জোচেফ মৰ্গেন (অভিনেতা)

জোচেফ মাৰ্টিন মৰ্গেন (Joseph Martin Morgan, জন্ম: ১৬ মে', ১৯৮১) এগৰাকী ব্ৰিটিছ অভিনেতা।^১ তেওঁ এটা পিপলছ চয়েছ বঁটা, এটা টিভি গাইড বঁটা লাভ কৰাৰ উপৰি আঠবাৰকৈ টিন চয়েছ বঁটাৰ বাবে মনোনীত হৈছে। গৱৰ কলেজ স্বীকাৰপ্ৰাপ্ত প্ৰতিষ্ঠানত অধ্যয়ন কৰাৰ পাছত তেওঁ স্কাই ৱান চেনেলৰ ধাৰাবাহিক হেক্স-ৰ প্ৰথম ছিজনত ট্ৰয়ৰ চৰিত্ৰত অভিনয় কৰে। ইয়াৰ পিছত তেওঁ মাষ্টাৰ এণ্ড কমাণ্ডাৰ: দ্য ফাৰ চাইড অৱ দ্য ৱৰ্ল্ড (২০০৩) আৰু অলেকজেণ্ডাৰ (২০০৪) চলচ্চিত্ৰত আৰু বিবিচি টু চেনেলৰ টেলিভিছন ধাৰাবাহিক দ্য লাইন অৱ বিউটি (২০০৬)ত সহ-অভিনয় কৰে।

দ্য চিডব্লিউ চেনেলৰ অলৌকিক কাহিনীভিত্তিক টেলিভিছন ধাৰাবাহিক দ্য ভেম্পায়াৰ ডায়েৰীজ (২০১১)ত ক্লাউছ মিকায়েলছনৰ চৰিত্ৰত কৰা অভিনয়ৰ বাবে মৰ্গেনে বিশেষভাৱে চৰ্চালৈ আহে। পৰৱৰ্তী সময়ত তেওঁ ইয়াৰ স্পিন-অফ ধাৰাবাহিক দ্য অৰিজিনেলছ (২০১৩–২০১৮)ত মুখ্য চৰিত্ৰত একেটা ভূমিকাৰে অভিনয় কৰে। তেওঁ পিকক চেনেলৰ ধাৰাবাহিক ব্ৰেভ নিউ ৱৰ্ল্ডত চিজেক৬০/ইলিয়ট আৰু এইচবিও মেক্সৰ ধাৰাবাহিক টাইটানছত ব্ৰাদাৰ ব্লাডৰ চৰিত্ৰ ৰূপায়ণ কৰে। মৰ্গেনে ২০২৪ চনত পেৰামেউণ্ট প্লাছৰ ধাৰাবাহিক হেলোত জেমছ একৰছনৰ চৰিত্ৰত অভিনয় কৰিছিল।

প্ৰাৰম্ভিক জীৱন

মৰ্গেনৰ জন্ম লণ্ডনত হৈছিল, কিন্তু তেওঁ ১১ বছৰ ধৰি সোৱানসীত বসবাস কৰিছিল।^২ তেওঁ নিজৰ পৰিয়ালৰ আটাইতকৈ ডাঙৰ সন্তান। তেওঁ মৰিষ্টন কম্প্ৰিহেন্সিভ স্কুলৰ ছাত্ৰ আছিল আৰু তাৰ পিছত গৰ্চিনন কলেজত (বৰ্তমান গৱৰ কলেজ সোৱানসী) বিটিইচি পাৰফৰ্মিং আৰ্টছ পাঠ্যক্ৰম অধ্যয়ন কৰিছিল। ইয়াৰ পিছত তেওঁ চেণ্ট্ৰেল স্কুল অৱ স্পীচ এণ্ড ড্ৰামাত অধ্যয়ন কৰিবলৈ পুনৰ লণ্ডনলৈ ঘূৰি আহে।

