ডেভিদ জুলিয়াছ

ডেভিদ জুলিয়াছ (David Julius, জন্ম: ৪ নৱেম্বৰ, ১৯৫৫) এজন আমেৰিকান শৰীৰতত্ত্ববিদ। তেওঁ বিষ সংবেদন আৰু তাপৰ আণৱিক প্ৰণালীৰ ওপৰত তেওঁৰ গৱেষণাৰ বাবে জনাজাত। টিআৰপিভি১ আৰু টিআৰপিএম৮ ৰিচেপ্টৰৰ চিনাক্ত কৰিছিল। এই ৰিচেপ্টৰে কেপচাইচিন, মেন্থল আৰু উষ্ণতা চিনাক্ত কৰে। তেওঁ বৰ্তমান চান ফ্ৰান্সিস্কোৰ কেলিফৰ্নিয়া বিশ্ববিদ্যালয়ৰ অধ্যাপক। জুলিয়াছে ২০১০ চনত জীৱ বিজ্ঞান আৰু ঔষধৰ শ্ব বঁটা আৰু ২০২০ চনত জীৱ বিজ্ঞানৰ ব্ৰেকথ্ৰু পুৰস্কাৰ লাভ কৰিছিল।^১২ ২০২১ চনত তেওঁ উষ্ণতা আৰু স্পৰ্শৰ বাবে ৰিচেপ্টৰৰ আৱিষ্কাৰৰ বাবে আৰ্ডেম পাটাপুটিয়ানৰ সৈতে যুটীয়াভাৱে শৰীৰতত্ত্ব বা ঔষধৰ ন'বেল বঁটা লাভ কৰে।^৩

প্ৰাৰম্ভিক জীৱন আৰু শিক্ষা

১৯৫৫ চনৰ ৪ নৱেম্বৰ তাৰিখে ডেভিদ জুলিয়াছৰ জন্ম হৈছিল। ব্ৰাইটন বীচৰ বাসিন্দা জুলিয়াছে ১৯৭৭ চনত মেচাচুচেটছ ইনষ্টিটিউট অফ টেকন'লজীৰ পৰা বিজ্ঞানৰ স্নাতক ডিগ্ৰী অৰ্জন কৰিছিল। তেওঁ ১৯৮৪ চনত জেৰেমি থৰ্ণাৰ আৰু ৰেণ্ডি শ্বেকমেনৰ যুটীয়া তত্ত্বাৱধানত কেলিফৰ্নিয়া বিশ্ববিদ্যালয়, বাৰ্কলেৰ পৰা ডক্টৰেট ডিগ্ৰী লাভ কৰে। পিএইচডিৰ গৱেষণাৰ সময়ত তেওঁ কেক্স২ ক ফুৰিনসদৃশ প্ৰ'প্ৰ'টিন ৰূপান্তৰৰ প্ৰতিষ্ঠাপক সদস্য হিচাপে চিনাক্ত কৰিছিল। ১৯৮৯ চনত তেওঁ কলম্বিয়া বিশ্ববিদ্যালয়ত ৰিচাৰ্ড এক্সেলৰ সৈতে তেওঁৰ পোষ্ট-ডক্টৰেল প্ৰশিক্ষণ সম্পূৰ্ণ কৰে। ইয়াত তেওঁ চেৰোটনিন ১চি ৰিচেপ্টৰ চিহ্নিত কৰে আৰু প্ৰতিৰূপ সৃষ্টি কৰে।^৪

গৱেষণা

১৯৯৭ চনত জুলিয়াছৰ পৰীক্ষাগাৰে টিআৰপিভি১ৰ বিশেষত্ব আৱিষ্কাৰ কৰি প্ৰতিৰূপ সৃষ্টি কৰিছিল। টিআৰপিভি১ হৈছে কেপচাইচিন চিনাক্ত কৰা ৰিচেপ্টৰ। এইবিধ ৰিচেপ্টৰে জলকীয়াত ৰাসায়নিক পদাৰ্থ কেপচাইচিন চিনাক্ত কৰে। কেপচাইচিনৰ বাবে জলকীয়া জ্বলা হয়।^৫ তেওঁলোকৰ গৱেষণাত টিআৰপিভি১-য়ে ক্ষতিকাৰক তাপ বা থাৰ্মোচেপচন চিনাক্ত কৰে বুলিও প্ৰকাশিত হয়।^৫৬ টিআৰপিভি১ গাঁথনিগতভাৱে সম্পৰ্কিত টিআৰপি বা ক্ষণস্থায়ী ৰিচেপ্টৰ সম্ভাৱনাৰ কেচন চেনেলৰ এক বৃহৎ পৰিয়ালৰ অংশ। এইবিধ নথকা প্ৰাণীবোৰে প্ৰ'টিনৰ আনুবংশিক নকআউট ব্যৱহাৰ কৰি ক্ষতিকাৰক তাপ আৰু কেপচাইচিনৰ প্ৰতি সংবেদনশীলতা হেৰুৱায়।^৭

