ওলকবি

ওলকবি (Kohlrabi; বৈজ্ঞানিক নাম: Brassica oleracea Gongylodes Group), হৈছে কবি গোত্ৰৰ ভিতৰত অন্যতম এবিধ দ্বিবৰ্ষীয় পাচলি। ওলকবিৰ একে প্ৰজাতিৰ পাচলি হ'ল বন্ধাকবি, ফুলকবি, ব্ৰকলি আদি।^১

পৰিচিতি আৰু বিৱৰণ

ওলকবি শীতকালৰ অন্যান্য পাচলিবোৰতকৈ কিছু টান প্ৰকৃতিৰ পাচলি। ইয়াৰ কাণ্ড অস্বাভাৱিকভাৱে ডাঙৰ আৰু প্ৰায় গোলাকাৰ হয়। ই Brassica oleracea প্ৰজাতিৰে এটা খেতি কৰা ৰূপ, যি বনৰীয়া কবিৰপৰা কৃত্ৰিম নিৰ্বাচনৰ জৰিয়তে বিকশিত হৈছে।^২

ইয়াৰ সোৱাদ আৰু গাঁথনি বহু পৰিমাণে ব্ৰকলিৰ কাণ্ড বা বন্ধাকবিৰ ভিতৰৰ কোমল অংশটোৰ দৰে, কিন্তু ই তুলনামূলকভাৱে মৃদু আৰু মিঠা হয়। কোমল ওলকবি আপেলৰ দৰে মচমচীয়া আৰু ৰসাল হ’ব পাৰে। কেঁচাকৈ চালাড আদিত ইয়াৰ ব্যৱহাৰ কৰা হয়। ইয়াৰ কাণ্ডৰ লগতে পাতো খাব পাৰি।

সাধাৰণতে সৰু অৱস্থাত সংগ্ৰহ কৰা ওলকবি অধিক কোমল হয়। ডাঙৰ হোৱাৰ লগে লগে কিছুমান জাতৰ কাণ্ড কাঠৰ দৰে টান হ’ব পাৰে। অৱশ্যে ‘Gigante’ নামৰ জাতটোৱে তুলনামূলকভাৱে ডাঙৰ আকাৰতো ভাল খাদ্যমান বজাই ৰাখিব পাৰে।

ইতিহাস

ইউৰোপীয় ইতিহাসত ওলকবিৰ প্ৰথম বৰ্ণনা ইটালীয়ান উদ্ভিদবিজ্ঞানী পিয়েট্ৰ' আন্দ্ৰিয়া মাটিঅ'লিয়ে ১৫৫৪ চনত কৰিছিল। তেওঁ উল্লেখ কৰিছিল যে এই পাচলিবিধ অলপতে ইটালীলৈ আহিছিল।^৩

ওলকবি তুলনামূলকভাৱে আধুনিকভাৱে বিকশিত হোৱা Brassica oleracea-ৰ এটা খেতি কৰা ৰূপ। ইয়াৰ দৰে বিভিন্ন কবি-জাত বনৰীয়া কবিৰপৰা নিৰ্দিষ্ট বৈশিষ্ট্যৰ বাবে কৃত্ৰিম নিৰ্বাচনৰ জৰিয়তে বিকশিত হৈছে।^৪

ইংলেণ্ডত ওলকবিৰ ব্যাপক খেতি ঊনবিংশ শতিকাৰ শেষৰফালে আৰম্ভ হৈছিল।^৫

জাত আৰু সময়

কেইবাপ্ৰকাৰৰ ওলকবিৰ খেতি কৰা হয়। তাৰ ভিতৰত উল্লেখনীয় হ’ল— মিৰাকল, অনুপম, এক্সপ্ৰেছ মল্লিকা এফ-১, আৰ্লি মল্লিকা এফ-১, বাম্পাৰ হাৰ্ভেষ্ট এফ-১, নিমজিন এফ-১, ক্ৰান্তি এফ-১, ইউনিক বল এফ-১ ইত্যাদি। ওলকবিৰ পাতল সেউজীয়া ৰঙৰ জাতটো হৈছে আৰ্লি হোৱাইট ভিয়েনা আৰু বেঙুনীয়া ৰঙৰ জাতটো হৈছে আৰ্লি পাৰ্পল ভিয়েনা। বেঙুনীয়া জাতটোৰ কেৱল ওপৰৰ আৱৰণটোহে বেঙুনীয়া হয়, ভিতৰৰ অংশটো পাতল হালধীয়া বা বগা বৰণৰেই থাকে।

পুষ্টিগুণ

কেঁচা ওলকবিত প্ৰায় ৯১% পানী, ৬% কাৰ্ব'হাইড্ৰেট, ২% প্ৰটিন আৰু অতি কম পৰিমাণে চৰ্বি থাকে। প্ৰতি ১০০ গ্ৰাম ওলকবিয়ে প্ৰায় ২৭ কেলৰি শক্তি যোগান ধৰে। ই ভিটামিন চিৰ এক উল্লেখযোগ্য উৎস আৰু ইয়াত কেলচিয়াম, মেগনেচিয়াম, পটাচিয়াম, লৌহ, তাম আৰু কেইবাটাও ভিটামিন থাকে।^৬

ওলকবিত খাদ্য আঁহ আৰু বিভিন্ন উদ্ভিদজাত জৈৱ-সক্ৰিয় যৌগো পোৱা যায়।^৭

ব্যৱহাৰ আৰু প্ৰস্তুত প্ৰণালী

ওলকবিৰ কাণ্ডটো আঁহযুক্ত কঠিন স্তৰেৰে আবৃত হৈ থাকে। সেয়েহে ইয়াক ৰন্ধাৰ বাবে বা কেঁচাকৈ চালাডত ব্যৱহাৰ কৰাৰ আগতে বাকলিটো এৰুৱাই লোৱা হয়। ইয়াৰ কাণ্ড সাধাৰণতে চালাড, বিভিন্ন পাচলিৰ ব্যঞ্জন আৰু অন্যান্য খাদ্য প্ৰস্তুতিত ব্যৱহাৰ কৰা হয়।

ইয়াৰ পাতবোৰো খাব পাৰি আৰু বিভিন্ন পাতশাকৰ দৰে ৰান্ধি খাব পাৰি। কাণ্ডটো ব্ৰকলিৰ কাণ্ডৰ সৈতে গাঁথনিগতভাৱে মিল আছে যদিও ইয়াৰ সোৱাদ তুলনামূলকভাৱে মৃদু আৰু মিঠা।

কাশ্মীৰী ব্যঞ্জনত ওলকবি Monji নামেৰে পৰিচিত আৰু ইয়াৰ পাতক haakh নামেৰে ব্যৱহাৰ কৰা হয়। চাইপ্ৰাছতো ওলকবি কেঁচাকৈ নিমখ আৰু নেমুৰ ৰসৰ সৈতে পৰিৱেশন কৰা হয়।

অপকাৰিতা

কিছুমান লোকৰ ক্ষেত্ৰত ওলকবি বা Brassica গোত্ৰৰ অন্যান্য পাচলিৰ প্ৰতি খাদ্য-অসহিষ্ণুতা বা এলাৰ্জিক প্ৰতিক্ৰিয়া হ'ব পাৰে। এনে প্ৰতিক্ৰিয়া দেখা দিলে চিকিৎসকৰ পৰামৰ্শ লোৱা উচিত।