চমৎ পলিহপিটিয়

চমৎ পলিহপিটিয় (චමත් පලිහපිටිය, Chamath Palihapitiya; জন্ম: ৩ ছেপ্টেম্বৰ, ১৯৭৬)^১ এজন শ্ৰীলংকান-বংশোদ্ভূত কানাডীয়–আমেৰিকান ৱেঞ্চাৰ পুঁজিবাদী তথা উদ্যমী। তেওঁ ছ’শ্বাল কেপিটেল প্ৰতিষ্ঠা কৰিছিল আৰু বৰ্তমান ইয়াৰ নেতৃত্ব দি আছে। ২০০৭ চনৰ পৰা ২০১১ চনলৈ ফেইচবুকৰ এজন জ্যেষ্ঠ কাৰ্যবাহী হিচাপে কাৰ্যনিৰ্বাহ কৰাৰ পিছত ২০১১ চনত তেওঁ এই প্ৰতিষ্ঠানটো আৰম্ভ কৰিছিল।^২ পলিহপিটিয়ই ছ’শ্বাল কেপিটেলৰ জৰিয়তে প্ৰযুক্তি আৰু স্বাস্থ্যসেৱা খণ্ডৰ কোম্পানীত বিনিয়োগ কৰিছে। ইয়াৰ উপৰিও তেওঁ উচ্চ-পৰ্যায়ৰ বিশেষ উদ্দেশ্যৰ আহৰণ কোম্পানী (SPAC) চুক্তিৰ পোষকতা কৰিছে, গ’ল্ডেন ষ্টেট ৱাৰিয়ৰ্ছত সংখ্যালঘু অংশীদাৰিত্ব লাভ কৰিছে, আৰু ২০২১ চনত আৰম্ভ হোৱা ব্যৱসায় আৰু প্ৰযুক্তি বিষয়ক সাপ্তাহিক পডকাষ্ট অল-ইনৰ সহ-সঞ্চালক। এই পডকাষ্টত তেওঁৰ সৈতে সহ-সঞ্চালক হিচাপে জেছন কালাকানিছ, ডেৱিড ছেক্স আৰু ডেৱিড ফ্ৰাইডবাৰ্গ আছে, য’ত মূলতঃ ষ্টাৰ্টআপ বিনিয়োগ আৰু প্ৰযুক্তি নীতিৰ ওপৰত গুৰুত্ব দিয়া হয়।^২

প্ৰাৰম্ভিক জীৱন আৰু শিক্ষা

১৯৭৬ চনৰ ৩ ছেপ্টেম্বৰত দক্ষিণ শ্ৰীলংকাৰ এখন চহৰ গাল্লত চমৎ পলিহপিটিয়ৰ জন্ম হৈছিল। ৫ বছৰ বয়সত তেওঁ কানাডালৈ স্থানান্তৰিত হয়, য’ত তেওঁৰ দেউতাকে অটোৱাস্থিত শ্ৰীলংকাৰ উচ্চায়ুক্তৰ কাৰ্যালয়ত কৰ্মচাৰী হিচাপে যোগদান কৰিছিল।^৩৪ ১৯৮৬ চনত চাকৰিৰ কাৰ্যকাল অন্ত পৰাত তেওঁৰ পৰিয়ালে কানাডাত আশ্ৰয় বিচাৰিছিল কাৰণ তেওঁৰ দেউতাকে শ্ৰীলংকাৰ গৃহযুদ্ধৰ সময়ত শ্ৰীলংকান তামিলসকলৰ বিৰুদ্ধে হোৱা হিংসাৰ সমালোচনা কৰিছিল।^৩৫

তেওঁ এক আৰ্থিকভাৱে অসুৰক্ষিত পৰিৱেশত ডাঙৰ-দীঘল হৈছিল। তেওঁৰ দেউতাক সুৰাসক্তি আৰু নিবনুৱা সমস্যাৰ সৈতে যুঁজি আছিল, আৰু মাকৰ ঘৰুৱা কাম-বন কৰি পৰিয়ালটোক সহায় কৰিছিল।^৬৭ ঘৰুৱা খৰচ বহন কৰিবলৈ পলিহপিটিয়ই চৈধ্য বছৰ বয়সত বাৰ্গাৰ কিঙত কাম কৰিছিল। তেওঁ লিজগাৰ কলিজিয়েট ইনষ্টিটিউটত পঢ়িছিল আৰু ১৯৯৯ চনত ৱাটাৰলু বিশ্ববিদ্যালয়ৰ পৰা বৈদ্যুতিক অভিযান্ত্ৰিকী বিষয়ত স্নাতক ডিগ্ৰী লাভ কৰিছিল।^৮৯১০

প্ৰাৰম্ভিক কৰ্মজীৱন

১৯৯৯–২০০৭: ৱিনএম্প আৰু এঅ’এল

স্নাতক ডিগ্ৰী লাভ কৰাৰ পিছত, পলিহপিটিয়ই বিএমঅ’ নেচবিট বাৰ্ঞ্চত এজন ডেৰাইভেটিভছ ট্ৰেডাৰ হিচাপে কাম কৰিছিল। ২০০১ চনত তেওঁ ৱিনএম্পত যোগদান কৰিবলৈ কেলিফৰ্ণিয়াত উপস্থিত হয়।^১১ পৰৱৰ্তী সময়ত এঅ’এলত তেওঁ কোম্পানীটোৰ সৰ্বকনিষ্ঠ উপ-সভাপতি হয় আৰু ২০০৪ চনত ইয়াৰ ইনষ্টেণ্ট মেছেজিং বিভাগৰ নেতৃত্ব দিয়ে।^১২১৩ ২০০৭ চনত ফেইচবুকত যোগদান কৰাৰ পূৰ্বে তেওঁ অলপ সময় মে’ফিল্ড ফাণ্ডত অতিবাহিত কৰিছিল।^১২