জুলিয়াছৰ পৰীক্ষাগাৰে টিআৰপিএম৮ বা চিএমআৰ১ আৰু টিআৰপিএ১ক চিনাক্ত কৰি প্ৰতিৰূপ সৃষ্টি কৰিছে। দুয়ো টিআৰপি চুপাৰফেমিলিৰ সদস্য। তেওঁলোকে প্ৰদৰ্শন কৰিছিল যে টিআৰপিএম৮য়ে মেন্থল আৰু শীতল তাপমাত্ৰা চিনাক্ত কৰে^৮৯ আৰু টিআৰপিএ১য়ে সৰিয়হৰ তেল বা ৰাসায়নিক ভাবে এলিল আইচোথিওচাইনেট চিনাক্ত কৰে।^১০ এই পৰ্যৱেক্ষণসমূহৰ পৰা বুজা যায় যে টিআৰপি চেনেলবোৰে বিভিন্ন উষ্ণতা আৰু ৰাসায়নিক পদাৰ্থ চিনাক্ত কৰে। বিভিন্ন প্ৰজাতিৰ চেনেলবোৰৰ অনন্য অভিযোজন বৰ্ণনা কৰি^১১ আৰু অসংখ্য চেনেলৰ ক্ৰিও-ইএম গাঁথনি সমাধান কৰি ডেভিদ জুলিয়াছৰ পৰীক্ষাগাৰে এই চেনেলবোৰ নিয়ন্ত্ৰণ কৰা বিষাক্ত পদাৰ্থ আৱিষ্কাৰ কৰি নচিচেপচন অধ্যয়নত অৱদান আগবঢ়াইছে।^{১২১৩১৪}

বঁটা আৰু সন্মান

২০০০ চনত জুলিয়াছক কেপচাইচিন ৰিচেপ্টৰ প্ৰতিৰূপৰ ওপৰত কৰা গৱেষণাৰ বাবে উদ্বোধনী পাৰল-ইউএনচি স্নায়ুবিজ্ঞান বঁটা প্ৰদান কৰা হৈছিল। ২০১০ চনত তেওঁ নচিচেপচনৰ বিভিন্ন দিশৰ সৈতে জড়িত আয়ন চেনেলবোৰ চিনাক্ত কৰা তেওঁৰ গৱেষণাৰ বাবে শ্ব পুৰস্কাৰ লাভ কৰিছিল। ২০১৪ চনত তেওঁক জনছন এণ্ড জনছনে বিষ আৰু তাপসংবেদনৰ আণৱিক আধাৰ আৱিষ্কাৰ কৰাৰ বাবে জৈৱ চিকিৎসা গৱেষণাৰ বাবে ড. পল জেনচেন বঁটাৰে সন্মানিত কৰিছিল। ২০১৭ চনত তেওঁ গেইৰ্ডনাৰ ফাউণ্ডেচন আন্তঃৰাষ্ট্ৰীয় বঁটা^১৫ আৰু এইচএফএছপি নাকাচোন বঁটা লাভ কৰিছিল।^১৬ তেওঁ ২০১০ চনৰ প্ৰিন্স অৱ আস্তুৰিয়াছ এৱাৰ্ড ফৰ টেকনিকেল এণ্ড চাইণ্টিফিক ৰিচাৰ্ছ, ২০২০ চনৰ জীৱন বিজ্ঞানৰ ব্ৰেকথ্ৰু পুৰস্কাৰ,^১৭ আৰু ২০২০ চনৰ কাৱলী প্ৰাইজ ইন নিউৰোচাইন্স (আৰ্ডেম পাটাপুটিয়ানৰ সৈতে)^১৮ আৰু ২০২০ বিবিভিএ ফাউণ্ডেচন ফ্ৰণ্টিয়াৰ্ছ অৱ নলেজ বঁটা লাভ কৰিছে।^১৯

২০২১ চনত তেওঁ উষ্ণতা আৰু স্পৰ্শৰ বাবে ৰিচেপ্টৰৰ আৱিষ্কাৰৰ বাবে আৰ্ডেম পাটাপুটিয়ানৰ সৈতে যুটীয়াভাৱে শৰীৰতত্ত্ব বা ঔষধৰ ন'বেল বঁটা লাভ কৰে।^২০

বাহ্যিক সংযোগ

• কেলিফোৰ্নিয়া বিশ্ববিদ্যালয়ৰ ৱেবচাইটত ডেভিদ জুলিয়াছ