পংকজ ত্ৰিপাঠী

পংকজ ত্ৰিপাঠী (Pankaj Tripathi) হৈছে এগৰাকী ভাৰতীয় চলচ্চিত্ৰ অভিনেতা। হিন্দী ছবিত কৰা অভিনয়ৰ বাবে তেওঁক জনা যায়। ২০০৪ চনত মুক্তিপ্ৰাপ্ত ৰাণ নামৰ হিন্দী ছবিখনত এটা সৰু চৰিত্ৰ ৰূপায়ণেৰে পংকজ ত্ৰিপাঠীয়ে চলচ্চিত্ৰজগতত প্ৰৱেশ কৰে। ২০১২ চনত মুক্তিপ্ৰাপ্ত গেংছ অৱ্ ৱাছেপুৰ নামৰ চলচ্চিত্ৰ ছিৰিজখনৰ যোগেদি তেওঁ চলচ্চিত্ৰপ্ৰেমীৰ দৃষ্টি আকৰ্ষণ কৰিবলৈ সক্ষম হয়।

জন্ম আৰু শিক্ষা

১৯৭৬ চনত বিহাৰৰ গোপালগঞ্জ জিলাৰ এক হিন্দু ব্ৰাহ্মণ পৰিয়ালত পংকজ ত্ৰিপাঠীৰ জন্ম হয়। তেওঁৰ পিতৃৰ নাম বাৰাণশ ত্ৰিপাঠী আৰু মাতৃৰ নাম হেমৱন্তী দেৱী। ত্ৰিপাঠীৰ পিতৃ এগৰাকী কৃষক আৰু পুৰোহিত আছিল।^১ শৈশৱতে ত্ৰিপাঠীয়ে নিজৰ গাঁ‌ৱত হোৱা নাটকসমূহত মহিলাৰ চৰিত্ৰ ৰূপায়ণ কৰিছিল আৰু গাঁ‌ওবাসীৰ প্ৰশংসা বুটলিবলৈ সক্ষম হৈছিল। এই কথাটোৱ তেওঁক পৰৱৰ্তী সময়ত অভিনয়ত মনোনিৱেশ কৰিবলৈ অনুপ্ৰাণিত কৰিছিল।^২ ইয়াৰপাছত তেওঁ পাটনালৈ যায় আৰু ইনষ্টিটিউট অৱ্ হোটেল মেনেজমেণ্ট,হাজিপুৰত পঢ়িবলৈ লয়। কলেজীয়া দিনত ত্ৰিপাঠী সক্ৰিয়ভাৱে ৰাজনীতি আৰু নাটকৰ লগত জড়িত আছিল।^৩ অভিনয়ত সফলতা লাভ কৰিব নোৱাৰিব বুলি ভাৱি ত্ৰিপাঠীয়ে এখন পঞ্চতাৰকাযুক্ত হোটেলত কাম কৰিবলৈ লয়। সাত বছৰ এনেকৈ কাম কৰাৰ পাছত তেওঁ দিল্লীলৈ যায় আৰু ৰাষ্ট্ৰীয় নাট্য বিদ্যালয়ৰ পৰা ২০০৪ চনত স্নাতক ডিগ্ৰী গ্ৰহণ কৰে।^৪৫

অভিনয় জীৱন

ৰাষ্ট্ৰীয় নাট্য বিদ্যালয়ৰ পৰা স্নাতক ডিগ্ৰী গ্ৰহণ কৰাৰ পাছতে তেওঁ নিজকে সাজু কৰি মুম্বাইলৈ আহে। সেই সময়ত তেওঁ‌ কিছুমান সৰু সৰু চৰিত্ৰ কৰিবলৈ পায়। তেওঁ অভিনয় কৰা প্ৰথমখন চলচ্চিত্ৰ ৰাণত তেওঁৰ চৰিত্ৰটোৰ মাত্ৰ দুটা দৃশ্য আছিল আৰু চৰিত্ৰটোৰ কোনো নাম নাছিল।^৬ ত্ৰিপাঠীয়ে এক সাক্ষাৎকাৰত উল্লেখ কৰামতে তেওঁ‌ অভিনয়ৰ বাবে কৰা সংগ্ৰামখনত তেওঁ কেতিয়াও সহানুভূতিৰ দৃষ্টিৰে নাচাইছিল। তেওঁৰ দৃঢ়বিশ্বাস আছিল যে সফলতা আহিবই।^৭২০১২ চনত মুক্তিপ্ৰাপ্ত গেংছ অৱ্ ৱাছেপুৰ নামৰ চলচ্চিত্ৰ ছিৰিজ খনৰ জৰিয়তে তেওঁ চিত্ৰপ্ৰেমী আৰু চিত্ৰসমালোচকৰ মনোযোগ আকৰ্ষণ কৰিবলৈ সক্ষম হয়। এই চিনেমাখনত অভিনয়ৰ বাবে তেওঁ আঠ ঘণ্টা পৰ্যন্ত অ'ডিচন দিব লগাত পৰিছিল।^৮৯