২০০৭–২০১১: ফেচবুক

ফেচবুকত পলিহপিটিয়ই ২০০৭ চনত ফেচবুক বিকন মুকলি কৰাৰ কামত নেতৃত্ব দিছিল। বিকন আছিল এটা বিজ্ঞাপন প্ৰণালী যিয়ে তৃতীয় পক্ষৰ ৱেবছাইটত ব্যৱহাৰকাৰীৰ ক্ৰয়-বিক্ৰয় ট্ৰেক কৰিছিল। এই প্ৰণালীটোৱে গোপনীয়তা সম্পৰ্কীয় অভিযোগ আৰু আইনী গোচৰৰ সন্মুখীন হয়, যাৰ ফলত ২০০৯ চনত ইয়াৰ ব্যৱহাৰ বন্ধ কৰি দিয়া হয়। পৰৱৰ্তী সময়ত পলিহপিটিয়ই ফেচবুকৰ ‘বৃদ্ধি’ সংক্ৰান্তীয় পদক্ষেপসমূহৰ নেতৃত্ব দিয়ে। তেওঁৰ কাৰ্যকালতে ২০১২ চনৰ ভিতৰত প্লেটফৰ্মখনে ১০০ কোটি (১ বিলিয়ন) ব্যৱহাৰকাৰীৰ সংখ্যা অতিক্ৰম কৰিছিল।^১৪১৫ ২০১১ চনত কোম্পানী এৰাৰ পূৰ্বে তেওঁ ফেচবুক ফোন আৰু ফেচবুক হোম প্ৰকল্পসমূহৰো নেতৃত্ব দিছিল।^১৬১৭

সাংবাদিক ষ্টিভেন লেভিৰ গ্ৰন্থ Facebook: The Inside Storyত পলিহপিটিয়ৰ ব্যৱস্থাপনা শৈলীক তেওঁৰ প্ৰাক্তন সতীৰ্থসকলে ‘আক্ৰমণাত্মক’ বুলি বৰ্ণনা কৰিছে।^১৮ কিছুমান কৰ্মচাৰীয়ে তেওঁৰ নেতৃত্বত কাম কৰি মানসিক চাপ অনুভৱ কৰা বুলি জনাইছিল।^১৯ পলিহপিটিয়ই এই ধৰণৰ বৰ্ণনাৰ ওপৰত ৰাজহুৱাকৈ কোনো মন্তব্য কৰা নাই।

বিনিয়োগ আৰু দান-বৰঙণি

২০১০ চনত পলিহপিটিয়ই ১০% অংশীদাৰিত্বৰে গ’ল্ডেন ষ্টেট ৱাৰিয়ৰ্ছত এজন সংখ্যালঘু বিনিয়োগকাৰী হিচাপে যোগদান কৰিছিল।^২০ ২০২৩ চনৰ জুন মাহত চীনত উইঘুৰ নিৰ্যাতনৰ সন্দৰ্ভত তেওঁ কৰা মন্তব্যক লৈ সৃষ্টি হোৱা ৰাজহুৱা বিতৰ্কৰ পিছত তেওঁ দলটোৰ পৰা নিজৰ অংশীদাৰিত্ব সম্পূৰ্ণৰূপে প্ৰত্যাহাৰ কৰে।^{২১২২২০} পলিহপিটিয়ই তেওঁৰ শিক্ষানুষ্ঠান ৱাটাৰলু বিশ্ববিদ্যালয়লৈ ধাৰাবাহিকভাৱে অনুদান আগবঢ়াই আহিছে। ২০১৮ চনত তেওঁ অভিযান্ত্ৰিক বিভাগলৈ স্নাতক বৃত্তি আৰু অনুষদৰ গৱেষণাৰ বাবে ২৫ নিযুত ডলাৰ দান কৰিছিল।^২৩ ২০২১ চনত তেওঁ কেলিফৰ্ণিয়াৰ চেণ্ট্ৰেল ভেলীৰ ১,০০০ পৰিয়ালক বিশুদ্ধ খোৱাপানী যোগান ধৰিবলৈ সৌৰশক্তিচালিত এটম’স্ফেৰিক ৱাটাৰ জেনেৰেটৰ (হাইড্ৰ’পেনেল) স্থাপনৰ বাবে ৭ নিযুত ডলাৰৰ প্ৰতিশ্ৰুতি দিছিল।^২৪

ব্যক্তিগত জীৱন

ৱাটাৰলু বিশ্ববিদ্যালয়ৰ পৰা স্নাতক ডিগ্ৰী লাভ কৰাৰ পিছত পলিহপিটিয়ই তেওঁৰ হ’বলগীয়া পত্নী ব্ৰিগেট লাউৰ সৈতে কেলিফৰ্ণিয়ালৈ যায়।^২৫১২ তেওঁলোক বিবাহপাশত আৱদ্ধ হয় আৰু তিনিটা সন্তান জন্ম হয়। ২০১৮ চনত তেওঁলোকৰ বিবাহ বিচ্ছেদ ঘটে।^২৬২৭

২০২৩ চনত পলিহপিটিয়ই ইতালীয় ব্যৱসায়ী কাৰ্যবাহী নাথালী দ’ম্পেৰ সৈতে বিবাহপাশত আৱদ্ধ হয়। তেওঁলোকৰ দুটা সন্তান আছে।^২৮

২০২০ চনত পলিহপিটিয়ই ৭৫ নিযুত ডলাৰ মূল্যৰ এটা ব’ম্বাৰ্ডিয়াৰ গ্ল’বাল ৭৫০০ ব্যক্তিগত বিমান ক্ৰয় কৰিছিল।^২৯