গাৰ্গী বেনাৰ্জী

গাৰ্গী বেনাৰ্জী (ইংৰাজী ভাষা: Gargi Banerjee; জন্ম: ২০ জুলাই ১৯৬১) এগৰাকী প্ৰাক্তন টেষ্ট আৰু এদিনীয়া আন্তঃৰাষ্ট্ৰীয় ক্ৰিকেটাৰ যিয়ে ভাৰতীয় মহিলা ৰাষ্ট্ৰীয় ক্ৰিকেট দলক প্ৰতিনিধিত্ব কৰিছিল।^১ তেওঁ ১৯৭৮ চনৰ মহিলা ক্ৰিকেট বিশ্বকাপত ইংলেণ্ডৰ বিৰুদ্ধে ইডেন গাৰ্ডেনত মাত্ৰ ১৬ বছৰ বয়সতে আন্তঃৰাষ্ট্ৰীয় পৰ্যায়ত অভিষেক ঘটায়। আন্তঃৰাষ্ট্ৰীয় পৰ্যায়ত খেলাৰ পূৰ্বে তেওঁ ভাৰতৰ ঘৰুৱা লীগত পশ্চিমবংগৰ হৈ খেলিছিল।

প্ৰাৰম্ভিক জীৱন

এগৰাকী অতি চঞ্চল ছোৱালী আৰু ক্ৰীড়াপ্ৰেমী গাৰ্গীয়ে ৱাই.ডব্লিউ.চি.এ-ত থকাৰ সময়ত বেডমিণ্টন, বাস্কেটবল আৰু ফুটবল খেলিছিল। ক্ৰিকেটৰ ক্ষেত্ৰত তেনেই নতুন গাৰ্গীয়ে ৱাই.ডব্লিউ.চি.এ-ত ক্ৰিকেট ট্ৰায়েলৰ বাবে নাম ভৰ্তি কৰে আৰু ১৯৭৬ চনত ক্ৰিকেট প্ৰশিক্ষণ শিবিৰত যোগদান কৰিবলৈ নিৰ্বাচিত হয়। তেওঁৰ পৰিয়ালে তেওঁক যিকোনো খেল খেলাত সদায় সহায় কৰিছিল। ক্ৰিকেটক পুৰুষৰ খেল বুলি গণ্য কৰা সত্ত্বেও গাৰ্গীৰ ভায়েকে তেওঁক গোটেই সময়ছোৱাত উৎসাহিত কৰিছিল। তেওঁক বংগ দলত অন্তৰ্ভুক্ত কৰা হৈছিল আৰু ২ বছৰৰ ভিতৰতে তেওঁ ১৯৭৮ চনৰ বিশ্বকাপৰ বাবে ৰাষ্ট্ৰীয় দললৈ উন্নীত হৈছিল।^২

ক্ৰিকেট কেৰিয়াৰ

তেওঁ মুঠ ১২খন টেষ্ট আৰু ২৬খন এদিনীয়া মেচ খেলিছিল।^৩ তেওঁৰ নামত এটা বিশেষ অভিলেখ আছে— কেৰিয়াৰত কোনো শতক অৰ্জন নকৰাকৈ টেষ্ট ক্ৰিকেটত সৰ্বাধিক ৰাণ (৬১৪ ৰাণ) কৰা খেলুৱৈ।^৪ নিজৰ ক্ৰিকেট কেৰিয়াৰত তেওঁ প্ৰথম অৱস্থাৰ এদিনীয়া ক্ৰিকেটৰ দুৰ্বল প্ৰদৰ্শন অতিক্ৰম কৰি টেষ্টত মনোনিৱেশ কৰে। তেওঁৰ অভিষেক টেষ্টত ভাৰতে আন পাঁচগৰাকী আৰু অষ্ট্ৰেলিয়াই সাতগৰাকী নতুন খেলুৱৈক ফিল্ডিং কৰাইছিল। সেই ধাৰাবাহিকখনৰ দ্বিতীয় ইনিংছত তেওঁ এটা অৰ্ধশতক অৰ্জন কৰিছিল। কটকত নিউজিলেণ্ডৰ বিৰুদ্ধে ৯ ৰাণত ৬টা উইকেট দখল কৰাৰ পাছত গাৰ্গীক ১৯৮৬ চনত ভাৰতৰ প্ৰথম ইংলেণ্ড ভ্ৰমণৰ বাবে নিৰ্বাচিত কৰা হয়, য’ত তেওঁ ব্লেকপুল টেষ্টত ৬০ আৰু ৭৫ ৰাণ সংগ্ৰহ কৰিছিল।^৫ যদিও সন্ধ্যা আগৰৱালাৰ শতকে গাৰ্গীৰ প্ৰদৰ্শনক কিছু ম্লান কৰিছিল, তথাপিও তেওঁ ১৯৯১ চনত ভাৰতৰ পৰৱৰ্তী ভ্ৰমণৰ বাবে অষ্ট্ৰেলিয়ালৈ গৈছিল।

কৃতিত্ব

তেওঁৰ বেটিংত আপ্লুত হৈ প্ৰয়াত মাধৱৰাও সিন্ধিয়াই গাৰ্গীক ক্ৰিকেটৰ সৈতে জড়িত এটা চাকৰিৰ প্ৰস্তাৱ দিছিল।^২ তেওঁ বিভিন্ন পদত ভাৰতীয় ক্ৰিকেটৰ সৈতে জড়িত হৈ ভাৰতত মহিলা ক্ৰিকেটৰ মানদণ্ড উন্নত কৰাত সহায় কৰিছিল।^৬ ভাৰতীয় মহিলা ক্ৰিকেট দলৰ নিৰ্বাচনী সমিতিৰ অধ্যক্ষা (২০১১-২০১৪) হিচাপে তেওঁ উদীয়মান মহিলা ক্ৰিকেটাৰসকলক সুযোগ দিছিল। গাৰ্গীয়ে অনুভৱ কৰিছিল যে যুৱ খেলুৱৈসকলে যিমানে বেছি মেচ খেলিব, সিমানেই তেওঁলোকে ঘৰুৱা আৰু আন্তঃৰাষ্ট্ৰীয় খেলৰ পাৰ্থক্য বুজি পাব।^৭ ২০১৭ চনৰ এপ্ৰিল মাহত তেওঁক বিখ্যাত মাৰিলেবন ক্ৰিকেট ক্লাবৰ (MCC) সন্মানীয় আজীৱন সদস্যপদ প্ৰদান কৰা হয়। ক্ৰিকেটাৰ হোৱাৰ সপোন দেখা যুৱতীসকলৰ বাবে অনুপ্ৰেৰণা গাৰ্গী বেনাৰ্জীয়ে আজিও ক্ৰিকেটক কেৰিয়াৰ হিচাপে গঢ়িবলৈ আগ্ৰহী ছোৱালীসকলক উৎসাহ দি আহিছে।