তামান্না ভাটিয়া

তামান্না সন্তোষ ভাটিয়া (জন্ম: ২১ ডিচেম্বৰ ১৯৮৯), যিজনী তামান্না ভাটিয়া (ইংৰাজী ভাষা: Tamannaah Bhatia) নামেৰে অধিক পৰিচিত, এগৰাকী ভাৰতীয় অভিনেত্ৰী যিয়ে প্ৰধানকৈ তেলুগু ভাষা, তামিল ভাষা আৰু হিন্দী ভাষা চলচ্চিত্ৰত কাম কৰে। ৮৯খন চলচ্চিত্ৰত অভিনয় কৰা তামান্নাক দক্ষিণ ভাৰতীয় চিনেমাৰ এগৰাকী আগশাৰীৰ অভিনেত্ৰী হিচাপে গণ্য কৰা হয়। তেওঁ তিনিটাকৈ সন্তোষম ফিল্ম এৱাৰ্ডছ, দুটাকৈ দক্ষিণ ভাৰতীয় আন্তঃৰাষ্ট্ৰীয় চলচ্চিত্ৰ বঁটা আৰু কলাইমামণি বঁটাৰ লগতে কেইবাটাও সন্মান লাভ কৰিছে।

প্ৰাৰম্ভিক জীৱন

তামান্না সন্তোষ ভাটিয়াৰ^১ জন্ম ১৯৮৯ চনৰ ২১ ডিচেম্বৰত ভাৰতৰ বোম্বাইত (বৰ্তমানৰ মুম্বাই) হৈছিল।^২৩ তেওঁৰ পিতৃ-মাতৃৰ নাম হ'ল সন্তোষ আৰু ৰজনী ভাটিয়া।^৪৫ আনন্দ ভাটিয়া নামৰ তেওঁৰ এজন ককায়েক আছে।^৬ তেওঁ সিন্ধী হিন্দু মূলৰ আৰু মুম্বাইৰ মানেকজী কুপাৰ এডুকেচন ট্ৰাষ্ট স্কুলত শিক্ষা গ্ৰহণ কৰিছিল।^৭৮ ১৩ বছৰ বয়সৰপৰাই তেওঁ অভিনয় শিকিবলৈ আৰম্ভ কৰে আৰু এবছৰৰ বাবে পৃথ্বী থিয়েটাৰত যোগদান কৰি নাট্য প্ৰদৰ্শনত অংশগ্ৰহণ কৰে।^৯ আৰম্ভণিতে তেওঁ নিজৰ নামটোৱেই মঞ্চ নাম হিচাপে ব্যৱহাৰ কৰিছিল যদিও পিছলৈ চলচ্চিত্ৰ জগতত প্ৰাথমিক অভিজ্ঞতা লাভ কৰাৰ পাছত সংখ্যাতত্ত্বৰ কাৰণত নামটো সংশোধন কৰি "তামান্না" কৰে।^১০ সময়ৰ লগে লগে তেওঁ নিজৰ উপাধিও ব্যৱহাৰ কৰিবলৈ আৰম্ভ কৰে আৰু "তামান্না ভাটিয়া"ক মঞ্চ নাম হিচাপে গ্ৰহণ কৰে।^১১

