গুৰদীপ কোহলী

গুৰদীপ কোহলী (জন্ম ৩০ জানুৱাৰী ১৯৮০), তেওঁৰ বিবাহিত নাম গুৰদীপ পুঞ্জ নামেৰেও পৰিচিত, এগৰাকী ভাৰতীয় অভিনেত্ৰী যিয়ে হিন্দী টেলিভিছনত কাম কৰে।^১ তেওঁ ‘বেষ্ট অৱ লাক নিক্কি’ত হিমানী সিং, ‘সঞ্জীৱনী’ত ডা° জুহী আৰু ‘কচম ছে’ত বাণী চৰিত্ৰৰ বাবে পৰিচিত।^২

প্ৰাৰম্ভিক আৰু ব্যক্তিগত জীৱন

গুৰদীপ কৌৰ কোহলী পঞ্জাবী মূলৰ মহিলা। তেওঁ মহাৰাষ্ট্ৰৰ মুম্বাইৰ এটা শিখ পৰিয়ালত জন্মগ্ৰহণ কৰিছিল।

কৰ্মজীৱন

টেলিভিছন

গুৰদীপে ভাৰতীয় টেলিভিছনৰ বিজ্ঞাপনৰ মডেল হিচাপে নিজৰ কেৰিয়াৰ আৰম্ভ কৰিছিল। ইয়াৰ পিছত তেওঁ ফাল্গুনী পাঠকৰ সংগীত ভিডিঅ’ "হাইৰে মেৰে হুই গুলাবী"-ত অভিনয় কৰে। তেওঁৰ কেৰিয়াৰৰ আটাইতকৈ গুৰুত্বপূৰ্ণ চৰিত্ৰটো আছিল ‘সঞ্জীৱনী’ৰ ডা° জুহী সিং, যাৰ বাবে তেওঁ যথেষ্ট প্ৰশংসা বুটলিছিল।^৩৪ পিছলৈ তেওঁ জী টিভিৰ ‘সিন্দূৰ তেৰে নাম কা’-ত কাম কৰে। তেওঁ ষ্টাৰ ৱানৰ ‘জেট ছেট গো’ আৰু স্বামী অৰ্জুন পুঞ্জৰ সৈতে ‘নাচ বলিয়ে ২’-ৰ অংশ আছিল। পৰৱৰ্তী সময়ত তেওঁ ‘কচম ছে’-ত প্ৰণিতা ৱালিয়া মিত্ৰৰ চৰিত্ৰত অভিনয় কৰে, যি পিছলৈ বাণী জয় ৱালিয়া বুলি জনা যায়। তেওঁক ‘বেষ্ট অৱ লাক নিক্কি’-ত হিমানী সিং হিচাপে দেখা গৈছিল। তেওঁ জী খানা খাজানাত ‘বাচ্চা পাৰ্টি’ আৰু এবিচি (All 'Bout Cooking) নামৰ নিজা ৰন্ধন অনুষ্ঠানৰ আঁত ধৰিছে। তেওঁ ‘দিয়া ঔৰ বাতী হাম’^৫ আৰু ‘দিল কী বাতেঁ দিল হী জানে’-ত নেতিবাচক চৰিত্ৰত অভিনয় কৰিছিল। তেওঁ জী টিভিৰ শ্ব’ ‘শেঠজী’-ত "শেঠজী" অহল্যা দেৱীৰ চৰিত্ৰত অভিনয় কৰিছিল। তেওঁ অল্ট বালাজীৰ ‘কেহনে কো হমচফৰ হ্যায়’-ত ৰণিত ৰায় আৰু মোনা সিঙৰ সৈতে অভিনয় কৰিছিল। তেওঁ কালাৰ্ছ টিভিৰ ‘দাস্তান-ই-মহব্বত: চেলিম অনাৰকলি’-ত জোধা বাইৰ চৰিত্ৰত অভিনয় কৰিছিল।^৬ ২০১৯ চনৰ ১২ আগষ্টত প্ৰিমিয়াৰ হোৱা ‘সঞ্জীৱনী ২’-ত তেওঁ পুনৰ ডা° জুহী সিঙৰ চৰিত্ৰত অভিনয় কৰে।

২০২৩ চনৰ জুন মাহৰপৰা ২০২৪ চনৰ ছেপ্টেম্বৰ মাহলৈকে তেওঁ ছনী ছাবৰ ৰাজনৈতিক ব্যাৱসায়িক ড্ৰামা ‘বংশজ’-ত ভূমি মহাজনৰ চৰিত্ৰত অভিনয় কৰিছিল।

চলচ্চিত্ৰ

গুৰদীপে ২০১২ চনত প্ৰভু দেৱাই পৰিচালনা কৰা বলিউডৰ ছবি ‘ৰাউডী ৰাঠোৰ’ৰ জৰিয়তে চলচ্চিত্ৰ জগতত আত্মপ্ৰকাশ কৰে।^৭ তেওঁ ২০১৯ চনৰ ছবি ‘ষ্টুডেণ্ট অৱ দ্য ইয়াৰ ২’-তো অনামিকা বাণীৰ চৰিত্ৰত অভিনয় কৰিছিল।

ব্যক্তিগত জীৱন

টেলিভিছন আৰু মডেল হিচাপে কেইবাবছৰো কাম কৰাৰ পাছত, ২০০৬ চনৰ ১০ ডিচেম্বৰত গুৰদীপে তেওঁৰ ‘সঞ্জীৱনী’ৰ সহ-অভিনেতা অৰ্জুন পুঞ্জৰ সৈতে বিবাহপাশত আবদ্ধ হয়। দম্পতীটোৰ দুটাকৈ সন্তান আছে— ২০১০ চনত জন্ম হোৱা মেহৰ নামৰ এগৰাকী কন্যা আৰু ২০১৫ চনত জন্ম হোৱা মাহীৰ নামৰ এজন পুত্ৰ।^৮