ৰেনী কুজুৰ

ৰেনী কুজুৰ (ইংৰাজী ভাষা: Renee Kujur; জন্ম: ১৯৮৫) এগৰাকী ভাৰতীয় ফেশ্বন মডেল।^১ তেওঁক আন্তঃৰাষ্ট্ৰীয় ৰিদম এণ্ড ব্লুজ (R&B) গায়িকা ৰিহানাৰ সদৃশ মুখাৱয়বৰ (doppelganger) বাবে জনা যায়।^২ তেওঁক ৰিহানা ২.০ বা ভাৰতৰ নিজা ৰিহানা বুলিও কোৱা হয়।^৩৪

ব্যক্তিগত জীৱন

ৰেনী কুজুৰৰ জন্ম ১৯৮৫ চনত ভাৰতৰ ছত্তীছগঢ় ৰাজ্যৰ যশপুৰ জিলাৰ বাগিছা তহচিলৰ পিৰাই গাঁৱত এটা কুৰুখ আদিবাসী (অনুসূচিত জনজাতি) পৰিয়ালত হৈছিল।^৫ তেওঁ নিজৰ ছালৰ বৰণ আৰু শাৰীৰিক গঠনৰ বাবে কুসংস্কাৰ আৰু সমালোচনাৰ সন্মুখীন হৈছিল।^৬

যেতিয়া তেওঁৰ বয়স মাত্ৰ ৩ বছৰ আছিল, তেওঁ স্কুলত এখন ফেঞ্চি ড্ৰেছ প্ৰতিযোগিতাত পৰীৰ সাজত অংশগ্ৰহণ কৰিছিল আৰু তেতিয়া সহপাঠীসকলে তেওঁক 'কলা-পৰী' বুলি জোকাইছিল। এই ঘটনাই ৩বছৰীয়া শিশুটোৰ মনত গভীৰ প্ৰভাৱ পেলাইছিল।^৭ কিশোৰী অৱস্থাত তেওঁক 'কালী' বুলি মাতিছিল।^৮ তেওঁ টমী হিলফিগাৰ ষ্ট’ৰত বিক্ৰী কৰ্মী হিচাপে কাম কৰিবলৈ আৰম্ভ কৰিছিল, য’ত মানুহে লক্ষ্য কৰিছিল যে তেওঁক দেখিবলৈ ৰিহানাৰ দৰে।^৯ যেতিয়া তেওঁ ৰিহানাৰ সৈতে থকা তেওঁৰ সাদৃশ্যৰ কথা অনুভৱ কৰিলে, তেতিয়া তেওঁৰ বাবে পৰিস্থিতি সলনি হ’ল।^১০ তেওঁ প্ৰকাশ কৰে যে যিদিনা তেওঁ নিজৰ আদৰ্শ ৰিহানাক লগ পাব, সেইদিনাই তেওঁৰ যাত্ৰা সম্পূৰ্ণ হ’ব।^১১

কৰ্মজীৱন

ৰেনী কুজুৰে নতুন দিল্লীৰ মালৱীয় নগৰত এগৰাকী মডেল হিচাপে কাম কৰে।^১২ ৰিহানাৰ সৈতে থকা তেওঁৰ আচৰিত ধৰণৰ সাদৃশ্যৰ ছবিবোৰে তেওঁক ইণ্টাৰনেটত চাঞ্চল্যৰ সৃষ্টি কৰিছিল।^১৩ তেওঁ ছেটিন মডেলছ ইণ্ডিয়াৰ হৈ কাম কৰে আৰু পাম মেহতা, চেতন চিলাৰ আৰু বিজয় বালহাৰাৰ দৰে ডিজাইনাৰৰ সৈতে কাম কৰিছে। তেওঁ ইণ্ডিয়া ৰাণৱে উইক আৰু এছিয়ান ডিজাইনাৰ উইকৰ ৰেম্পত খোজ দিছে। তেওঁ ৰীবক আৰু নিফ্টৰ দৰে ব্ৰেণ্ডৰ বাবে মডেলিং কৰিছিল।^১৪ ২০১৮ চনৰ ইণ্ডিয়া কুটিৰ উইকৰ গালাত ফেশ্বন ডিজাইন কাউন্সিল অৱ ইণ্ডিয়াৰ দ্বাৰা তেওঁক সম্বৰ্ধনা জনোৱা হৈছিল।^১৫ তেওঁ বিশ্বজুৰি ক'লা বৰণৰ মডেলসকলৰ বিৰুদ্ধে হোৱা বৈষম্যৰ বিৰুদ্ধে যুঁজ দি আছে।^১৬ ২০১৯ চনত তেওঁ ভাৰতৰ মডেলিং প্ৰতিযোগিতা এমটিভি ছুপাৰমডেল অৱ দা য়েৰৰ প্ৰথম ছিজনত অংশগ্ৰহণ কৰিছিল।^১৭

বাহ্যিক সংযোগ

• Indian Rihanna: Renee Kujur’s journey from flout to ‘Indian Rihanna’.