জেনিছ পাৰিয়েট

জেনিছ পাৰিয়েট (Janice Pariat) এগৰাকী ভাৰতীয় সাহিত্যিক আৰু শিক্ষাবিদ। তেওঁ অসমৰ যোৰহাটত জন্মগ্ৰহণ কৰিছিল আৰু মেঘালয়ৰ শ্বিলঙত ডাঙৰ দীঘল হৈছিল।^১২ ৰেণ্ডম হাউচ ইণ্ডিয়া প্ৰকাশনগোষ্ঠীৰ দ্বাৰা ২০১২ চনত প্ৰকাশিত তেওঁৰ চুটি গল্পৰ প্ৰথম সংকলন 'বট্‌ছ অন লেণ্ড'ৰ^৩ বাবে তেওঁ ইংৰাজী ভাষাৰ বাবে ২০১৩ চনৰ সাহিত্য অকাডেমি যুৱ বঁটা^৪ আৰু কল্পকাহিনীৰ বাবে ২০১৩ চনত ক্ৰছৱৰ্ড বুক এৱাৰ্ড লাভ কৰিছিল।^৫ ইংৰাজী ভাষাত সাহিত্য অকাডেমীৰ পৰা বঁটা লাভ কৰা পাৰিয়েট মেঘালয়ৰ প্ৰথম গৰাকী ব্যক্তি।^২

প্ৰাৰম্ভিক জীৱন আৰু শিক্ষা

অসমৰ যোৰহাটত জেনিছ পাৰিয়েটৰ জন্ম হৈছিল। তেওঁ শ্বিলং আৰু অসমৰ কেইবাটাও চাহ বাগিচাৰ মাজত ডাঙৰ দীঘল হৈছিল।^১২ তেওঁ শ্বিলঙত অৱস্থিত লৰেটো কনভেণ্ট আৰু দা অসম ভেলী স্কুলত শিক্ষা লাভ কৰিছিল।^১৬ তাৰ পিছত তেওঁ দিল্লীৰ ছেইণ্ট ষ্টিফেনছ কলেজৰ পৰা ইংৰাজী সাহিত্যত স্নাতক আৰু লণ্ডন বিশ্ববিদ্যালয়ৰ স্কুল অৱ অৰিয়েণ্টেল এণ্ড আফ্ৰিকান ষ্টাডিজৰ পৰা কলা আৰু পুৰাতত্ত্বৰ ইতিহাসত স্নাতকোত্তৰ ডিগ্ৰী লাভ কৰিছিল।^১

কৰ্মজীৱন

তেওঁ অনলাইন সাহিত্য আলোচনী পাইৰটাৰ সম্পাদক পদত অধিষ্ঠিত। এই আলোচনীখন তেওঁ ২০১০ চনত প্ৰতিষ্ঠা কৰিছিল।^৭ তেওঁৰ লিখনি কেইবাখনো ভাৰতীয় আৰু আন্তঃৰাষ্ট্ৰীয় আলোচনীত প্ৰকাশিত হৈছে।^৮ তেওঁ টাইম আউট দিল্লী, কাৰাভান^৯ আৰু ইণ্টাৰনাজিওনেল আদিৰ দৰে আলোচনীত নিয়মীয়াকৈ লিখা-মেলা কৰে। ^১০ বৰ্তমান তেওঁ অশোকা বিশ্ববিদ্যালয়ত সৃষ্টিশীল লিখন আৰু কলাৰ ইতিহাস বিভাগৰ সহকাৰী অধ্যাপক পদত অধিষ্ঠিত।

শৈলী

'বট্‌ছ অন লেণ্ড' নামৰ চুটিগল্প সংকলনত তেওঁ শ্বিলং, চেৰাপুঞ্জি আৰু অসমৰ মাজত স্থাপিত পৰিত্যক্ত কাহিনীসমূহে ১৮৫০ৰ দশকৰ পৰা আৰম্ভ কৰি তিনি শতিকাৰ সময়ছোৱাত উত্তৰ-পূব ভাৰতৰ মাজেৰে পাৰ হৈ যোৱা পৰিৱৰ্তনৰ কাল্পনিক পুনৰ-কল্পনা কৰিছে।^১১ স্থানীয় লোককাহিনী আৰু পৰম্পৰাক সামাজিক আৰু ৰাজনৈতিক ঘটনাৰ সৈতে একত্ৰিত কৰি জেনিছ পাৰিয়েটৰ শৈলীক যাদুকৰী বাস্তৱবাদৰ সৈতে তুলনা কৰা হৈছে।^১২ জিত থাইলে তেওঁৰ কাহিনীবোৰ 'আনন্দদায়ক আৰু মৌলিক' বুলি মন্তব্য কৰিছিল।^১২ তেওঁৰ গল্প সমূহত জাপানী সাহিত্যিক হাৰুকি মুৰাকামীৰ প্ৰভাৱ পৰিলক্ষিত হয়।^১৩

বঁটা আৰু সন্মান

২০১৩ চনত তেওঁৰ চুটি গল্পৰ প্ৰথম সংকলন 'বট্‌ছ অন লেণ্ড'ৰ বাবে তেওঁ ইংৰাজী ভাষাৰ সাহিত্য অকাডেমি যুৱ বঁটা^৪ আৰু কল্পকাহিনী শিতানত ক্ৰছৱৰ্ড বুক এৱাৰ্ড লাভ কৰে।^১৪ একেখন গ্ৰন্থ ২০১৩ চনৰ শক্তি ভট্ট প্ৰথম গ্ৰন্থ পুৰস্কাৰৰ বাবেও তালিকাভুক্ত কৰা হৈছিল। ^১৫ ২০১৩ চনৰ উদয় লাখপল আন্তৰ্জাতিক চুটি গল্প বঁটা^১৬১৭ আৰু ২০১৩ টাটা লিটাৰেচাৰ লাইভ! প্ৰথম গ্ৰন্থ বঁটাৰ বাবে এই গ্ৰন্থখন দীঘলীয়া তালিকাভুক্ত কৰা হৈছিল।^১৮ দ্য হিন্দু লিটাৰেৰী প্ৰাইজ ২০১৫ চনৰ বাবে তেওঁৰ চিহৰ্ছক তালিকাভুক্ত কৰা হৈছিল।^১৯

সাহিত্য কৰ্ম

কল্পকাহিনী

• 'দ্য নাইন-চেম্বাৰড হাৰ্ট'', হাৰ্পাৰকলিন্স ইণ্ডিয়া, নতুন দিল্লী, ২০১৭
• 'চিহৰ্চ: এ উপন্যাস'', ৰেণ্ডম হাউচ ইণ্ডিয়া, নতুন দিল্লী, ২০১৪
• 'বট্‌ছ অন লেণ্ড' চুটি গল্পৰ সংকলন, ৰেণ্ডম হাউচ ইণ্ডিয়া, নতুন দিল্লী, ২০১২

কবিতা

• 'দা য়েল্লো নিব মডাৰ্ণ ইংলিছ পোয়েট্ৰি বাই ইণ্ডিয়ানছ' (সুদীপ সেন, সম্পাদিত), চিমুচ হেনি চেণ্টাৰ ফৰ পোয়েট্ৰি, কুইন্স ইউনিভাৰ্চিটি বেলফাষ্ট, ২০১১
• 'কবি কলা: দ্য ভিজুৱেল পোয়েট্ৰি প্ৰজেক্ট' (মেডনেছ মানালী এড.), চিনামন টিল প্ৰিণ্ট এণ্ড পাব্লিচিং, গোৱা, ২০১০