থম্পু (চলচ্চিত্ৰ)

থম্পু (Thampu) হৈছে ১৯৭৮ চনত মুক্তিপ্ৰাপ্ত জি. অৰবিন্দনৰ দ্বাৰা লিখিত আৰু পৰিচালিত এখন মালায়ালম ভাষাৰ চলচ্চিত্ৰ। এই চলচ্চিত্ৰখনত ভাৰত গোপী, নেডুমুডি ভেণু, ভি. কে. শ্ৰীৰামন, জলজা আৰু গ্ৰেট চিত্ৰা চাৰ্কাছৰ শিল্পীসকলে অভিনয় কৰিছে। ছবিখনত কেৰালাত ভ্ৰাম্যমাণ এটা পথ-চাৰ্কাছৰ জীৱন আৰু বাস্তৱতাক চিত্ৰিত কৰা হৈছে। চলচ্চিত্ৰখন ক'লা-বগা ৰূপত নিৰ্মাণ কৰা হৈছে আৰু ইয়াৰ উপস্থাপনশৈলী প্ৰত্যক্ষ তথ্যচিত্ৰ (Direct Documentary) ধৰণৰ।^১২৩

২০২১ চনত ফিল্ম হেৰিটেজ ফাউণ্ডেশ্যনে চলচ্চিত্ৰখনৰ 4K-ফৰ্মেটত পুনৰুদ্ধাৰ (Restoration) কৰাৰ সিদ্ধান্ত গ্ৰহণ কৰে। পুনৰুদ্ধাৰ কৰা এই সংস্কৰণটো ২০২২ চনৰ কান চলচ্চিত্ৰ মহোৎসৱৰ Cannes Classics শাখাত বিশ্ব প্ৰিমিয়াৰৰ বাবে নিৰ্বাচিত হৈছিল।^৪

বঁটাসমূহ

• শ্ৰেষ্ঠ পৰিচালনাৰ ৰাষ্ট্ৰীয় চলচ্চিত্ৰ বঁটা – জি. অৰবিন্দ
• শ্ৰেষ্ঠ দৃশ্যগ্ৰহণকাৰীৰ বাবে ৰাষ্ট্ৰীয় চলচ্চিত্ৰ বঁটা – শ্বাজী এন. কৰুণ
• মালয়ালম ভাষাৰ শ্ৰেষ্ঠ পূৰ্ণদৈৰ্ঘ্যৰ চলচ্চিত্ৰৰ বাবে ৰাষ্ট্ৰীয় চলচ্চিত্ৰ বঁটা
• শ্ৰেষ্ঠ পৰিচালনাৰ কেৰালা ৰাজ্যিক চলচ্চিত্ৰ বঁটা
• দ্বিতীয় শ্ৰেষ্ঠ চলচ্চিত্ৰৰ বাবে কেৰালা ৰাজ্যিক চলচ্চিত্ৰ বঁটা
• কেৰালা চলচ্চিত্ৰ সমালোচক সন্থাৰ শ্ৰেষ্ঠ চলচ্চিত্ৰ বঁটা^৫
• কেৰালা চলচ্চিত্ৰ সমালোচক সন্থাৰ শ্ৰেষ্ঠ পৰিচালক বঁটা – জি. অৰবিন্দ^৫
• কেৰালা চলচ্চিত্ৰ সমালোচক সন্থাৰ শ্ৰেষ্ঠ দৃশ্যগ্ৰহণকাৰী বঁটা – শ্বাজী এন. কৰুণ^৫
• কেৰালা চলচ্চিত্ৰ সমালোচক সন্থাৰ শ্ৰেষ্ঠ সম্পাদকৰ বঁটা – ৰামেছান^৫

থম্পুৰ পুনৰুদ্ধাৰ

চলচ্চিত্ৰখনৰ পুনৰুদ্ধাৰৰ কাম ফিল্ম হেৰিটেজ ফাউণ্ডেশ্যন আৰু ল’ইম্মাজিনে ৰিট্ৰোভাটা (L’Immagine Ritrovata)-ৰ সঞ্চালক দাভিদে প’জ্জিৰ নেতৃত্বত সম্পন্ন কৰা হৈছিল। মূল কেমেৰা নেগেটিভ উপলভ্য নাছিল যদিও দলটোৱে NFAI-ত সংৰক্ষিত ৩৫ মি.মি. প্ৰিণ্টৰ পৰা প্ৰস্তুত কৰা এটা ডুপ নেগেটিভ (dupe negative) ব্যৱহাৰ কৰিছিল। তুলনাৰ উদ্দেশ্যে আন এটা ৩৫ মি.মি. প্ৰিণ্টো ব্যৱহাৰ কৰা হৈছিল। ফিল্ম হেৰিটেজ ফাউণ্ডেশ্যনৰ সংৰক্ষণ বিশেষজ্ঞসকলে প্ৰস্তুত কৰা অৱস্থা-মূল্যায়ন প্ৰতিবেদন অনুসৰি, ফিল্মখনত বহু ঠাইত ছিঙি যোৱা অংশ (tears) আৰু ভঙা স্প্ৰকেট (broken sprockets) আছিল, যিবোৰ সংৰক্ষণ বিশেষজ্ঞসকলে মেৰামতি কৰিছিল। আন এক জটিলতা আছিল যে ডুপ নেগেটিভটো মূল নেগেটিভৰ পৰা নহয়, বৰঞ্চ অইন এটা প্ৰিণ্টৰ পৰা প্ৰস্তুত কৰা হৈছিল। চেন্নাইস্থিত প্ৰসাদ কৰ্প’ৰেচন প্ৰাইভেট লিমিটেডৰ ছাইপ্ৰসাদ আক্কেনেনিৰ তত্ত্বাৱধানত প্ৰিণ্ট আৰু ডুপ নেগেটিভ প্ৰসাদ ষ্টুডিঅ’ছ, চেন্নাইত স্কেন কৰা হৈছিল। ছবিখন আৰু শব্দৰ স্কেনিং, ডিজিটেলভাৱে আঁচ (scratches) আৰু ছিঙি যোৱা অংশ পৰিষ্কাৰ কৰা, লগতে ছবিৰ ভাৰসাম্যকৰণ (image stabilisation) আদি সূক্ষ্ম আৰু সময়সাপেক্ষ কামসমূহো প্ৰসাদ ষ্টুডিঅ’ছতেই সম্পন্ন কৰা হৈছিল।^৬

বাহ্যিক সংযোগ

• Revisiting Thampu - The Economic Times