কৰ্মজীৱন

মৰ্গেনৰ জীৱনৰ প্ৰথমটো অভিনয় অডিচন আছিল হেৰী পটাৰ এণ্ড দ্য চেম্বাৰ অৱ ছিক্ৰেটছ চলচ্চিত্ৰৰ বাবে, য'ত তেওঁ টম ৰিডলৰ চৰিত্ৰৰ বাবে অডিচন দিছিল।^৩ মৰ্গেনে স্কাই ৱান টেলিভিছন ধাৰাবাহিক হেক্স-ৰ প্ৰথম ছিজনত ট্ৰয়ৰ চৰিত্ৰত অভিনয় কৰে আৰু ইয়াৰ পিছত মাষ্টাৰ এণ্ড কমাণ্ডাৰ: দ্য ফাৰ চাইড অৱ দ্য ৱৰ্ল্ড (২০০৩) আৰু অলেকজেণ্ডাৰ (২০০৪) চলচ্চিত্ৰত আৰু বিবিচি টু চেনেলৰ টেলিভিছন ধাৰাবাহিক দ্য লাইন অৱ বিউটিত সহ-অভিনয় কৰে।^৪ ইয়াৰ উপৰি তেওঁ ডক মাৰ্টিন আৰু কেজুৱেল্টী ধাৰাবাহিকত অভিনয় কৰাৰ লগতে বিলি পাইপাৰৰ সৈতে মেনচফীল্ড পাৰ্ক (২০০৭) ছবিত সহ-অভিনয় কৰিছিল। ২০১০ চনত তেওঁ বেন হুৰ নামৰ এক মিনি-ধাৰাবাহিকত নাম ভূমিকা লাভ কৰে, যি প্ৰথমবাৰৰ বাবে ২০১০ চনৰ ৪ এপ্ৰিলত কানাডাৰ চিবিচি টেলিভিছন আৰু আমেৰিকাৰ এবিছি টিভিত সম্প্ৰচাৰিত হৈছিল।^৫৬

মৰ্গেনে একে নামৰ উপন্যাস শৃংখলাৰ ওপৰত আধাৰিত দ্য চিডব্লিউ চেনেলৰ অলৌকিক কাহিনীভিত্তিক ড্ৰামা ধাৰাবাহিক দ্য ভেম্পায়াৰ ডায়েৰীজ আৰু ইয়াৰ স্পিন-অফ ধাৰাবাহিক দ্য অৰিজিনেলছত ক্লাউছ মিকায়েলছনৰ চৰিত্ৰত অভিনয় কৰে।^৭৮৯ তেওঁৰ অভিনয়ৰ বাবে তেওঁ কেইবাটাও টিন চয়েছ বঁটাৰ মনোনয়ন আৰু এটা পিপলছ চয়েছ বঁটা লাভ কৰে। ইয়াৰ উপৰি তেওঁ ২০১১ চনৰ চলচ্চিত্ৰ ইমৰ্টেলছত হেনৰী কেভিলৰ সৈতে লাইচাণ্ডাৰ চৰিত্ৰত অভিনয় কৰিছিল। বাডীটিভি-এ তেওঁক "২০১১ চনৰ টিভিৰ আটাইতকৈ আকৰ্ষণীয় পুৰুষ"ৰ তালিকাত ৮৪ নম্বৰ স্থান দিছিল।^১০

২০২০ চনত মৰ্গেনে পিকক চেনেলৰ বিজ্ঞান কল্পকাহিনীমূলক ড্ৰামা ধাৰাবাহিক ব্ৰেভ নিউ ৱৰ্ল্ডত চিজেক৬০/ইলিয়ট চৰিত্ৰত অভিনয় কৰে।^১১১২ ২০২২ চনত মৰ্গেনক এইচবিও মেক্স ধাৰাবাহিক টাইটানছৰ চতুৰ্থ ছিজনত ব্ৰাদাৰ ব্লাডৰ চৰিত্ৰৰ বাবে নিৰ্বাচিত কৰা হয়।^১৩ তেওঁ দ্য অৰিজিনেলছৰ স্পিন-অফ ধাৰাবাহিক লেগেচিছৰ অন্তিম ছিজনত পুনৰ ক্লাউছৰ চৰিত্ৰটো ৰূপায়ণ কৰিছিল।^১৪

মৰ্গেনে ২০২৪ চনৰ ফেব্ৰুৱাৰী মাহত সম্প্ৰচাৰিত হেলো ধাৰাবাহিকৰ দ্বিতীয় ছিজনৰ অভিনয় শিল্পীদলত আন এগৰাকী নৱাগত ক্ৰীষ্টিনা ৰডলোৰ সৈতে যোগ দিয়ে।^১৫ ইয়াত তেওঁ ৰাষ্ট্ৰসংঘৰ মহাকাশ কমাণ্ডৰ নেভেল ইণ্টেলিজেন্স কাৰ্যালয়ৰ এগৰাকী এজেণ্ট জেমছ একৰছনৰ চৰিত্ৰত অভিনয় কৰিছে।^১৬ ২০১৪ চনৰ ৫ জুলাইত জামাইকাৰ ওচো ৰিঅ'চত তেওঁলোক বিবাহপাশত আবদ্ধ হয়।^১৭

তেওঁ ২০১৪ চনৰপৰাই এজন নিৰামিষভোজী (ভেগান)।^১৮১৯

মৰ্গেন 'পজিটিভ উইমেন' নামৰ দাতব্য সংস্থাটোৰ এজন সমৰ্থক।^২০

বাহ্যিক সংযোগ

• Acting CV and profile at Curtis Brown Talent Agency