লি ঝাওপিং

লি ঝাওপিং (চীনা ভাষা: 李兆平; জন্ম ১৯৬৪) এগৰাকী চীনা গণনামূলক স্নায়ুবিজ্ঞানী। তেওঁ বৰ্তমানে জাৰ্মানীৰ ট্যুবিংগেন বিশ্ববিদ্যালয়ত অধ্যাপিকা আৰু মেক্স প্লাংক ইনষ্টিটিউট ফৰ বায়’লজিকেল চাইবাৰনেটিক্সত ইন্দ্ৰিয় আৰু সেন্সৰিমটৰ ব্যৱস্থা বিভাগৰ মুৰব্বী হিচাপে কৰ্মৰত। দৃষ্টিগ্ৰহণৰ স্নায়ুবৈজ্ঞানিক ভিত্তিৰ ওপৰত কৰা তেওঁৰ গৱেষণাই বিশেষকৈ প্ৰাথমিক দৃশ্য কৰ্টেক্সৰ ভূমিকা সম্পৰ্কে নতুন তত্ত্ব আগবঢ়াইছে। তেওঁ প্ৰস্তাৱ কৰা ভি১ চেলিয়েন্সি হাইপ’থেছিছ অনুসাৰে প্ৰাথমিক দৃশ্য কৰ্টেক্সেই দৃশ্য ক্ষেত্ৰৰ গুৰুত্বপূৰ্ণ অংশসমূহ চিহ্নিত কৰি দৃষ্টি-আকৰ্ষণ আৰু চকুৰ গতি নিৰ্দেশ কৰে।^১

শিক্ষা

লি ঝাওপিংয়ে ১৯৮৪ চনত সাংহাইস্থিত ফুদান বিশ্ববিদ্যালয়ৰ পৰা পদাৰ্থবিজ্ঞানত স্নাতক ডিগ্ৰী লাভ কৰে।^২ ১৯৮৪ চনৰ পৰা ১৯৮৯ চনলৈ তেওঁ কেলিফৰ্ণিয়া ইনষ্টিটিউট অৱ টেকন’লজিত পদাৰ্থবিজ্ঞানত পিএইচডি অধ্যয়ন কৰে।^৩ তেওঁৰ পিএইচডি উপদেষ্টা আছিল জন জে. হপফিল্ড।^৪

কৰ্মজীৱন

ফাৰ্মিলেবত সংক্ষিপ্ত সময় অতিবাহিত কৰাৰ পিছত, ১৯৯০ চনৰ পৰা ১৯৯২ চনলৈ লি ঝাওপিং প্ৰিন্সটনৰ ইনষ্টিটিউট ফৰ এডভান্সড ষ্টাডিৰ সদস্য আছিল।^৫ তাৰ পিছত ১৯৯২ চনৰ পৰা ১৯৯৪ চনলৈ তেওঁ ৰকফেলাৰ বিশ্ববিদ্যালয়ত পষ্টডক্টৰেল ফেল’ হিচাপে কৰ্মৰত আছিল।

১৯৯৮ চনত লি ঝাওপিংয়ে জেফ্ৰি হিন্টন আৰু পিটাৰ ডেয়ানৰ সৈতে একেলগে ইউনিভাৰ্চিটি কলেজ লণ্ডনত গেটছবি গণনামূলক স্নায়ুবিজ্ঞান ইউনিট সহ-প্ৰতিষ্ঠা কৰে।^৬৭

বৰ্তমানে লি ঝাওপিং ট্যুবিংগেন বিশ্ববিদ্যালয়ত অধ্যাপিকা হিচাপে কৰ্মৰত।^৮ তেওঁ মেক্স প্লাংক ইনষ্টিটিউট ফৰ বায়’লজিকেল চাইবাৰনেটিক্সত ইন্দ্ৰিয় আৰু সেন্সৰিমটৰ ব্যৱস্থা বিভাগৰ মুৰব্বী হিচাপেও কৰ্মৰত।^৯

ব্যক্তিগত জীৱন

মেক্স প্লেংক ইনষ্টিটিউট ফৰ বায়'লজিকেল চাইবাৰনেটিক্সৰ পৰিচালক অধ্যাপক পিটাৰ দয়ানৰ সৈতে তেওঁৰ বিবাহ হয়৷

