কায়ৰা দত্ত

কায়ৰা দত্ত (ইংৰাজী ভাষা: Kyra Dutt) এগৰাকী ভাৰতীয় অভিনেত্ৰী আৰু মডেল যিয়ে মূলতঃ হিন্দী ভাষা চলচ্চিত্ৰত অভিনয় কৰে।^১ তেওঁ ২০১৩ চনৰ বিখ্যাত কিংফিচাৰ কেলেণ্ডাৰৰ এগৰাকী মডেল আছিল।^২ তেওঁ দেৱী দত্ত নামেৰেও পৰিচিত।

তেওঁ ৰকেট সিং: চেলছমেন অৱ দ্য ইয়াৰ (২০০৯) ছবিত ৰণবীৰ কাপুৰৰ বিপৰীতে এটা সৰু চৰিত্ৰৰ জৰিয়তে অভিনয় জগতত আত্মপ্ৰকাশ কৰিছিল আৰু মেৰে ব্ৰাদাৰ কি দুলহান (২০১১) নামৰ ছবিখনৰ এটা বিশেষ গীতত অভিনয় কৰিছিল। পৰৱৰ্তী সময়ত তেওঁ কেলেণ্ডাৰ গাৰ্লছ (২০১৫) ছবিত মুখ্য অভিনেত্ৰী হিচাপে অভিনয় কৰে।

ৰেচ গুৰম নামৰ ছবিখনৰ "বুচাডে বুচাডে" গীতটোৰ বাবে তেওঁ তেলুগু ভাষা দৰ্শকৰ মাজত যথেষ্ট জনপ্ৰিয়।^৩

প্ৰাৰম্ভিক জীৱন

কায়ৰা দত্তৰ জন্ম হৈছিল কলকাতাত। তেওঁ লা মাৰ্টিনিয়াৰ কলকাতাৰপৰা বিদ্যালয়ৰ শিক্ষা গ্ৰহণ কৰিছিল।

কেৰিয়াৰ (২০০৯-বৰ্তমান)

কায়ৰাই কিংফিচাৰ, মাৰ্চিডিজ, থামছ আপ, ক্লজ-আপ, এইচচিএল লেপটপ, ৱাইল্ড ষ্টোন ডিঅ’ আদি ব্ৰেণ্ডৰ বিজ্ঞাপনত কাম কৰিছে।

২০০৯ চনত ৰকেট সিং: চেলছমেন অৱ দ্য ইয়াৰ ছবিত ৰণবীৰ কাপুৰৰ বিপৰীতে এটা সৰু চৰিত্ৰত অভিনয় কৰাৰ পাছত তেওঁ দক্ষিণ ভাৰতীয় ছবিত কেইবাটাও বিশেষ গীতত (item song) অভিনয় কৰে। ইয়াৰ পিছত তেওঁ কেলেণ্ডাৰ গাৰ্লছ (২০১৫) ছবিত মুখ্য অভিনেত্ৰী হিচাপে আত্মপ্ৰকাশ কৰে। পৰৱৰ্তী সময়ত তেওঁ বালাজী টেলিফিল্মছৰ সৈতে এখন চুক্তিত স্বাক্ষৰ কৰে, যাৰ অধীনত তেওঁ ৱেব চিৰিজ এক্সএক্সএক্স (XXX)-ত অভিনয় কৰে।^৪

২০১৬ চনত তেওঁ টি-চিৰিজৰ "পাৰ্টি এনিমেলছ" নামৰ এটা একক গীতত অভিনয় কৰে, যিটো যথেষ্ট জনপ্ৰিয় হৈছিল।^৫৬

২০১৭ চনৰ ফেব্ৰুৱাৰীত এক্সএক্সএক্স ছবিখন মুক্তিৰ ক্ষেত্ৰত বিলম্ব হোৱাৰ বাবে তেওঁ বালাজী টেলিফিল্মছৰ সৈতে থকা চুক্তি সমাপ্ত কৰে।^৭৮ পিছলৈ তেওঁ লোনলী গাৰ্ল (Lonely Girl) নামৰ এখন চুটি ছবিত অভিনয় কৰে, যিখন ২০১৭ চনৰ ২৩ ফেব্ৰুৱাৰীত পোনে পোনে ইউটিউবত সম্প্ৰচাৰিত হৈছিল।^৯ পৰৱৰ্তী সময়ত ২০১৭ চনৰ জুন মাহৰ আৰম্ভণিতে তেওঁ পুৰী জগন্নাথৰ তেলুগু ছবি পইচা বছুলত এটা বিশেষ গীতত অভিনয় কৰিবলৈ চুক্তিবদ্ধ হয়, কিন্তু অৱশেষত তেওঁ ইয়াত এচিপি কিৰণময়ীৰ চৰিত্ৰত অভিনয় কৰে যিয়ে ছদ্মবেশত এগৰাকী বাৰ ডান্সাৰ হিচাপে কাম কৰে।^১০

২০১৮ চনত তেওঁ FFACE ফেশ্বন কেলেণ্ডাৰৰ কভাৰ হিচাপে চুক্তিবদ্ধ হৈছিল।