দিনকণা

দিনকণা (Indian Nightjar, বৈজ্ঞানিক নাম-Caprimulgus asiaticus) এবিধ সৰু আকাৰৰ নিশাচৰ চৰাইৰ প্ৰজাতি৷ ই প্ৰধানত: দক্ষিণ-পূব এছিয়াৰ মুকলি অঞ্চলত প্ৰজনন কৰে৷ ই গধূলি আৰু পুৱতি নিশা ক্লিক ক্লিক ধৰণে শেষলৈ চুটি আৰু অধিক খৰ কৈ মাত মাতে৷ এই মাতটো সাধাৰণতে বৰফাবৃত হ্ৰদ এটাত শিল এটা পৰিলে হোৱা শব্দৰ দৰে শুনা যায়৷

বিৱৰণ

দিনকণাৰ আকাৰ সৰু৷ ইয়াৰ নেজ চুটি, ডিঙিত সোণালী পটা আৰু কাষত বগা দাগ থাকে৷ ইয়াৰ মূৰৰ ওপৰৰ অংশৰ বৰণ মুগা আৰু বুকু অঞ্চল মটিয়া ৰঙৰ৷ মতাতকৈ মাইকী দিনকণাৰ দেহটো বেছিকৈ ফুটুকীয়া৷^১

ই সুৰ্য্য অস্ত যোৱাৰ পিছত নীৰৱে উৰে৷ দিনৰ ভাগত ই মাটিত পৰি থাকে৷ ইয়াৰ দেহৰ বৰণ আৰু বাহ্যিক গঠনে ইয়াক পৰিৱেশৰ লগত মিলি নিজকে লুকুৱাই ৰাখিবলৈ সহায় কৰে৷

টেক্স'নমি

দিনকণাৰ গোটসমূহৰ ভিতৰত উত্তৰ-পশ্চিম ভাৰতৰ চৰাইসমূহৰ ৰং শেঁতা হোৱা দেখা যায়৷ শ্ৰীলংকাৰ চৰাইসমূহক eidos আখ্যা দিয়া হয় আৰু ইহঁতৰ বৰণ গাঢ় মটিয়া হোৱা দেখা যায়৷ ^১

বিতৰণ

দিনকণা উত্তৰ-পশ্চিম ভাৰতৰ পৰা পাকিস্তান পৰ্যন্ত বিস্তৃত হৈ আছে৷ অৱশ্যে ইয়াক শুকান মৰুভূমি অঞ্চলত দেখা পোৱা নাযায়৷ তাৰোপৰি ইয়াক হিমালয়ৰ দক্ষিণ দিশত তথা বাংলাদেশ, ম্যানমাৰ, শ্ৰীলংকা তথা ভিয়েটনাম আদিত পোৱা যায়৷

বাসস্থান

দিনকণা চৰাই সাধাৰণতে মুকলি কাঠনি (open woodland), কাইঁটীয়া বনাঞ্চল (scrub) আৰু খেতি-পথাৰত দেখা পোৱা যায়৷ ই প্ৰায়ে মাটিত বা চাপৰ ডালত জিৰণি লয়৷

আচৰণ

খাদ্য

দিনকণাই নিশাৰ ভাগত বাটত জিৰণি লয়, কেতিয়াবা বাটৰ বিদ্যুতবাতিৰ প্ৰতি আকৰ্ষিত হৈ কাষ চপা পোক-পতংগ ধৰি খায়৷ ^২ ইহঁতৰ জিলিকি থক চকু দুটাৰ বাবে বাটেদি যোৱা গাড়ী-মটৰৰ হেডলাইটৰ পোহৰত দেখা পাবলৈ সুবিধা হয়৷ অৱশ্যে গাড়ী-মটৰৰ তীব্ৰ পোহৰত নেদেখা হৈ বহুতো দিনকণা চৰাইৰ গাড়ীৰ আগত পৰি মৃত্যু হোৱাৰো তথ্য পোৱা যায়৷^৩

প্ৰজনন

দিনকণাই সাধাৰণতে ফেব্ৰুৱাৰীৰ পৰা চেপ্টেম্বৰ মাহত প্ৰজনন কৰে৷ ই বাহ নাসাজে৷ উদং মাটিতে ই দুটা গুলপীয়া কণী পাৰে৷ মাকে কাষতে কণী দুটা ৰখি থাকে৷ ^৪ নতুনকৈ জন্মা পোৱালিৰ গাৰ ওপৰ অংশ মটিয়া আৰু তল অংশ মাখন বৰণৰ পাখিৰে ঢাক খাই থাকে৷ জন্মোতেই ইয়াৰ চকু মেল খাই থাকে আৰু ইহঁতে সৰুকৈ মাতো উলিয়াব পাৰে৷ ^৫

বাহ্যিক সংযোগ

• এডব্লিউডিত থকা চিত্ৰ