তামিলিছাই সৌন্দৰাৰাজন

তামিলিছাই সৌন্দৰাৰাজন (: Tamilisai Soundararajan; জন্ম: ২ জুন ১৯৬১) এগৰাকী ভাৰতীয় ৰাজনীতিবিদ। তেখেতে তেলেংগানাৰ দ্বিতীয় গৱৰ্ণৰ হিচাপে কাৰ্যনিৰ্বাহ কৰিছিল, আৰু ২০২১ চনৰ ১৮ ফেব্ৰুৱাৰীৰ পৰা ২০২৪ চনৰ ১৮ মাৰ্চলৈকে পুডুচেৰীৰ লেফটেনেণ্ট গৱৰ্ণৰ (অতিৰিক্ত চাৰ্জ) হিচাপেও কাৰ্যনিৰ্বাহ কৰিছিল।^১২

২০২৪ চনৰ ১৮ মাৰ্চত তামিলিছাই সৌন্দৰাৰাজনে তেলেংগানাৰ গৱৰ্ণৰ আৰু পুডুচেৰীৰ লেফটেনেণ্ট গৱৰ্ণৰ পদৰ পৰা পদত্যাগ কৰে আৰু ২০ মাৰ্চ ২০২৪ তাৰিখে পুনৰ তামিলনাডু বিজেপিত যোগদান কৰে।^৩

ব্যক্তিগত জীৱন আৰু শিক্ষা

১৯৬১ চনৰ ২ জুনত তামিলনাডুৰ কন্যাকুমাৰীৰ কলিয়াক্কাভিলাইত জন্মগ্ৰহণ কৰিছিল।^৪ তেওঁৰ পিতৃ কুমাৰী অনন্তন,^৫ এজন প্ৰাক্তন সংসদ সদস্য আৰু তামিলনাডুৰ এজন জ্যেষ্ঠ ভাৰতীয় জাতীয় কংগ্ৰেছ নেতা আছিল। আনহাতে, তেওঁৰ স্বামী সৌন্দৰৰাজন এজন চিকিৎসক।^৬

ইথিৰাজ কলেজ ফৰ উইমেনৰ পৰা স্নাতক ডিগ্ৰী লাভ কৰি চেন্নাইৰ মাদ্ৰাজ মেডিকেল কলেজ^৭ত এম বি বি এছ আৰু চেন্নাইৰ ডাঃ এম জি আৰ মেডিকেল ইউনিভাৰ্চিটিত প্ৰসূতি আৰু স্ত্ৰীৰোগ বিজ্ঞানৰ অৰ্হতা লাভ কৰে। কানাডাত ছ’ন’লজী আৰু এফ ই টি থেৰাপীৰ প্ৰশিক্ষণ লাভ কৰিছিল।

ৰাজনৈতিক প্ৰতিশ্ৰুতিৰ পূৰ্বে তেওঁ চেন্নাইৰ ৰামচন্দ্ৰ চিকিৎসা মহাবিদ্যালয়ত ৫ বছৰ সহকাৰী অধ্যাপিকা হিচাপে কাম কৰিছিল।^৭ তেওঁৰ দুটা সন্তান আছে।

সমাজ আৰু সাধাৰণ জনতাৰ প্ৰতি তেওঁৰ নিষ্ঠাবান সেৱা আৰু লিংগ সমতা, মহিলা সবলীকৰণৰ প্ৰসাৰৰ স্বীকৃতি স্বৰূপে তেওঁক আমেৰিকাৰ কংগ্ৰেছী ডেনি কে ডেভিছৰ অধীনত চলি থকা বহু জাতিগত পৰামৰ্শদাতা টাস্ক ফ'ৰ্চ, আমেৰিকাৰ দ্বাৰা “ বছৰৰ আন্তঃৰাষ্ট্ৰীয় উদীয়মান তাৰকা – ২০১৮” বঁটা প্ৰদান কৰা হয়।^৮৯

