স্নেহ ৰাণা

স্নেহ ৰাণা (ইংৰাজী ভাষা: Sneh Rana; জন্ম: ১৮ ফেব্ৰুৱাৰী ১৯৯৪) এজন ভাৰতীয় আন্তঃৰাষ্ট্ৰীয় ক্ৰিকেটাৰ৷^১ তেওঁ মহিলা জাতীয় দলৰ হৈ সোঁহাতৰ অফ ব্ৰেক বলাৰ আৰু সোঁহাতৰ বেটছমেন হিচাপে খেলে। ৰাণাই ঘৰুৱা ক্ৰিকেটত ৰেলৱে আৰু মহিলা প্ৰিমিয়াৰ লীগত দিল্লী কেপিটেলছক প্ৰতিনিধিত্ব কৰে।^২ ২০২৫ চনৰ মহিলা ক্ৰিকেট বিশ্বকাপ আৰু ২০২২ চনৰ মহিলা এছিয়া কাপ জয় কৰা ভাৰতীয় দলৰ অংশ আছিল।

প্ৰাৰম্ভিক জীৱন

ৰানাৰ ঘৰ দেৰাডুনৰ চিনাউলাত।^৩ তেওঁৰ দেউতা এজন কৃষক।^৪

আন্তঃৰাষ্ট্ৰীয় কেৰিয়াৰ

২০১৪ চনত তেওঁ শ্ৰীলংকাৰ বিৰুদ্ধে মহিলা এদিনীয়া আন্তঃৰাষ্ট্ৰীয় (WODI) আৰু মহিলা টি২০ আন্তঃৰাষ্ট্ৰীয় (WT20I)ত অভিষেক কৰে।^৫

২০১৬ চনত আঁঠুৰ আঘাত পোৱাৰ পিছত তেওঁ জাতীয় দলৰ পৰা বাহিৰে থাকিবলগীয়া হয় আৰু পিছৰ পাঁচ বছৰলৈ আন্তঃৰাষ্ট্ৰীয় ক্ৰিকেট খেলিব নোৱাৰিলে।^৬ এই সময়ছোৱাত তেওঁ ঘৰুৱা ক্ৰিকেট খেলাৰ লগতে ইণ্ডিয়া বি দলৰ হৈও খেলিছিল।

মে’ ২০২১ত ইংলেণ্ড মহিলা দলৰ বিৰুদ্ধে একমাত্ৰ টেষ্ট খেলখনৰ বাবে ভাৰতৰ টেষ্ট দলত তেওঁ অন্তৰ্ভুক্ত হয়।^৭ ১৬ জুন ২০২১ তাৰিখে ইংলেণ্ডৰ বিৰুদ্ধে তেওঁ টেষ্ট অভিষেক কৰে।^৮৯

জানুৱাৰী ২০২২ত নিউজিলেণ্ডত অনুষ্ঠিত ২০২২ চনৰ মহিলা ক্ৰিকেট বিশ্বকাপৰ বাবে ভাৰতৰ দলত তেওঁ স্থান লাভ কৰে।^১০ জুলাই ২০২২ত ইংলেণ্ডৰ বাৰ্মিংহামত অনুষ্ঠিত ২০২২ চনৰ কমনৱেলথ গেমছৰ ক্ৰিকেট প্ৰতিযোগিতাৰ বাবেও ভাৰতৰ দলত তেওঁ অন্তৰ্ভুক্ত হয়।^১১

২০২৪ চনত চেপাকত দক্ষিণ আফ্ৰিকা মহিলা দলৰ বিৰুদ্ধে অনুষ্ঠিত একমাত্ৰ টেষ্টত ৰাণাই প্ৰথমবাৰৰ বাবে পাঁচ উইকেট লাভ কৰে আৰু টেষ্ট ক্ৰিকেটত দহ উইকেট লাভ কৰা দ্বিতীয়গৰাকী মহিলা স্পিনাৰ আৰু প্ৰথমগৰাকী ভাৰতীয় স্পিনাৰ হিচাপে পৰিগণিত হয়।^{১২১৩১৪১৫}

২৯ এপ্ৰিল ২০২৫ তাৰিখে শ্ৰীলংকাত অনুষ্ঠিত ত্ৰিদেশীয় শৃংখলাত দক্ষিণ আফ্ৰিকাৰ বিৰুদ্ধে ৰাণাই মহিলা এদিনীয়া আন্তঃৰাষ্ট্ৰীয়ত প্ৰথমবাৰৰ বাবে পাঁচ উইকেট লাভ কৰে।^১৬