শাঙ্গো উৎসৱ

শাঙ্গো উৎসৱ হৈছে য়োৰুবা জনগোষ্ঠীৰ মাজত বছৰি উদ্‌যাপন কৰা এটা ধৰ্মীয়-সাংস্কৃতিক উৎসৱ। এই উৎসৱ শাঙ্গোৰ সন্মানত পালন কৰা হয়, যি আছিল বজ্ৰ আৰু অগ্নিৰ দেৱতা তথা অয়ো সাম্ৰাজ্যৰ তৃতীয় ৰজা। তেওঁ নিজৰ জ্যেষ্ঠ ভাতৃ আজাকাৰ পাছত সিংহাসনত আৰোহণ কৰিছিল।^১ ২০১৩ চনত অয়ো ৰাজ্য চৰকাৰৰদ্বাৰা এই উৎসৱৰ নাম বিশ্ব শাঙ্গো উৎসৱ (World Sango Festival) হিচাপে পৰিৱৰ্তন কৰা হয়। সাধাৰণতে আগষ্ট মাহত অয়ো আলাফিনৰ ৰাজপ্ৰাসাদত এই উৎসৱ অনুষ্ঠিত হয় আৰু বিশ্বৰ চল্লিশখনৰো অধিক দেশত ইয়াৰ উদ্‌যাপন কৰা হয়।^২

ইতিহাস

শাঙ্গো উৎসৱৰ ইতিহাস প্ৰায় ১,০০০ বছৰৰো অধিক পুৰণি বুলি ধৰা হয়। শাঙ্গো আছিল এজন জনপ্ৰিয় য়োৰুবা ওৰিশা যাক অয়ো জনগোষ্ঠীৰ প্ৰতিষ্ঠাপক পিতৃ হিচাপে গণ্য কৰা হয়।^৩

শাঙ্গো এজন শক্তিশালী শাসক আৰু যাদুকৰ আছিল। তেওঁৰ জ্যেষ্ঠ ভাতৃ আজাকাক দুৰ্বল শাসক বুলি ধৰা হোৱাৰ পাছত শাঙ্গো অয়ো সাম্ৰাজ্যৰ ৰজা হয়। আজাকা জনবিশ্বাস অনুসৰি, শাঙ্গোৰ শাসনকালত অয়ো সাম্ৰাজ্যত সমৃদ্ধি বৃদ্ধি পাইছিল। বিভিন্ন পৌৰাণিক কাহিনীত শাঙ্গোৰ মৃত্যুক তেওঁৰ ৰাজপ্ৰাসাদত বজ্ৰপাতৰ ফলত হোৱা ধ্বংসৰ সৈতে সম্পৰ্কিত কৰা হয়।^৪

শাঙ্গোৱে কেৱল সাত বছৰ অয়োৰ ৰজা হিচাপে শাসন কৰিছিল যদিও তেওঁক অয়োৰ ইতিহাসৰ সৰ্বশ্ৰেষ্ঠ ৰজা হিচাপে গণ্য কৰা হয়।^৫

২০২১ চনৰ উৎসৱৰ সময়ত ৰাণীসকলে (আয়াবা) দাবী কৰে যে তেওঁলোকে য়েমোজা আৰু শাঙ্গোৰ পুৰোহিতৰ সৈতে পৰামৰ্শ কৰি বৰষুণ ৰোধ কৰিবলৈ সক্ষম হৈছিল। উৎসৱৰ আৰম্ভণি সাধাৰণতে ইৱুৰে আগবা অৰ্থাৎ বয়োজ্যেষ্ঠসকলৰ প্ৰাৰ্থনাৰে কৰা হয়।^৬

গুৰুত্ব

বিশ্ব শাঙ্গো উৎসৱ আগষ্ট মাহত প্ৰায় এহাজাৰ দিন ধৰি অনুষ্ঠিত হয় আৰু ইয়াত বিশ্বজুৰি ২০,০০০ৰো অধিক দৰ্শকৰ সমাগম হয়। ইয়াত ব্ৰাজিল, কিউবা, ট্ৰিনিদাদ আৰু টোবাগো আৰু কেৰিবিয়ান অঞ্চলৰ লোকো অংশগ্ৰহণ কৰে।^৭

এই উৎসৱ ৰাষ্ট্ৰসংঘ শিক্ষা, বিজ্ঞান আৰু সংস্কৃতি সংস্থাৰদ্বাৰা স্বীকৃত আৰু য়োৰুবা প্ৰবাসীসকলক নিজ ভূমিলৈ উভতি আহিবলৈ উৎসাহিত কৰাৰ লগতে য়োৰুবা ইতিহাসৰ সৰ্বশ্ৰেষ্ঠ নায়ক শাঙ্গোৰ স্মৰণৰ উদ্দেশ্যে আয়োজন কৰা হয়।^৮

শাঙ্গো উৎসৱৰ উদ্‌যাপন পদ্ধতি

শাঙ্গো উৎসৱ সাধাৰণতে ১০ দিন ধৰি উদ্‌যাপন কৰা হয়। উৎসৱৰ সময়ত ভক্ত আৰু পৰ্যটকসকলে ৰঙীন পোছাক পিন্ধি আনন্দত অংশগ্ৰহণ কৰে। সাধাৰণতে বগা অথবা ৰঙা কাপোৰ পিন্ধা দেখা যায়। উৎসৱৰ মুখ্য কাৰ্যসূচীৰ ভিতৰত আছে—আয়ো খেল প্ৰতিযোগিতা, ওগুন আজোবো দিৱস, ওয়া দিৱস, আজে ওলোজা দিৱস, য়েমোজা দিৱস, এছিন এলেজো দিৱস আৰু শাঙ্গো অয়ো দিৱস।^১

অধিক পঢ়ক

• Karin Barber. (1993). I Could Speak Until Tomorrow. Edinburgh University Press
• Ayobunmi Sosi Sangode. (1996). The Cult of Sango. Athelia Henrietta Press
• Rosalind I. J. Hackett. (1996). Art and religion in Africa. Cassell