ৰাজনৈতিক জীৱন

ৰাজনৈতিক পৰিয়ালত ডাঙৰ-দীঘল হোৱাৰ বাবে সৌন্দৰৰাজনে সৰুৰে পৰা ৰাজনীতিৰ প্ৰতি আগ্ৰহী আছিল।^১০ মাদ্ৰাজ চিকিৎসা মহাবিদ্যালয়ত অধ্যয়নৰ সময়ত ছাত্ৰ নেত্ৰী হিচাপে নিৰ্বাচিত হৈছিল। তামিলনাডু ৰাজ্যিক বিজেপি ইউনিটত ১৯৯৯ চনত দক্ষিণ চেন্নাই জিলা চিকিৎসা শাখাৰ সম্পাদক, ২০০১ চনত ৰাজ্যিক সাধাৰণ সম্পাদক চিকিৎসা শাখাৰ পৰা আৰম্ভ কৰি, ২০০৫ চনত সৰ্বভাৰতীয় সহ- আহ্বায়ক (দক্ষিণ ৰাজ্যৰ বাবে চিকিৎসা শাখা)^১১, ২০০৭ চনত ৰাজ্যিক সাধাৰণ সম্পাদক, ২০১০ চনত ৰাজ্যিক উপ-সভাপতি আৰু সৰ্বভাৰতীয় ৰাষ্ট্ৰীয় সচিব হিচাপে উন্নীত হয় ২০১৩ চনত বিজেপিত যোগদান কৰে।^১২১৩

ভাৰতৰ ৰাষ্ট্ৰপতি ৰামনাথ কোবিন্দৰ নিৰ্দেশত ২০১৯ চনৰ ১ ছেপ্টেম্বৰত তেলেংগানাৰ ৰাজ্যপাল হিচাপে নিযুক্তি লাভ কৰা তেখেত বৰ্তমান ৰাজ্যৰ পদত অধিষ্ঠিত হোৱা প্ৰথম মহিলা। ২০১৯ চনৰ ৯ ছেপ্টেম্বৰত তেলেংগানাৰ গৱৰ্ণৰ হিচাপে দায়িত্ব গ্ৰহণ কৰে।২০২১ চনৰ ১৬ ফেব্ৰুৱাৰীত পুডুচেৰী (কেন্দ্ৰীয় শাসিত অঞ্চল)ৰ অতিৰিক্ত দায়িত্ব দিয়া হয় আৰু কেন্দ্ৰীয় শাসিত অঞ্চলৰ পদত অধিষ্ঠিত হোৱা পঞ্চমগৰাকী মহিলা। ^১৪১৫Covid-19 মহামাৰীৰ সময়ত তেওঁ চিকিৎসালয়ত থকা স্বাস্থ্যসেৱা কৰ্মীসকলৰ ওচৰলৈ গৈছিল আৰু টিকাকৰণৰ বাবে উৎসাহিত কৰিছিল।

আজিলৈকে সাংসদ বা বিধায়ক হোৱাৰ সকলো প্ৰচেষ্টাত পৰাজিত হৈছে সৌন্দৰৰাজনে, দুটা বিধানসভা নিৰ্বাচন আৰু সংসদ নিৰ্বাচনত প্ৰতিদ্বন্দ্বিতা কৰি বিফল হয়। ২০১৯ চনৰ ভাৰতীয় সাধাৰণ নিৰ্বাচনত তেওঁ থুথুক্কুডিৰ তামিলনাডুৰ প্ৰাক্তন মুখ্যমন্ত্ৰী এম কৰুণানিধিৰ কন্যা কানিমোজি কৰুণানিধিৰ বিৰুদ্ধে পৰাস্ত হয়।^১৬১৭ ৰাজ্যজুৰি সংসদ আৰু বিধানসভা নিৰ্বাচনত তেওঁ ব্যাপক প্ৰচাৰ চলাইছিল।^১৮