কিৰণ জচল

কিৰণমীত কৌৰ জচল (ইংৰাজী ভাষা: Kiranmeet Kaur Jassal; জন্ম: ১৩ মাৰ্চ ১৯৯৬), যাক সাধাৰণতে কিৰণ জচল বুলি জনা যায়, এগৰাকী মালয়েছিয়ান ভাৰতীয় মডেল আৰু সুন্দৰী প্ৰতিযোগিতাৰ খিতাপধাৰী। তেওঁ ২০১৬ বৰ্ষৰ মিছ ইউনিভাৰ্চ মালয়েছিয়াৰ মুকুট অৰ্জন কৰিছিল। তেওঁ ফিলিপাইনছৰ মানিলাত অনুষ্ঠিত মিছ ইউনিভাৰ্চ ২০১৬ত নিজৰ দেশক প্ৰতিনিধিত্ব কৰিছিল।

ব্যক্তিগত জীৱন

জচল চাৰিজনীয়া পৰিয়ালটোৰ ভিতৰত আটাইতকৈ সৰু।^১ তেওঁৰ মাতৃ ৰঞ্জিত কৌৰ এগৰাকী অধিবক্তা আৰু তেওঁ ২০১৫ চনৰ মিছেছ মালয়েছিয়া ৱৰ্ল্ডৰ বিজয়ী আছিল। তেওঁৰ জ্যেষ্ঠ ভগ্নী ডা° ৰণমীত জচল ২০১৬ চনৰ মিছ গ্ৰেণ্ড মালয়েছিয়াৰ খিতাপধাৰী আছিল।^২৩ জচলে দন্ত চিকিৎসা অধ্যয়ন কৰাৰ পৰিকল্পনা কৰিছে। তেওঁ ২০১৬ চনৰ জুলাই মাহত উল্লেখ কৰিছিল যে যিয়েই নহওক তেওঁ দন্ত চিকিৎসা ত্যাগ নকৰে।^৪ জচলে ভৱিষ্যতে নিজাকৈ অৰ্থ’ডনটিক অনুশীলন কেন্দ্ৰ স্থাপন কৰাৰ ইচ্ছা ৰাখে।^১ তেওঁ পঞ্জাবী বংশোদ্ভূত আৰু এজন শিখ ধৰ্মাৱলম্বী।^৫

কৰ্মজীৱন

সুন্দৰী প্ৰতিযোগিতা

মিছ ইউনিভাৰ্চ মালয়েছিয়া ২০১৬

২০১৬ চনৰ ৩০ জানুৱাৰীত মালয়েছিয়াৰ চেৰি কেমবাংগানৰ পেলেচ অফ দ্য গোল্ডেন হৰ্চেজ হোটেলত জচলক মিছ ইউনিভাৰ্চ মালয়েছিয়া ২০১৬ৰ মুকুট পিন্ধোৱা হয়।^৬ পূৰ্বৰ খিতাপধাৰী মিছ ইউনিভাৰ্চ মালয়েছিয়া ২০১৫ ভেনেচা টেভিয়ে তেওঁক মুকুট পিন্ধাইছিল। মূল খিতাপৰ উপৰি তেওঁক "মিছ মাই ডেণ্টিষ্ট উইনিং স্মাইল" উপ-খিতাপো প্ৰদান কৰা হৈছিল।^৬

মিছ ইউনিভাৰ্চ ২০১৬

জচলে মিছ ইউনিভাৰ্চ ২০১৬ত মালয়েছিয়াক প্ৰতিনিধিত্ব কৰিছিল আৰু মিছ ভেনেজুৱেলা আৰু বিজয়ী মিছ ম্যানমাৰৰ সৈতে শ্ৰেষ্ঠ ৰাষ্ট্ৰীয় সাজ-পোছাক (National Costume) বঁটাৰ শীৰ্ষ ১২ গৰাকীৰ ভিতৰত স্থান লাভ কৰিছিল। তেওঁ পেট্ৰোনাছ টুইন টাৱাৰৰদ্বাৰা অনুপ্ৰাণিত সাজ-পোছাক পিন্ধি মালয়েছিয়াক প্ৰতিনিধিত্ব কৰিছিল।^৭ এই ৰাষ্ট্ৰীয় সাজ-পোছাকজোৰ মালয়েছিয়াৰ আগশাৰীৰ ফেশ্বন ডিজাইনাৰ ৰিজমান ৰুজাইনীয়ে তৈয়াৰ কৰিছিল।^৮ তেৱেঁই জচলৰ সান্ধ্যকালীন পোছাকজোৰো (evening gown) ডিজাইন কৰিছিল।^৯

মডেলিঙ

জচলে ২০১৬ চনৰ ল'ৰিয়েল প্ৰফেচনেল কালৰ ফৰ লাইফ চুলিৰ ফেশ্বন দানশীল অনুষ্ঠানত ডেবোৰা হেনৰী আৰু ছুপাৰমডেল আম্বাৰ চিয়াৰ সৈতে অংশগ্ৰহণ কৰিছিল।^১০

মানৱীয় কাম-কাজ

জচল মালয়েছিয়া এইডছ ফাউণ্ডেচনৰ এগৰাকী চেলিব্ৰিটি ৰাষ্ট্ৰদূত।^১১ ২০১৮ চনত জচলক ৰয়েল মালয়েছিয়া পুলিচৰ 'গো-টু-ছেফটি-পইণ্ট' (GTSP) পদক্ষেপৰ সজাগতা বিয়পাবলৈ পেট্ৰন চিকিউৰিটি এম্বেচেডৰ হিচাপে নিযুক্তি দিয়া হৈছিল।^১২