অনন্ত কলিতা

অনন্ত কলিতা (Ananta Kalita) হৈছে অসম, ভাৰতৰ এগৰাকী অৰ্থনীতিবিদ, স্তম্ভ লেখক, নিবন্ধকাৰ, বাঁওপন্থী নেতা, আৰু ভাৰতীয় ষ্টেট বেংকৰ ভূতপূৰ্ব সঞ্চালক ৷ ^১২৩ ডাক আৰু তাঁৰ সেৱাৰ জৰিয়তে কৰ্মজীৱনৰ পাতনি মেলি পৰৱৰ্তী সময়ত ভাৰতীয় ষ্টেট বেংকত যোগদান কৰা অনন্ত কলিতাই অৰ্থনীতি আৰু সামাজিক বিষয়ত একাধিক নিবন্ধ লিখি অসমৰ অ-কাহিনীমূলক সাহিত্যলৈ বিশিষ্ট বৰঙণি আগবঢ়াইছে। ৰাজনৈতিক দল চিপিআই(এম)ৰ সংস্পৰ্শলৈ অহা কলিতাই অসমৰ অন্ধবিশ্বাস-বিৰোধী অনুষ্ঠান ইলোৰা বিজ্ঞান মঞ্চৰ প্ৰতিষ্ঠাতো আগভাগ লৈছিল। ^৪

কৰ্মজীৱন

অনন্ত কলিতাই জন্ম লাভ কৰিছিল অসমৰ নলবাৰী জিলাৰ বৰভাগ অঞ্চলৰ কমাৰকুচিত ৷ আনুষ্ঠানিক শিক্ষা শেষ কৰি কলিতাই ডাক আৰু তাঁৰ সেৱাত যোগদান কৰে৷ ^৪১৯৭২ চনত উক্ত পদ ত্যাগ কৰি তেখেতে ষ্টেট বেংক অৱ ইণ্ডিয়াত নতুন কৰ্মজীৱনৰ পাতনি মেলে৷ ১৯৮৬ চনৰ পৰা ১৯৮৯ চনলৈকে তেখেত বেংকটোৰ কৰ্মচাৰী সন্থাৰ সভাপতি পদত অধিষ্ঠিত হৈছিল৷ ১৯৮৯ চনৰ পৰা ২০০৮ চন পৰ্যন্ত তেখেতে সন্থাৰ সাধাৰণ সম্পাদকৰ দায়িত্ব পালন কৰে৷ ষ্টেট বেংকৰ কৰ্মচাৰী আন্দোলনৰ লগত তেখেত এইদৰেই জড়িত হৈছিল৷ ^১

ষ্টেট বেংকৰ লগত জড়িত হৈ থকাৰ সময়ছোৱাত তেখেতে ভিতৰুৱা একাধিক অঞ্চলত বেংকৰ শাখা প্ৰতিষ্ঠা কৰাত গুৰুত্বপূৰ্ণ ভূমিকা লৈছিল৷ কৰ্মচাৰীৰ বাবে কো-অপাৰেটিভ ছ'ছাইটি বা সমবায় সমাজ খোলাতো কলিতাই আগভাগ লৈছিল৷ ^৪

২০০১ চনত তেখেতে ভাৰতীয় ষ্টেট বেংকৰ সঞ্চালক পদ লাভ কৰে আৰু পৰৱৰ্তী আঠটা বছৰ অৰ্থাৎ ২০০৮ চনলৈকে তেখেত উক্ত পদত কৰ্মৰত হৈ থাকে৷ তেখেত ৰাজনীতিৰ প্ৰতিও আকৰ্ষিত হৈছিল আৰু ১৯৬৮ চনত তেখেতে চিপিআই(এম)ৰ লগত সংযুক্ত হয়৷ ^৫১৩তেখেত চিপিআই(এম)ৰ অসম ৰাজ্যিক সমিতিৰ প্ৰাক্তন সদস্য আছিল৷ ^৬

অনন্ত কলিতা ইলোৰা বিজ্ঞান মঞ্চৰ প্ৰতিষ্ঠাৰ লগত জড়িত হৈছিল।^৪৫

লেখক জীৱন

এগৰাকী লেখক হিচাপে অনন্ত কলিতাই অসমীয়া অ-কাহিনীমূলক সাহিত্যলৈ অৱদান আগবঢ়াই থৈ গৈছে ৷ ১৯৭৩ চনতে^৩ তেখেতে নতুন পৃথিৱীৰ পাতত লেখক জীৱন আৰম্ভ কৰে৷ অৰ্থনীতিৰ লগত জড়িত হৈ থকা হেতুকে তেখেতে সাধাৰণ পাঠকৰ উপযোগী হোৱাকৈ অৰ্থনীতি-সম্পৰ্কীয় একাধিক প্ৰবন্ধ-নিবন্ধ লিখিছিল৷ ২০০৮ চনত চাকৰিৰ পৰা অৱসৰ লোৱাৰ পাছত তেখেত অসমীয়া কাকত-আলোচনীত নিয়মীয়াকৈ অৰ্থনীতি আৰু সামাজিক বিষয়ত লেখা-মেলা আৰম্ভ কৰে৷ অনন্ত কলিতা নতুন সাহিত্য পৰিষদৰ সভাপতি হৈছিল৷ পৰিষদৰ কলগাছিয়াৰ অধিৱেশনত তেখেতে সভাপতি হিচাপে কাৰ্যনিৰ্বাহ কৰে৷^৫ তেখেতৰ দ্বাৰা লিখিত দুখনমান গ্ৰন্থ^১ হৈছে:

• সমকালীন অৰ্থনীতিঃ বিকল্পৰ অন্বেষণ (দুটা খণ্ডত),
• অসম আৰু অসমৰ জাতীয় সমস্যা,
• নব্য উদাৰ অৰ্থনীতিঃ বিকল্প অন্বেষণ,
• বিশ্বায়িত সমাজখনৰ ভিন্ন চিন্তা,
• আমি হিন্দু নে মুছলমান নে অসমীয়া?
• বিশ্বায়নৰ আলোকত অৰ্থনীতি আৰু সমাজ
• বিশ্বায়ন প্ৰভাৱিত সমাজখন
• অসমৰ অৰ্থনীতিৰ সমস্যাঃ সম্ভাৱনা

মৃত্যু

২০২৩ চনৰ ২৭ আগষ্ট তাৰিখে ৭৬ বছৰ বয়সত অনন্ত কলিতাৰ এখন ব্যক্তিগত চিকিৎসালয়ত দেহাৱসান ঘটে৷ তেখেত ৰক্তজনিত কৰ্কট ৰোগত^৬৪ আক্ৰান্ত হৈ আছিল৷ গুৱাহাটীৰ নৱগ্ৰহ শ্মশানত তেখেতৰ শেষকৃত্য সম্পন্ন হয়৷^৩