মজীদ মজীদী

মজীদ মজীদী (مجید مجیدی,, জন্ম: ১৭ এপ্ৰিল ১৯৫৯) এগৰাকী ইৰানী চলচ্চিত্ৰ নিৰ্মাতা আৰু প্ৰযোজক। তেওঁৰ চলচ্চিত্ৰসমূহত প্ৰায়ে শিশু বা কিশোৰ-কিশোৰীক কেন্দ্ৰীয় চৰিত্ৰ হিচাপে দেখুওৱা হয়; শৈশৱৰ নিষ্পাপতা, পাৰিবাৰিক বন্ধন, দৰিদ্ৰতা, সামাজিক সমস্যা আৰু সংহতিৰ দৰে বিষয় অন্বেষণ কৰা হয়; আৰু এই চলচ্চিত্ৰসমূহ মানৱতাবাদী সংবেদনশীলতাৰ দ্বাৰা বৈশিষ্ট্যযুক্ত। তেওঁৰ উল্লেখযোগ্য চলচ্চিত্ৰসমূহৰ ভিতৰত চিলড্ৰেন অৱ হেভেন (১৯৯৭), দ্য কালাৰ অৱ পেৰাডাইজ (১৯৯৯), বাৰান (২০০১) আৰু দ্য ছং অৱ স্পেৰ'জ (২০০৮) অন্যতম। চিলড্ৰেন অৱ হেভেন শ্ৰেষ্ঠ আন্তঃৰাষ্ট্ৰীয় পূৰ্ণদৈৰ্ঘ্য চলচ্চিত্ৰৰ একাডেমী বঁটাৰ বাবে মনোনীত হৈছিল। পৰৱৰ্তী সময়ত মজীদীয়ে মুহম্মদ: দ্য মেচেঞ্জাৰ অৱ গড (২০১৫) পৰিচালনা কৰে। এইখন ইছলামৰ নবী মুহম্মদৰ শৈশৱক কেন্দ্ৰ কৰি নিৰ্মিত এখন মহাকাব্যিক চলচ্চিত্ৰ, য'ত তেওঁৰ মুখমণ্ডল অস্পষ্ট কৰি ৰখা হৈছে আৰু পৰ্দাত কেতিয়াও দেখুওৱা হোৱা নাই।

জীৱনী

এটা মধ্যবিত্ত ইৰানী পৰিয়ালত জন্মগ্ৰহণ কৰা মজিদীয়ে তেহৰানত ডাঙৰ-দীঘল হৈছিল আৰু মাত্ৰ ১৪ বছৰ বয়সতে তেওঁ অপেশাদাৰী নাট্য দলত অভিনয় কৰিবলৈ আৰম্ভ কৰিছিল। ইয়াৰ পিছত তেওঁ তেহৰানৰ ইনষ্টিটিউট অৱ ড্ৰামেটিক আৰ্টছত অধ্যয়ন কৰে।^১

১৯৭৯ চনৰ ইৰানী বিপ্লৱৰ পিছত চলচ্চিত্ৰৰ প্ৰতি থকা তেওঁৰ আগ্ৰহে তেওঁক বিভিন্ন ছবিত অভিনয় কৰিবলৈ অনুপ্ৰাণিত কৰিছিল, যাৰ ভিতৰত ১৯৮৫ চনত মুক্তিপ্ৰাপ্ত মহচেন মাখমালবাফৰ বয়কট চলচ্চিত্ৰখন বিশেষভাৱে উল্লেখনীয়।

১৯৯৭ চনত মজিদীয়ে চিলড্ৰেন অৱ হেভেন পৰিচালনা কৰে, যিখন চলচ্চিত্ৰ শ্ৰেष्ठ বিদেশী ভাষাৰ চলচ্চিত্ৰ বিভাগত একাডেমী বঁটা লাভৰ বাবে মনোনীত হৈছিল। যদিও চিনেমাখনে ৰবাৰ্টো বেনীনিৰ ইটালীৰ চলচ্চিত্ৰ লাইফ ইজ বিউটিফুলৰ হাতত পৰাজয়বৰণ কৰিছিল, তথাপিও চিলড্ৰেন অৱ হেভেন আছিল একাডেমীৰ দ্বাৰা মনোনীত হোৱা প্ৰথমখন ইৰানী চলচ্চিত্ৰ।

