এণ্ড্ৰিউ গাৰফিল্ড

এণ্ড্ৰিউ ৰাছেল গাৰফিল্ড^১ ১৯৮৩ চনৰ ২০ আগষ্টত জন্ম লাভ কৰা আমেৰিকা আৰু য়ুনাইটেড কিংদমৰ দ্বিনাগৰিকত্ব সম্পন্ন এক অভিনেতা।। লছ এঞ্জেলছত জন্ম লাভ কৰা আৰু ছাৰেত ডাঙৰ দীঘল হোৱা গাৰফিল্ডে ২০০৫ চনত ব্ৰিটিছ টেলিভিছনযোগে অভিনয় জীৱনৰ অভিষেক ঘটাই আৰু ২০০৭ চনত বিবিছিৰ ডক্টৰ হুত অভিনয় কৰি খ্যাতি লাভ কৰে। প্ৰথমাৱস্থাত তেওঁ লায়ন্স ফৰ লেম্বছ (২০০৭), বয় এ (২০০৭)(যাৰ বাবে তেওঁ শ্ৰেষ্ঠ অভিনেতাৰ বাফটা বঁটা লাভ কৰে), কল্পনাধৰ্মী ছবি দ্য ইমাজিনেৰিয়াম অফ ডক্টৰ পাৰ্ণাছাছ (২০০৯) আদিত সহঃ ভূমিকাত অভিনয় কৰে।

২০১০ চনত কল্পবিজ্ঞান ভিত্তিক ছবি নেভাৰ লেট মী গ’ আৰু দ্য ছ’ছিয়েল নেটৱৰ্কত অভিনয় কৰি তেওঁ সমালোচকৰ দৃষ্টি আকৰ্ষণ কৰে আৰু পিছৰখনৰ বাবে গোল্ডেন গ্লোব আৰু বাফটা বঁটাৰ মনোনয়ন লাভ কৰে। পূৰ্বৰ স্পাইডাৰমেন শৃংখলাৰ নৱনিৰ্মাণ দ্য অমেইজিং স্পাইডাৰমেন (২০১২)ত পিটাৰ পাৰ্কাৰ/স্পাইডাৰমেনৰ চৰিত্ৰত অভিনয় কৰি তেওঁ জনপ্ৰিয়তা লাভ কৰে। ২০১৪ চনত মুক্তি পাবলগীয়া দ্য অমেইজিং স্পাইডাৰমেন ২তো তেওঁ এই ভূমিকাত অভিনয় কৰিব।

প্ৰাৰম্ভিক জীৱন

লছ এঞ্জেলছত জন্ম গ্ৰহণ কৰা গাৰফিল্ডৰ মাক আছিল এছেক্সৰ এক ব্ৰিটিছ আৰু দেউতাক আছিল কেলিফ’ৰ্ণিয়াৰ এক আমেৰিকান।^২৩ তেওঁৰ তিনি বছৰ বয়সতে তেওঁলোকৰ পৰিয়াল ব্ৰিটেইনত থাকিবলৈ লয়^২ আৰু এক "মধ্যবিত্ত ঘৰ"ত তেওঁৰ লালন পালন হয়।^৪ তেওঁৰ মাক-দেউতাকে অন্তৰ্মহল সাজ-সজ্জাৰ এক সৰু ব্যৱসায় চলাইছিল; তেওঁৰ মাক লীনে^৫ এখন সৰু ল’ৰা ছোৱালীৰ বিদ্যালয়ত শিক্ষয়িত্ৰীৰ কাম কৰিছিল আৰু দেউতাক ৰিচাৰ্ড গাৰফিল্ড গীল্ডফ’ৰ্ড সাঁতোৰ সন্থাৰ প্ৰধান প্ৰশিক্ষক আছিল।^৬৭ তেওঁৰ এজন ককায়েক আছে যি এজন ডাক্তৰ।^৮ ইংলেণ্ডৰ ছাৰেত ডাঙৰ হোৱা গাৰফিল্ড আগবয়সত এক ব্যায়ামবিদ আৰু সাঁতোৰবিদ আছিল।^৩৬ প্ৰথমাৱস্থাত বাণিজ্য পঢ়াৰ মন থাকিলেও ষোল্ল বছৰ বয়সত তেওঁৰ মন অভিনয়ৰ প্ৰতি ঢাল খায়।^৯

