চৈত্ৰা বি

চৈত্ৰা বি (ইংৰাজী ভাষা: Chaithra B.; জন্ম: ৮ জানুৱাৰী ২০০২)^১ কৰ্ণাটকৰ এগৰাকী ভাৰতীয় খো খো খেলুৱৈ।^২ তেওঁ ভাৰতীয় মহিলা ৰাষ্ট্ৰীয় খো খো দলৰ এগৰাকী ৰক্ষক (defender) হিচাপে খেলে।^৩ ২০২৫ চনৰ জানুৱাৰী মাহত নতুন দিল্লীত অনুষ্ঠিত হোৱা প্ৰথমখন খো খো বিশ্বকাপ জয় কৰা ভাৰতীয় মহিলা দলৰ তেওঁ অন্যতম সদস্য আছিল।^৪

প্ৰাৰম্ভিক জীৱন আৰু শিক্ষা

চৈত্ৰা কৰ্ণাটকৰ মহীশূৰ জিলাৰ টি. নৰ্ছিপুৰা তালুকৰ অন্তৰ্গত কুৰুবুৰু গাঁৱৰ বাসিন্দা।^৪ তেওঁ বাছৱন্না আৰু নগাৰত্নৰ কন্যা।^৫ তেওঁ কুৰুবুৰুৰ কনকপুৰা দেগুলা মঠ স্কুলত স্কুলীয়া শিক্ষা লাভ কৰিছিল।^৬ তেওঁ নিজৰ গাঁৱতে প্ৰথম প্ৰশিক্ষক মঞ্জুনাথৰ ওচৰত খো খোৰ প্ৰাথমিক শিক্ষা গ্ৰহণ কৰিছিল।

কেৰিয়াৰ

২০২৫ চনৰ জানুৱাৰী মাহত নতুন দিল্লীত অনুষ্ঠিত হোৱা প্ৰথমখন খো খো বিশ্বকাপৰ ছেমি ফাইনেল আৰু ফাইনেল দুয়োটাতে চৈত্ৰাই ভাৰতীয় মহিলা দলৰ বিজয়ত এক গুৰুত্বপূৰ্ণ ভূমিকা পালন কৰিছিল।^৭ ভাৰতীয় দলে গ্ৰুপ পৰ্যায়ত দক্ষিণ কোৰিয়া, ইৰান আৰু মালয়েছিয়াক পৰাস্ত কৰিছিল। ইয়াৰ পিছত কোৱাৰ্টাৰ ফাইনেলত বাংলাদেশক আৰু ছেমি ফাইনেলত দক্ষিণ আফ্ৰিকাক পৰাস্ত কৰিছিল। ফাইনেলত নেপালক ৭৮-৪০ ব্যৱধানত পৰাস্ত কৰা মেচখনত তেওঁৰ উৎকৃষ্ট প্ৰদৰ্শনৰ বাবে তেওঁক 'প্লেয়াৰ অফ দ্য মেচ' বঁটা প্ৰদান কৰা হয়।^৮৯

২০২৫ চনৰ ২৫ জানুৱাৰীত কুৰুবুৰুৰ বিদ্যাদৰ্শিনী কনভেণ্ট আৰু হাইস্কুল চৌহদত চৈত্ৰাক সম্বৰ্ধনা জনোৱা হয়।^৬ ২০২৫ চনৰ ৭ ফেব্ৰুৱাৰীত মহীশূৰ জিলা ক্ৰীড়া আৰু সাংস্কৃতিক বেদিকাই তেওঁক সম্বৰ্ধনা জনায় আৰু ৰাজ্য চৰকাৰে তেওঁৰ বাবে ৫ লাখ টকাৰ নগদ পুৰস্কাৰ ঘোষণা কৰে।^১০