ভাৰ্গৱী থাংকাপ্পন

ভাৰ্গৱী থাংকাপ্পন (Bhargavi Thankappan, জন্ম-১৯৪২) ভাৰতৰ কমিউনিষ্ট পাৰ্টিৰ এগৰাকী ভাৰতীয় ৰাজনীতিবিদ। তেওঁ অষ্টম কেৰালা বিধানসভাৰ উপাধ্যক্ষ আছিল।

প্ৰাথমিক জীৱন

১৯৪২ চনৰ ২৪ জুলাইত আদূৰত কে ইশ্বৰন আৰু তেওঁৰ পত্নী কে কুট্টীৰ ঘৰত ভাৰ্গৱীৰ জন্ম হয়।^১২ তেওঁ কোল্লামৰ শ্ৰী নাৰায়ণ কলেজৰ পৰা বাণিজ্য শাখাত স্নাতকোত্তৰ ডিগ্ৰী লাভ কৰে।^১

কৰ্মজীৱন

১৯৬৮ চনত ভাৰ্গৱীয়ে কিছু সময়ৰ বাবে ৰবৰ ব'ৰ্ডত চাকৰি লয়৷ তাৰ পিছত ১৯৭১ চনলৈকে কেৰেলা ৰাজ্যিক বিদ্যুৎ ব'ৰ্ডত কাম কৰে।^১ নেদুৱথূৰ সমষ্টিৰ পৰা ভাৰতীয় কমিউনিষ্ট পাৰ্টি (চিপিআই)ৰ প্ৰাৰ্থী হিচাপে প্ৰথমবাৰৰ বাবে কেৰালা বিধানসভাত তেওঁ প্ৰৱেশ কৰে।^২ পিছলৈ ১৯৭১ চনৰ ভাৰতীয় সাধাৰণ নিৰ্বাচনত অনুসূচিত জাতিৰ বাবে সংৰক্ষিত আদূৰ আসনৰ পৰা ভাৰ্গৱী জয়ী হয়।^১ ষষ্ঠ, ৭ম, ৮ম আৰু দশম কেৰেলা বিধানসভাত কিলিমানুৰক তেওঁ প্ৰতিনিধিত্ব কৰিছিল। ১৯৮৭ চনৰ পৰা ১৯৯১ চনলৈকে তেওঁ অষ্টম বিধানসভাৰ উপ-সভাপতি আছিল। তেওঁ চিপিআইৰ ৰাজ্যিক আৰু ৰাষ্ট্ৰীয় পৰিষদৰ সদস্য।^২

ন্যায়াধীশ মোহন কুমাৰ আয়োগে এজন সুৰা ঠিকাদাৰৰ পৰা চৰকাৰী হস্তক্ষেপ অবিহনে তেওঁৰ ব্যৱসায় সুচাৰুৰূপে চলাবলৈ ভাৰ্গৱীয়ে উৎকোচ লোৱা বুলি ধৰা পৰাৰ পিছত চিপিআইয়ে ভাৰ্গৱীক বহিষ্কাৰ কৰে।^৩ পাঁচ বছৰৰ পিছত ভিজিলেন্স বিশেষ আদালতে প্ৰমাণৰ অভাৱত তেওঁক দোষমুক্ত কৰে।^৪

ব্যক্তিগত জীৱন

১৯৬৭ চনৰ ২৯ জুনত ভাৰ্গৱীয়ে এ.কে.থাংকাপ্পনৰ সৈতে বিবাহপাশত আবদ্ধ হয়।^১ তেওঁলোকৰ এজন পুত্ৰ আৰু দুগৰাকী কন্যা আছে।^২