গৱেষণা আৰু তত্ত্ব

লি ঝাওপিং ভি১ চেলিয়েন্সি হাইপ’থেছিছ (ভি১এছএইচ; উচ্চাৰণ ‘ভিশ’)ৰ সৃষ্টিকৰ্তা হিচাপে পৰিচিত। এই তত্ত্ব অনুসাৰে প্ৰাইমেট প্ৰাণীৰ প্ৰাথমিক দৃশ্য কৰ্টেক্স (ভি১) এ দৃশ্য ক্ষেত্ৰৰ এক চেলিয়েন্সি মানচিত্ৰ সৃষ্টি কৰে, যিয়ে বহিঃউৎপন্নভাৱে দৃষ্টি-আকৰ্ষণ বা চকুৰ গতি নিৰ্দেশ কৰে।^১০১১

১৯৯০-দশকৰ শেষভাগত প্ৰস্তাৱ কৰা ভি১এছএইচ প্ৰথমতে জনপ্ৰিয় নাছিল, কিয়নো এইটো মগজুৰ ফ্ৰণ্টাল আৰু পেৰিয়েটাল অংশসমূহেই চেলিয়েন্সি মানচিত্ৰৰ দায়িত্ব লয় বুলি চলি থকা মুখ্য আৰু জনপ্ৰিয় ধাৰণাৰ বিপৰীত আছিল।^১২ পিছলৈ ভি১এছএইচ-এ অধিক প্ৰায়োগিক সমৰ্থন লাভ কৰাৰ লগে লগে^{১৩১৪১৫} লি ঝাওপিং আন্তঃৰাষ্ট্ৰীয় সন্মিলনত মূল ভাষণ বা আমন্ত্ৰিত বক্তৃতাৰ বাবে অধিক আমন্ত্ৰিত হ’বলৈ আৰম্ভ কৰে।^{১৬১৭১৮১৯২০২১২২২৩} আৰু এই তত্ত্বটো অপ্ৰিয় অৱস্থাৰ পৰা বিতৰ্কিত অৱস্থালৈ উন্নীত হয়। কিছুমানে এই তত্ত্বৰ পক্ষে প্ৰায়োগিক তথ্য প্ৰকাশ কৰিছে,^{২৪২৫২৬২৭২৮২৯৩০} আনহাতে কিছুমানে ইয়াৰ বিপক্ষে প্ৰমাণ আগবঢ়াইছে।^৩১

যদি ভি১এছএইচ সঠিক বুলি ধৰা হয়, তেন্তে আমাৰ মগজুৱে দৃষ্টিসমস্যা কেনেকৈ সমাধান কৰে সেয়া বুজিবলৈ ব্যৱহৃত ধাৰণাগত কাঠামো যথেষ্ট পৰিমাণে সলনি কৰিব লাগিব বুলি কোৱা হয়। এই দৃষ্টিভংগীক কেন্দ্ৰ-প্ৰান্ত বিভাজন তত্ত্বৰ জৰিয়তে ব্যাখ্যা কৰা হৈছে, যাৰ নিজা প্ৰায়োগিক সমৰ্থনো আছে।^{৩২৩৩৩৪}

লি ঝাওপিংয়ে এক গণনামূলক মডেল ব্যৱহাৰ কৰি প্ৰস্তাৱ কৰিছে যে অলফেক্টৰি কৰ্টেক্সৰ পৰা অলফেক্টৰি বাল্বলৈ প্ৰতিক্ৰিয়াশীল ফিডবেক ব্যৱস্থাই পৃথক গন্ধ চিনাক্ত কৰাৰ বাবে পটভূমিৰ পৰা লক্ষ্য গন্ধ পৃথক কৰে আৰু অন্যান্য শীৰ্ষ-নিয়ন্ত্ৰণ প্ৰক্ৰিয়া সম্পন্ন কৰে।^৩৫ এই প্ৰস্তাৱে বিভিন্ন আচৰণগত আৰু স্নায়ুবৈজ্ঞানিক তথ্য আগজাননী দিয়াৰ লগতে ব্যাখ্যাও কৰে।^৩৫