ছাংলট ফেন্‌লা

ছাংলট ফেন্‌লা হৈছে লেখক-সাংবাদিক পৰাগ কুমাৰ দাসৰ এখন বহুপঠিত উপন্যাস। উপন্যাসখনৰ যোগেদি লেখকে অসমৰ এটা নিষিদ্ধ ঘোষিত উগ্ৰপন্থী সংগঠনৰ উত্থান আৰু অৱক্ষয়ৰ বিভিন্ন দিশ সম্পৰ্কে বৰ্ণনা কৰিছে।

লেখকৰ পৰিচয়

মূল প্ৰবন্ধ: পৰাগ কুমাৰ দাস

পৰাগ কুমাৰ দাস (জন্ম: ২৪ ফেব্ৰুৱাৰী, ১৯৬১ - মৃত্যু: ১৭ মে, ১৯৯৬) আছিল অসমৰ সংবাদপত্ৰ অসমীয়া প্ৰতিদিনৰ ভূতপূৰ্ব সম্পাদক, সাংবাদিক, মানৱ অধিকাৰ কৰ্মী আৰু অসমত মানৱ অধিকাৰ সংগ্ৰামৰ এজন আগৰণুৱা। পৰাগ কুমাৰ দাসে দিল্লীৰ ছেইণ্ট ষ্টিফেন্‌চ মহাবিদ্যালয় আৰু দিল্লী অৰ্থনীতি বিদ্যালয়ত শিক্ষা গ্ৰহণ কৰিছিল। তেওঁ "মানৱ অধিকাৰ সংগ্ৰাম সমিতি" (MASS)ৰো প্ৰতিষ্ঠাপক নেতা আছিল। তাৰ আগতে তেওঁ "গুৱাহাটী ষ্টক এক্সচেঞ্জ"ত প্ৰবন্ধক হিচাপে কাম কৰিছিল।

১৯৯৬ চনত ছালফাই তেওঁক হত্যা কৰে।

প্ৰকাশ

এই উপন্যাসখন প্ৰথমে উদাংশ্ৰী প্ৰকাশনৰ পৰা ১৯৯৩ চনৰ জানুৱাৰী মাহত প্ৰকাশ হৈ ওলায়। এই প্ৰকাশনৰ পৰা উপন্যাসখনৰ চতুৰ্থ সংস্কৰণ ১৯৯৭ চনৰ জুলাইত প্ৰকাশ পায়। ‌‌‌^১ ইয়াৰ পাছত ২০১৩ চনৰ ডিচেম্বৰত আলিবাট প্ৰকাশনৰ হৈ প্ৰাঞ্জল কুমাৰ মহন্তই কিতাপখন প্ৰকাশ কৰি উলিয়ায়।