শ্বেতা তিৱাৰী

শ্বেতা তিৱাৰী (জন্ম: ৪ অক্টোবৰ ১৯৮০) (ইংৰাজী ভাষা: Shweta Tiwari) এগৰাকী ভাৰতীয় অভিনেত্ৰী, যিয়ে মূলতঃ হিন্দী ভাষা টেলিভিছনত কাম কৰে।^১ টেলিভিছনৰ এগৰাকী সৰ্বাধিক পাৰিতোষিক পোৱা অভিনেত্ৰী তিৱাৰীয়ে কছৌটী জিন্দগী কে ধাৰাবাহিকত প্ৰেৰণা শৰ্মাৰ চৰিত্ৰত কৰা অভিনয়ৰ বাবে ব্যাপকভাৱে পৰিচিত।^২ ২০১০ চনত তেওঁ বিগ বছ ৪ত অংশগ্ৰহণ কৰি বিজয়ী হিচাপে পৰিগণিত হয় আৰু ইয়াৰ জৰিয়তে এই শৃংখলাটোৰ প্ৰথমগৰাকী মহিলা বিজয়ী হিচাপে পৰিগণিত হয়।^৩৪

তিৱাৰীয়ে আন কেইবাখনো টেলিভিছন ধাৰাবাহিকত কাম কৰিছে আৰু তেওঁ পৰৱৰিছত ছুইটী আহলুৱালিয়া, বেগুচৰাইত বিন্দিয়া ঠাকুৰ, মেৰে ড্যাড কী দুলহানত গুনীত ছিক্কা শৰ্মা আৰু মেই হুঁ অপৰাজিতাত অপৰাজিতা সিঙৰ চৰিত্ৰত অভিনয় কৰাৰ বাবে জনাজাত। তেওঁ অংশগ্ৰহণ কৰা আন আন ৰিয়েলিটি শ্ব’সমূহৰ ভিতৰত নাচ বলিয়ে, ঝলক দিখলা যা আৰু ফিয়েৰ ফেক্টৰ: খতৰো কে খিলাড়ী অন্যতম।^৫

জীৱন আৰু পৰিয়াল

তিৱাৰীৰ জন্ম হৈছিল ১৯৮০ চনৰ ৪ অক্টোবৰত উত্তৰ প্ৰদেশৰ প্ৰতাপগড়ত।^১৬

১৯৯৮ চনত তিৱাৰীয়ে অভিনেতা ৰাজা চৌধুৰীৰ সৈতে বিবাহপাশত আৱদ্ধ হয় আৰু ২০০০ চনৰ ৮ অক্টোবৰত তেওঁলোকৰ কন্যা পলক তিৱাৰীৰ জন্ম হয়।^৭ ন বছৰীয়া বৈবাহিক জীৱনৰ অন্তত ২০০৭ চনত তেওঁ বিবাহ বিচ্ছেদৰ বাবে আৱেদন কৰে।^৮ তিৱাৰীয়ে জনোৱা মতে চৌধুৰীৰ মদ্যপান আৰু ঘৰুৱা হিংসাৰ বাবে তেওঁলোকৰ সম্পৰ্কত সমস্যাই দেখা দিছিল। তেওঁ অভিযোগ কৰিছিল যে চৌধুৰীয়ে তেওঁক প্ৰতিদিনে মাৰপিট কৰিছিল। আনকি তেওঁৰ শ্বুটিঙৰ চেটলৈকো গৈ তেওঁ দুৰ্ব্যৱহাৰ কৰিছিল।^৯ ২০১২ চনত তেওঁলোকৰ বিবাহ বিচ্ছেদ সম্পন্ন হয়।^১০

তিনি বছৰ ধৰি প্ৰেমৰ সম্পৰ্কত থকাৰ পিছত ২০১৩ চনৰ ১৩ জুলাইত তিৱাৰী আৰু অভিনেতা অভিনৱ কোহলী বিবাহপাশত আৱদ্ধ হয়।^১১১২ ২০১৬ চনৰ ২৭ নৱেম্বৰত তেওঁলোকৰ পুত্ৰ ৰেয়াংশ কোহলীৰ জন্ম হয়।^১১১৩ ২০১৭ চনত তেওঁলোকৰ দাম্পত্য জীৱনত সমস্যাৰ সৃষ্টি হোৱা বুলি প্ৰথম খবৰ ওলাইছিল।^১৪ ২০১৯ চনৰ আগষ্ট মাহত তেওঁ কোহলীৰ বিৰুদ্ধে ঘৰুৱা হিংসাৰ গোচৰ ৰুজু কৰে আৰু তেওঁক আৰু তেওঁৰ কন্যাক হাৰাশাস্তি কৰাৰ অভিযোগ উত্থাপন কৰে। ইয়াৰ পিছতে কোহলী আৰক্ষীৰ জিম্মাত লৈ যোৱা হয়।^১৫১৬ ২০১৯ চনত তিৱাৰী আৰু কোহলী পৃথক হয়।^১৭১৮

