চেংমৰা

চেংমৰা (Spiny Arum, বৈজ্ঞানিক নামকৰণ পদ্ধতি: Lasia spinosa) ভাৰতকে ধৰি এচিয়া মহাদেশৰ বিভিন্ন দেশ আৰু পাপুৱা নিউগিনিত পোৱা এবিধ কচুজাতীয় চিৰসেউজ উদ্ভিদ। এই উদ্ভিদজোপা বাৰীৰ ঢাপ, পিটনি, নদীকাষৰীয়া সেমেকা বা জেকা ঠাই আদিত পোৱা যায়| ইয়াক কাঁ‌ইটীয়া কচু, ওলমোটোকা, কেশঠুৰী,, লা-ঘটুৱা আদি নামেৰেও জনা যায়।^১ বড়ো ভাষাত চেংমৰাক চিব্ৰু আৰু টাই-আহোম ভাষাত ফাকি-চিক-নাম বুলি কোৱা হয়।^২৩ অসমত গৰু বিহুৰ দিনা পৰম্পৰা অনুযায়ী খোৱা এশ-এবিধ শাকৰ ভিতৰত চেংমৰা অন্যতম।^৪ বনৰীয়া আৰু কৃষিজাত উভয় ধৰণেৰেই উদ্ভিদজোপাৰ বিস্তৃতি পোৱা যায়।^৫

বিৱৰণ

চেংমৰা ১-ৰ পৰা ২ মিটাৰ পৰ্যন্ত ওখ হয়। পাতৰ ঠাৰি মঙহাল আৰু দীঘল। প্ৰতিডাল ঠাৰিৰ মূৰত ত্ৰিভুজাকাৰ, ১২-১৩ খণ্ডত বিভক্ত একোখিলা পাত থাকে। পাতৰ মধ্যসিৰা আৰু শাখা সিৰা কাঁইটীয়া। বৃন্ত দীঘল, ত্ৰিভুজাকাৰ, অখণ্ড, বা পখীপাদাকৃতি।^১ উদ্ভিদজোপাৰ গোটেই গাতে সৰু সৰু কাঁইট থাকে। ইয়াৰ পুষ্প মঞ্জৰী চুটি আৰু গোটা। চেংমৰাত ৪-৬ ডাল পুংকেশৰ থাকে। পুংদণ্ডডাল চুটি।^৬

খাদ্য হিচাপে ব্যৱহাৰ

চেংমৰাৰ উদ্ভিদ পৰিয়ালৰ প্ৰায়বোৰ প্ৰজাতিতে কেলছিয়াম অক্সেলেট ক্ৰিষ্টেলৰ উপস্থিতি পোৱা যায় আৰু মুখ বা জিভাত লাগিলে ই সহস্ৰ তীক্ষ্ণ বেজীয়ে বিন্ধাৰ দৰে অনুভূতি দিব পাৰে। ভালদৰে ৰান্ধিলে বা সম্পূৰ্ণৰূপে শুকুৱাই পেলালে এই উপাদানটো ভংগুৰ অৱস্থালৈ নিব পাৰি। চেংমৰাৰ পাত আৰু গা-গছ বনৌষধি তথা বিভিন্ন আমিষ-নিৰামিষ ব্যঞ্জনৰ উপাদান হিচাপে ব্যৱহাৰ কৰা হয়। ইয়াৰ পাত আৰু মূল অংশ অৰ্শৰোগৰ প্ৰতিকাৰক হিচাপে ব্যৱহৃত হয়।^৫