কৰ্মজীৱন

২০০৫–২০১৪: প্ৰাৰম্ভিক কাম, সফলতা আৰু স্বীকৃতি

তামান্না ভাটিয়াই ২০০৫ চনত হিন্দী ছবি চান্দ ছা ৰোছন চেহৰাৰ জৰিয়তে মুখ্য অভিনেত্ৰী হিচাপে অভিনয় জগতত ভৰি থৈছিল, যিখন ছবিয়ে বক্স অফিচত বিশেষ সফলতা লাভ কৰা নাছিল। সেই একে বৰ্ষতে তেওঁ শ্ৰী ছবিৰ জৰিয়তে তেলেগু চিনামাত আৰু ২০০৬ চনত কেডীৰ জৰিয়তে তামিল চিনামাত প্ৰৱেশ কৰে।^১২ ২০০৭ চনত তেওঁৰ ছবি ৱিয়াবাৰীয়ে বক্স অফিচত আশানুৰূপ ফল দেখুৱাব নোৱাৰিলে যদিও তেওঁৰ অভিনয়ে সমালোচকৰ প্ৰশংসা বুটলিছিল।^১৩ তেওঁ হেপ্পী ডেইজ আৰু কাল্লুৰীৰ জৰিয়তে বিশেষ পৰিচিতি লাভ কৰে। এই ছবি দুখনত এগৰাকী মহাবিদ্যালয়ৰ ছাত্ৰী হিচাপে তেওঁৰ চৰিত্ৰক দৰ্শকে আদৰি লৈছিল আৰু দুয়োখন ছবিয়েই বক্স অফিচত সফলতা লাভ কৰিছিল। ইয়াৰ ফলত তেওঁ তেলেগু আৰু তামিল চিনেমাৰ এগৰাকী আগশাৰীৰ অভিনেত্ৰী হিচাপে প্ৰতিষ্ঠিত হয়।^১৪১৫ ২০০৮ চনত মুক্তি পোৱা কালিদাসুৱে তেলেগু চিনামাত এক শক্তিশালী প্ৰভাৱ পেলাবলৈ সক্ষম হৈছিল।^১৬১৭

২০০৯ চনত মুক্তিপ্ৰাপ্ত তামিল ছবি পাদিক্কাদাভনৰ বাবে তামান্নাই প্ৰশংসা লাভ কৰে, যদিও ছবিখনে মিশ্ৰিত সঁহাৰি লাভ কৰিছিল।^১৮ তেওঁৰ আনখন ছবি কোঞ্চেম ইষ্টম কোঞ্চেম কষ্টম সমালোচকৰদ্বাৰা উচ্চ প্ৰশংসিত হৈছিল যদিও বক্স অফিচত মধ্যমীয়া ফলাফলহে দেখুৱাইছিল।^১৯২০ আয়ান ছবিখন বক্স অফিচত বৃহৎ সফল হিচাপে পৰিগণিত হয়।^২১২২ আনহাতে, তামান্নাৰ অভিনয় প্ৰশংসিত হোৱা সত্ত্বেও আনন্দ তাণ্ডৱম ছবিখনে আশানুৰূপ সঁহাৰি লাভ নকৰিলে।^২৩২৪ ইয়াৰ পিছত কাণ্ডেন কাধলাই ছবিখনে তেওঁলৈ প্ৰশংসা আৰু ছাউথ স্কোপ বঁটা কঢ়িয়াই আনে।^২৫২৬ ২০১০ চনত তেওঁৰ তামিল ৰোড মুভিপাইয়াই ইতিবাচক সমালোচনা লাভ কৰাৰ লগতে ব্যাৱসায়িকভাৱেও সফল হয়।^২৭

২০১১ চনত ভাটিয়াই তামিল ছবি চিৰুথাইত অভিনয় কৰে। এই ছবিখনত তেওঁৰ চৰিত্ৰটোৱে সমালোচনাৰ সন্মুখীন হৈছিল যদিও ছবিখনে ব্যৱসায়িক সফলতা লাভ কৰিছিল।^২৮২৯ বদ্ৰীনাথ ছবিখনে মিশ্ৰিত সঁহাৰি লাভ কৰিছিল যদিও ই ব্যৱসায়িকভাৱে সফল হৈছিল।^৩০৩১ তেওঁৰ আনখন ছবি ভেংঘাইয়ে মিশ্ৰিত সঁহাৰি লাভ কৰিছিল,^৩২৩৩ আনহাতে উছাৰাভেলি বক্স অফিচত সফল হোৱাৰ লগতে তামান্নাৰ অভিনয়েও উচ্চ প্ৰশংসা লাভ কৰিছিল।^৩৪৩৫ নাগা চৈতন্যৰ বিপৰীতে মহাবিদ্যালয়ৰ ছাত্ৰীৰ চৰিত্ৰত অভিনয় কৰা তেওঁৰ তেলেগু ছবি ১০০% লাভ ছবিখনে সমালোচকৰ দৃষ্টি আকৰ্ষণ কৰাৰ লগতে বক্স অফিচতো সফলতা অৰ্জন কৰে। এই ছবিখনৰ বাবে তেওঁ চিনেমা (CineMAA) বঁটা আৰু শ্ৰেষ্ঠ অভিনেত্ৰীৰ সন্তোষম বঁটা লাভ কৰে।^৩৬৩৭ ২০১২ চনত তেওঁৰ তেলেগু ছবি ৰাছাই ব্যৱসায়িক সফলতা লাভ কৰাৰ লগতে তেওঁৰ অভিনয়েও প্ৰশংসা বুটলিছিল।^৩৮৩৯ ইয়াৰ পিছত মুক্তি পোৱা এন্দুকান্তে প্ৰেমান্ত^৪০৪১ আৰু ৰেবেল ছবি দুখনে আশানুৰূপ ব্যৱসায় কৰিব নোৱাৰিলে যদিও তেওঁৰ অভিনয় প্ৰশংসিত হৈছিল।^৪২৪৩