কৰ্মজীৱন

তিৱাৰীয়ে ২০০০ চনত আনে ৱালা পলৰ জৰিয়তে অভিনয় জীৱনৰ পাতনি মেলে। ইয়াৰ পিছত কছৌটী জিন্দগী কেৰ জৰিয়তে তেওঁৰ কেৰিয়াৰত এক বৃহৎ সফলতা আহে, যিখন তেওঁৰ আটাইতকৈ উল্লেখযোগ্য কৃতি হিচাপে পৰিগণিত হয়। ২০০১ চনৰ পৰা ২০০৮ চনলৈকে তেওঁ চেজান খান, হিতেন তেজৱানী আৰু ৰনিট ৰয়ৰ বিপৰীতে প্ৰেৰণা শৰ্মাৰ চৰিত্ৰত অভিনয় কৰিছিল।^১৯২০ ধাৰাবাহিকখন সফল হৈছিল আৰু ইয়াৰ বাবে তেওঁ দুটাকৈ 'ইণ্ডিয়ান টেলী বঁটা: শ্ৰেষ্ঠ মুখ্য অভিনেত্ৰী'কে ধৰি কেইবাটাও বঁটা আৰু মনোনয়ন লাভ কৰিবলৈ সক্ষম হৈছিল।^২১২২

ইয়াৰ পিছত তিৱাৰীয়ে কেইবাখনো হিন্দী, ভোজপুৰী আৰু অন্যান্য ভাষাৰ চলচ্চিত্ৰত অভিনয় কৰে। ইয়াৰে কেইখনমান হ’ল: আব্ৰা কা ডাব্ৰা (২০০৪), হমাৰ চাইয়াঁ হিন্দুস্তানী (২০০৮), আপনী বোলী আপনা দেশ (২০০৯) আৰু বিন বুলায়ে বাৰাতী (২০১১)।^২৩২৪ ২০১৪ চনত তিৱাৰীয়ে পাকিস্তানৰ ছবি চুলতানাটতো অভিনয় কৰিছিল।^২৫

তিৱাৰীয়ে বিগ বছ ৪ত অংশগ্ৰহণ কৰি বিজয়ী হিচাপে পৰিগণিত হয় আৰু ইয়াৰ জৰিয়তে এই ৰিয়েলিটি শ্ব’টোৰ প্ৰথমগৰাকী মহিলা বিজয়ীৰ সন্মান অৰ্জন কৰে।^২৬২৭ ইয়াৰ পিছত তিৱাৰীয়ে বিবেক মুছৰানৰ বিপৰীতে পৰৱৰিছ – কুছ খট্টী কুছ মিঠীত ছুইটী কৌৰ খান্না আহলুৱালিয়া, সৰ্তাজ গিলৰ বিপৰীতে বেগুচৰাইত বিন্দিয়া "মা ঠাকুৰাইন" ঠাকুৰ, বৰুণ বাডোলাৰ বিপৰীতে মেৰে ড্যাড কী দুলহানত গুনীত ছিক্কা শৰ্মা আৰু মানৱ গোহিলৰ বিপৰীতে মেই হুঁ অপৰাজিতাত অপৰাজিতা সিঙৰ চৰিত্ৰত অভিনয় কৰে।^{২৮২৯৩০৩১} কছৌটী জিন্দগী কে, পৰৱৰিছ, বেগুচৰাই আৰু মেৰে ড্যাড কী দুলহানত কৰা অভিনয়ৰ বাবে তেওঁ পাঁচবাৰকৈ 'আইটিএ বঁটা: শ্ৰেষ্ঠ অভিনেত্ৰী (জুৰী)' লাভ কৰে।^৩২

২০১৯ চনত হাম তুম এণ্ড দেমৰ জৰিয়তে তিৱাৰীয়ে ৱেবত আত্মপ্ৰকাশ কৰে। ২০২৪ চনত তেওঁ ইণ্ডিয়ান পুলিচ ফৰ্চ শৃংখলাত বিবেক ওবেৰয়ৰ বিপৰীতে এগৰাকী আৰক্ষী বিষয়াৰ পত্নীৰ চৰিত্ৰত অভিনয় কৰে।^৩৩ একে বছৰতে তেওঁ সিংঘম এগেইন বোলছবিখনত এগৰাকী আৰক্ষী বিষয়াৰ চৰিত্ৰত অভিনয় কৰে।^৩৪ বক্স অফিচত সফলতা অৰ্জন কৰা এই ছবিখন সেই বছৰৰ সপ্তম সৰ্বাধিক উপাৰ্জনকাৰী ভাৰতীয় ছবি হিচাপে পৰিগণিত হয়।^৩৫

সংবাদ মাধ্যমত

তিৱাৰীক টেলিভিশ্যনৰ সৰ্বাধিক পাৰিতোষিক পোৱা অভিনেত্ৰীসকলৰ ভিতৰত অন্যতম বুলি গণ্য কৰা হয়।^৩৬৩৭ ৰীডিফ ডট কম-এ তেওঁক টেলিভিশ্যনৰ অন্যতম আকৰ্ষণীয় অভিনেত্ৰী হিচাপে অভিহিত কৰিছে।^৩৮ তেওঁৰ চৰিত্ৰ প্ৰেৰণা শৰ্মাক টেলিভিশ্যনৰ আটাইতকৈ শক্তিশালী মহিলা চৰিত্ৰসমূহৰ ভিতৰত অন্যতম হিচাপে স্বীকৃতি দিয়া হয়।^৩৯ ২০২৩ চনত তেওঁ টাইমছ নাওৰ "জনপ্ৰিয় টেলিভিছন অভিনেত্ৰী"ৰ তালিকাত প্ৰথম স্থান লাভ কৰিছিল।^৪০

স্বীকৃতি

তিৱাৰীয়ে আঠটা ইণ্ডিয়ান টেলিভিছন একাডেমী বঁটা, নটা ইণ্ডিয়ান টেলী বঁটা আৰু দুটা গ'ল্ড বঁটাকে ধৰি কেইবাটাও স্বীকৃতি লাভ কৰিছে।^৪১৪২