অজিত সিং যাদৱ

অজিত সিং যাদৱ (Ajeet Singh Yadav; জন্ম: ৫ ছেপ্টেম্বৰ ১৯৯৩) এগৰাকী ভাৰতীয় পেৰা-এথলীট।^১ তেওঁ পুৰুষৰ জেভেলিন থ্ৰো প্ৰতিযোগিতাৰ এফ-৪৬ শাখাত অংশগ্ৰহণ কৰে। ২০২৪ত ফ্ৰান্সৰ পেৰিছত অনুষ্ঠিত গ্ৰীষ্মকালীন পেৰালিম্পিকৰ জেভেলিন থ্ৰো প্ৰতিযোগিতাৰ এফ৪৬ শাখাত ৰূপৰ পদক লাভ কৰে।^২৩

প্ৰাৰম্ভিক জীৱন আৰু শিক্ষা

১৯৯৩ চনৰ ৫ ছেপ্টেম্বৰ তাৰিখে উত্তৰ প্ৰদেশৰ ইটাৱাহত অজিত সিং যাদৱৰ জন্ম হৈছিল। বৰ্তমান তেওঁ মধ্যপ্ৰদেশৰ গ্ৱালিয়ৰত অধ্যয়ন কৰি আছে। ২০১৭ চনত বন্ধুক বচাবলৈ গৈ এটা মৰ্মান্তিক ৰে'ল দুৰ্ঘটনাত পতিত হয়। ফলত তেওঁৰ বাওঁহাতখনৰ কিলাকুটিৰ তলৰ অংশৰ পৰা কাট খায়।^৪৫ দুৰ্ঘটনাৰ পৰা নিৰাময় লাভ কৰা পৰ্যায়ত দুৰ্ঘটনাৰ প্ৰায় ৪ মাহৰ পিছত ২০১৮ চনত হাৰিয়ানাৰ পঞ্চকুলাত অনুষ্ঠিত পেৰা এথলেটিক চিনিয়ৰ নেচনেল প্ৰতিযোগিতাত তেওঁ অংশগ্ৰহণ কৰে।

টাৰ্গেট অলিম্পিক প’ডিয়াম আঁচনিৰ অধীনত ভাৰত চৰকাৰৰ ক্ৰীড়া কৰ্তৃপক্ষৰ কাৰ্যসূচীত তেওঁক অন্তৰ্ভুক্ত কৰা হৈছিল। ইয়াৰ লগতে অলিম্পিক গোল্ড কুৱেষ্টেও তেওঁক সমৰ্থন কৰে। তেওঁ গ্ৱালিয়ৰৰ লক্ষ্মীবাঈ ৰাষ্ট্ৰীয় শাৰীৰিক শিক্ষা প্ৰতিষ্ঠানত শাৰীৰিক শিক্ষা আৰু ক্ৰীড়া বিষয়ত পি এইচ ডি কৰি আছে।

খেলুৱৈ জীৱন

পেৰা জেভেলিন খেলত অংশগ্ৰহণ কৰাৰ পিছত ২০১৯ চনত তেওঁ আন্তঃৰাষ্ট্ৰীয় পৰ্যায়ত অভিষেক ঘটে। তেওঁ চীনৰ বেইজিঙত অনুষ্ঠিত হোৱা ৭ম বিশ্ব পেৰা এথলেটিকছ গ্ৰেণ্ড প্ৰিস্কত অংশগ্ৰহণ কৰে আৰু জেভেলিন নিক্ষেপত সোণৰ পদক লাভ কৰে।^৬ তেওঁ ২০১৯ চনত ডুবাইত অনুষ্ঠিত হোৱা বিশ্ব পেৰা এথলেটিক্স চেম্পিয়নশ্বিপত ভাৰতক প্ৰতিনিধিত্ব কৰে আৰু ইয়াত তেওঁ ব্ৰঞ্জৰ পদক লাভ কৰে।^৭ ইয়াৰ ফলস্বৰূপে তেওঁ ২০২০ চনৰ গ্ৰীষ্মকালীন পেৰালিম্পিকৰ বাবে যোগ্যতা অৰ্জন কৰিছিল।^৮৯ ২০২১ চনৰ বিশ্ব পেৰা এথলেটিকছ গ্ৰেণ্ড প্ৰিস্কতো তেওঁ স্বৰ্ণ পদক লাভ কৰে।^১০

২০২০ চনত টকিঅ'ত অনুষ্ঠিত গ্ৰীষ্মকালীন পেৰালিম্পিকত অজিত সিঙে ভাৰতক প্ৰতিনিধিত্ব কৰিছিল।^১১ তেওঁ ২০২৪ চনত পেৰিছত অনুষ্ঠিত হোৱা গ্ৰীষ্মকালীন পেৰালিম্পিকত ভাৰতক প্ৰতিনিধিত্ব কৰিবলৈ যোগ্যতা অৰ্জন কৰে।^১২ পেৰিছত অনুষ্ঠিত গ্ৰীষ্মকালীন পেৰালিম্পিকৰ জেভেলিন থ্ৰো প্ৰতিযোগিতাৰ এফ৪৬ শাখাত ৰূপৰ পদক লাভ কৰে।