চিলড্ৰেন অৱ হেভেনৰ পিছত মজিদীয়ে আন কেইবাখনো উল্লেখনীয় চলচ্চিত্ৰ পৰিচালনা কৰিছে, যেনে ২০০০ চনত দ্য কালাৰ অৱ পেৰাডাইজ, ২০০১ চনত বাৰান আৰু ২০০৫ চনত দ্য উইলো ট্ৰী। ইয়াৰ উপৰিও তেওঁ শেহতীয়াকৈ বেয়াৰফুট টু হেৰাত নামৰ এটা পূৰ্ণদৈৰ্ঘ্যৰ প্ৰামাণ্যচিত্ৰ পৰিচালনা কৰিছিল, যিয়ে ২০০১ চনৰ তালিবান বিৰোধী অভিযানৰ সময়ত আৰু তাৰ পিছত শৰণাৰ্থী শিবিৰ আৰু হেৰাত চহৰৰ জীৱন যাত্ৰা তুলি ধৰিছিল।

২০০৮ চনত মজিদীৰ প্ৰশংসিত চলচ্চিত্ৰ দ্য ছং অৱ স্পেৰ'জ ভাৰতৰ বিশাখাপত্তনম আন্তঃৰাষ্ট্ৰীয় চলচ্চিত্ৰ মহোৎসৱৰ উদ্বোধনী চলচ্চিত্ৰ আছিল।^২

চীনৰ ৰাজধানীত অনুষ্ঠিত হ’বলগীয়া ২০০৮ চনৰ গ্ৰীষ্মকালীন অলিম্পিকৰ প্ৰস্তুতিৰ বাবে বেইজিং চহৰক পৰিচিত কৰাই দিবলৈ বেইজিং চৰকাৰে আমন্ত্ৰণ জনোৱা পাঁচজন আন্তঃৰাষ্ট্ৰীয় চলচ্চিত্ৰ পৰিচালকৰ ভিতৰত মজিদী অন্যতম আছিল। এই চুটি প্ৰামাণ্যচিত্ৰ প্ৰকল্পটোৰ নাম আছিল ভিজন বেইজিং।^৩

ডেনমাৰ্কত ইছলাম ধৰ্মৰ প্ৰৱক্তা মহম্মদক ব্যংগ কৰি কাৰ্টুন প্ৰকাশ কৰাৰ প্ৰতিবাদত মজিদীয়ে ডেনমাৰ্কৰ এটা চলচ্চিত্ৰ মহোৎসৱৰ পৰা নিজৰ নাম প্ৰত্যাহাৰ কৰিছিল। তেওঁ উল্লেখ কৰিছিল যে যিকোনো ধৰ্মীয় বিশ্বাস বা প্ৰতীকক অপমান কৰাৰ বিৰুদ্ধে প্ৰতিবাদ সাব্যস্ত কৰিবলৈ তেওঁ এই সিদ্ধান্ত লৈছে।^৪

মজিদীয়ে ইৰানৰ বিৰুদ্ধে চলা আক্ৰমণাত্মক যুদ্ধৰ গৰিহণা দি ইয়াক ন্যায় আৰু অন্যায়ৰ মাজৰ যুঁজ বুলি অভিহিত কৰে, য'ত শত্ৰুপক্ষই শিশুসকলক হত্যা কৰিছে আৰু ইৰানে বিশ্বৰ সকলো নিপীড়িত আৰু ভুক্তভোগী লোকৰ হৈ থিয় দি প্ৰতিৰোধ গঢ়ি তুলিছে। তেওঁ জোৰ দি কয় যে এই যুদ্ধৰ বাবে সমগ্ৰ বিশ্বৰে মুক্ত বিবেক সম্পন্ন লোকসকল সাৰ পাই উঠাটো আৱশ্যক।^৫