অভিনয় জীৱনৰ আৰম্ভণিতে অধিকাংশ ঋণাত্মক বা ভিলেইন চৰিত্ৰ ৰূপায়ণ কৰা ত্ৰিপাঠী বাস্তৱ জীৱনত এগৰাকী ৰসিক মানুহ। তেওঁ এক সাক্ষাৎকাৰত উল্লেখ কৰামতে জনসাধাৰণে তেওঁ কৰা ঋণাত্মক চৰিত্ৰবোৰক প্ৰশংসা কৰিলে তেওঁ‌ অলপ অস্বস্তিবোধ কৰে। ত্ৰিপাঠীয়ে উল্লেখ কৰা মতে পৰ্দাত ৰূপায়ণ কৰা প্ৰতিটো চৰিত্ৰৰ জৰিয়তেহে আচলতে এগৰাকী অভিনেতাৰ অভিনয় কলাৰ বিকাশ সাধন হয়। তেওঁ কয়, "মই কৰা প্ৰতিটো ঋণাত্মক চৰিত্ৰতে মই চৰিত্ৰটোৰ মানৱীয় দিশটো প্ৰকাশ কৰিবলৈ যত্ন কৰো। কিয়নো বাস্তৱত কোনো ব্যক্তিয়েই ভিলেইন নহয় বা কোনো ব্যক্তিয়েই হিৰ'ও নহয়। প্ৰত্যেক ব্যক্তিয়েই ভাল-বেয়াৰ এক ধূসৰিত অৱস্থাত জীয়াই থাকে। " মাচান চলচ্চিত্ৰখনৰ তেওঁ অভিনয় কৰা সদ্ধ্যা জী নামৰ চৰিত্ৰটোৰ লগত তেওঁৰ ব্যক্তিত্বৰ মিল আছে বুলি ত্ৰিপাঠীয়ে উল্লেখ কৰে।^১০

২০১৭ চনত মুক্তিপ্ৰাপ্ত গুৰগাঁ‌ও নামৰ চলচ্চিত্ৰখনত তেওঁ প্ৰথমবাৰলৈ প্ৰধান চৰিত্ৰত অভিনয় কৰে।^১১২০১৭ চনত মুক্তিপ্ৰাপ্ত তেওঁ আন এখন ছবি নিউটনে অকাডেমী বঁ‌টাৰ শ্ৰেষ্ঠ বিদেশী ভাষাৰ শিতানত ভাৰতৰ হৈ আনুষ্ঠানিক প্ৰৱেশ কৰিবলৈ সক্ষম হৈছিল।^১২

২০১৮ চনত মিৰ্জাপুৰ নামৰ এখন ৱেবছিৰিজটো তেওঁ অভিনয় কৰে।^১৩

চলচ্চিত্ৰপঞ্জী

চলচ্চিত্ৰ

টেলিভিছন

ৱেব-ছিৰিজ

বঁ‌টা/সন্মান

• নিউটন (হিন্দী) চলচ্চিত্ৰৰ বাবে ৰাষ্ট্ৰীয় চলচ্চিত্ৰ বঁ‌টাৰ বিশেষ উল্লেখ^১৯২০
• নিউটন (হিন্দী) চলচ্চিত্ৰৰ বাবে News18 REEL Movie Awards ৰ শ্ৰেষ্ঠ সহঃ অভিনেতাৰ ৰ্বঁ‌টা^২১
• মিৰ্জাপুৰ ৱেবছিৰিজৰ বাবে iReel Awards ৰ শ্ৰেষ্ঠ অভিনেতাৰ সন্মান^২২
• স্ত্ৰী চলচ্চিত্ৰৰ বাবে Screen Award (২০১৮)ৰ শ্ৰেষ্ঠ অভিনেতাৰ সন্মান
• স্ত্ৰী চলচ্চিত্ৰৰ বাবে Zee Cine Award (2019) ৰ শ্ৰেষ্ঠ সংলাপৰ সন্মান