অভিকা গৌৰ

অভিকা গৌৰ (ইংৰাজী ভাষা: Avika Gor; জন্ম: ৩০ জুন ১৯৯৭) এগৰাকী ভাৰতীয় অভিনেত্ৰী যিয়ে মূলতঃ হিন্দী ভাষা আৰু তেলুগু ভাষা চলচ্চিত্ৰ আৰু টেলিভিছনত কাম কৰে। গৌৰক বালিকা বধূত আনন্দী সিং আৰু চশুৰাল চিমাৰ কাত ৰোলী দ্বিবেদী ভৰদ্বাজৰ চৰিত্ৰত কৰা অভিনয়ৰ বাবে সৰ্বাধিক জনা যায়। তেওঁ চাৰিটা ইণ্ডিয়ান টেলিভিছন একাডেমী এৱাৰ্ড আৰু এটা চাউথ ইণ্ডিয়ান ইণ্টাৰনেচনেল মুভি এৱাৰ্ড সহ কেইবাটাও সন্মান লাভ কৰিছে।^১

টেলিভিছনত শিশু শিল্পী হিচাপে কাম কৰাৰ পাছত গৌৰে হিন্দী ছবি মৰ্নিং ৱাকৰ (২০০৯) জৰিয়তে চলচ্চিত্ৰ জগতত আত্মপ্ৰকাশ কৰে। তেওঁ উইয়ালা জাম্পালা (২০১৩) ছবিৰ জৰিয়তে তেলেগু চলচ্চিত্ৰলৈ সম্প্ৰসাৰিত হয়, যাৰ বাবে তেওঁ শ্ৰেষ্ঠ নৱাগতা অভিনেত্ৰীৰ চিমা (SIIMA) বঁটা লাভ কৰে। তেওঁৰ আন কেইখনমান উল্লেখযোগ্য ছবি হ’ল— চিনেমা ছুপিস্থা মাৱা (২০১৫), কেয়াৰ অৱ ফুটপাথ ২ (২০১৫), এক্কাদিকি পোথাৱু চিন্নাৱাদা (২০১৬), ৰাজু গাৰী গাধী ৩ (২০১৯), ১৯২০: হৰৰ্ছ অৱ দা হাৰ্ট (২০২৩) আৰু ষন্মুখ (২০২৫)।

প্ৰাৰম্ভিক জীৱন

গৌৰৰ জন্ম ১৯৯৭ চনৰ ৩০ জুনত মুম্বাইৰ এটা গুজৰাটী ভাষা পৰিয়ালত হৈছিল।^২৩৪ তেওঁ মুম্বাইৰ মুলুণ্ড উপকণ্ঠৰ চেৰন ইংলিছ হাইস্কুলত পঢ়া-শুনা কৰিছিল।^৫

কেৰিয়াৰ

গৌৰে ২০০৭ চনত শশশ্ব... কই হ্যায় ধাৰাবাহিকৰ জৰিয়তে হিন্দী ভাষা টেলিভিছনত আত্মপ্ৰকাশ কৰে।^৬ তেওঁ ২০১৩ চনত উইয়ালা জাম্পালাৰ জৰিয়তে তেলেগু চলচ্চিত্ৰ জগতত (টলিউড) খোজ পেলায়^৭ আৰু এই ছবিখনৰ বাবে শ্ৰেষ্ঠ নৱাগতা অভিনেত্ৰীৰ 'চিমা' বঁটা লাভ কৰে।^৮

২০২২ চনত গৌৰে কাজাখাস্তানৰ ছবি কাজাখ বিজনেছ ইন ইণ্ডিয়াৰ জৰিয়তে কাজাখাস্তানৰ চলচ্চিত্ৰ জগতত অভিষেক ঘটায়।^৯১০ তেওঁ ছবিখনৰ স্পিন-অফ মুভি আই গো টু স্কুলতো অভিনয় কৰিছিল।^১১

২০২৫ চনত গৌৰে আদি সাইকুমাৰৰ বিপৰীতে ষন্মুখ নামৰ ছবিত এগৰাকী অনুসন্ধানকাৰী সাংবাদিকৰ চৰিত্ৰত অভিনয় কৰে।^১২ একে বছৰতে তেওঁ তেওঁৰ বাগদত্তা মিলিন্দ চান্দৱানীৰ সৈতে ৰিয়েলিটি শ্ব’ পতি-পত্নী ঔৰ পংগা – জোড়ীয়োঁ কা ৰিয়েলিটি চেকত অংশগ্ৰহণ কৰে।^১৩

ব্যক্তিগত জীৱন

গৌৰে ২০১৯ চনত সমাজকৰ্মী মিলিন্দ চান্দৱানীক লগ পায় আৰু ২০২০ চনৰপৰা তেওঁলোক প্ৰেমৰ সম্পৰ্কত আবদ্ধ হয়।^১৪ পাঁচবছৰীয়া সম্পৰ্কৰ অন্তত ২০২৫ চনৰ জুন মাহত এই যুগলৰ আঙঠি পিন্ধোৱা পৰ্ব (এংগেজমেণ্ট) সম্পন্ন হয়।^১৫১৬ ২০২৫ চনৰ ৩০ ছেপ্টেম্বৰত গৌৰে টেলিভিছন ধাৰাবাহিক পতি-পত্নী ঔৰ পংগা – জোড়ীয়োঁ কা ৰিয়েলিটি চেকৰ চেটত চান্দৱানীৰ সৈতে বিবাহপাশত আবদ্ধ হয়।^১৭১৮