২০১৫–২০১৯: প্ৰতিষ্ঠিত অভিনেত্ৰী

২০১৫ চনটো তামান্না ভাটিয়াৰ কৰ্মজীৱনৰ বাবে এক টাৰ্নিং পইণ্ট আছিল। প্ৰভাসৰ বিপৰীতে বাহুবলী: দ্য বিগিনিং ছবিত তেওঁ কৰা যোদ্ধা অৱন্তিকাৰ চৰিত্ৰটোৱে তেওঁলৈ ব্যাপক প্ৰশংসা কঢ়িয়াই আনিছিল।^৪৪ সৰ্বাধিক উপাৰ্জন কৰা তেলেগু ছবিসমূহৰ ভিতৰত অন্যতম হিচাপে এই ছবিখনৰ ব্যৱসায়িক সফলতাই তেওঁৰ কৰ্মজীৱনলৈ বিচিত্ৰ চৰিত্ৰত অভিনয় কৰাৰ সুযোগ আনি দিছিল।^৪৫৪৬ দ্য হিন্দুৰ সমালোচক সংগীতা দেৱী দুন্দুৱে তেওঁৰ অভিনয়ক "প্ৰভাৱশালী" বুলি অভিহিত কৰিছিল।^৪৭ আনহাতে বাছুভুম চাৰাভানানুম ওন্না পাদিচাভাঙ্গা ছবিখনে নেতিবাচক সমালোচনা লাভ কৰিছিল।^৪৮ ৰবি তেজাৰ বিপৰীতে অভিনয় কৰা বেঙ্গল টাইগাৰ ছবিত তেওঁ এগৰাকী মুখ্যমন্ত্ৰীৰ কন্যাৰ চৰিত্ৰত অভিনয় কৰি বক্স অফিচত সফলতা অৰ্জন কৰিছিল।^৪৯৫০

২০১৬ চনত উপিৰি আৰু ধৰ্ম দুৰাই ছবিত তেওঁৰ অভিনয় ইতিবাচকভাৱে সঁহাৰি লাভ কৰিছিল। ধৰ্ম দুৰাই বক্স অফিচত সফল হোৱাৰ লগতে তেওঁ এই ছবিখনৰ বাবে শ্ৰেষ্ঠ তামিল অভিনেত্ৰীৰ এচিয়াভিছন বঁটা লাভ কৰিছিল।^৫১৫২ তেওঁ ৰণবীৰ চিং ৰিটাৰ্ণছ নামৰ চুটি ছবিখনত অভিনয় কৰিছিল যিখন আদৰণি লাভ কৰিছিল।^৫৩ তেওঁৰ ত্ৰিভাষিক হৰৰ-কমেডী ছবি দেৱীয়ে ইতিবাচক সমালোচনা লাভ কৰাৰ লগতে তেওঁৰ দ্বৈত চৰিত্ৰই প্ৰশংসা লাভ কৰিছিল আৰু ই বক্স অফিচত সফল হৈছিল।^৫৪৫৫ তেওঁ মোষ্ট পপুলাৰ তামিল অভিনেত্ৰীৰ এচিয়ানেট ফিল্ম এৱাৰ্ড লাভ কৰিছিল। অৱশ্যে তেওঁৰ আন এখন ছবি কাথ্থি চান্দাই মিশ্ৰিত সঁহাৰি লাভ কৰিছিল।^৫৬