী সম্পাদক (কাৰিকৰী) হিচাপে কৰ্মৰত অৱস্থাত ববীয়ে ২০১১ চনত তিৰুৱনন্তপুৰমত 'স্পৰ্টছ কাউন্সিল হাই জম্প কাৰ্নিভাল' আয়োজন কৰিছিল।