গাৰফিল্ডে প্ৰথমতে প্ৰায়’ৰী প্ৰিপেৰটৰী স্কুল আৰু পিছলৈ ছিটি অৱ লণ্ডন ফ্ৰীমেন্স স্কুলত শিক্ষাগ্ৰহণ কৰে আৰু শেষত ২০০৪ চনত চেণ্ট্ৰেল স্কুল অৱ স্পীচ্চ অৱ ড্ৰামা,য়ুনিভাৰ্ছিটি অৱ লণ্ডনৰ পৰা স্নাতক ডিগ্ৰী লাভ কৰে।^৬১০

কৰ্মজীৱন

আৰম্ভণি (২০০৪–২০০৯)

বাৰ বছৰ বয়সত গাৰফিল্ডে গীল্ডফ’ৰ্ডত অভিনয়ৰ প্ৰশিক্ষণ লয় আৰু ২০০৪ চনত এক মঞ্চ অভিনেতা হিচাপে অভিনয় জীৱনৰ আৰম্ভণি কৰে।^৮১১ ২০০৫চনত গাৰফিল্ডে ব্ৰিটিছ টেলিভিছনৰ চেনেল ফ’ৰত প্ৰচাৰিত হোৱা ছুগাৰ ৰাশ্ব অনুষ্ঠানৰ জৰিয়তে টেলিভিছন জগতত প্ৰৱেশ কৰে।^১১ ২০০৭ চনত বিবিছিৰ ডক্টৰ হু শৃংখলাত অভিনয় কৰি তেওঁ সকলোৰে দৃষ্টি আকৰ্ষণ কৰে^১২ আৰু সেই বছৰৰে নৱেম্বৰ লায়্ন্স ফ’ৰ লেম্বছত টম ক্ৰুজ,মেৰীল ষ্ট্ৰীপ আদিৰ লগত অভিনয় কৰি আমেৰিকাত অভিনয় জীৱনৰ পাতনি মেলে।^১৩১৪

নৱেম্বৰ,২০০৭ত গাৰফিল্ডে চেনেল ফ’ৰৰ ধাৰাবাহিক বয় এত অভিনয় কৰে^১৫ আৰু ২০০৮ বৰ্ষৰ ব্ৰিটিছ একাডেমী টেলিভিছন এৱাৰ্ডৰ শ্ৰেষ্ঠ অভিনেতাৰ বঁটা লাভ কৰে।^১৫১৬ ২০০৮ চনত তেওঁ দ্য আডাৰ ব’লীন গাৰ্ল নামৰ ছবিখনত এটি সৰু চৰিত্ৰত অভিনয় কৰে।^১৩ ২০০৯ চনত গাৰফিল্ডে দ্য ইমেজিনেৰিয়াম অৱ ডক্টৰ পাৰ্ণাছাছ নামৰ চলচ্চিত্ৰত আৰু ৰেড ৰাইডিং টেলিভিছন ত্ৰিল’জীত অভিনয় কৰে।^৪১৭ লছ এঞ্জেলছ টাইমছৰ সমালোচক কেনেথ টুৰাণে শেষৰ খনত তেওঁৰ অভিনয়ক প্ৰশংসা কৰে।^১৭

নেভাৰ লেট মী গ’ আৰু দ্য ছ’ছিয়েল নেটৱৰ্ক (২০০৯–২০১০)

"তেওঁ বৰ অনুভূতিশীল যুৱক যিয়ে সেই অনুভূতিপ্ৰৱণতাক কৌশল আৰু ব্যৱসায়িকতালৈ ৰূপান্তৰ কৰিব পাৰিছে,আৰু তেওঁৰ সুন্দৰ অভিনয় তাৰেই ফলাফল।^১৮
— —মাৰ্ক ৰ’মানেক,যিয়ে গাৰফিল্ডক নেভাৰ লেট মী গ’ত নিৰ্দেশ কৰিছিল।^১৮

২০১০ চনত তেওঁ কল্পবিজ্ঞানভিত্তিক চলচ্চিত্ৰ নেভাৰ লেট মী গ’ত অভিনয় কৰে।^{১৯২০২১} ইয়াৰ বাবে তেওঁ ২০১০ চনত সহঃ-অভিনেতাৰ ছেটাৰ্ণ বঁটা লাভ কৰে।^২২ দ্য গাৰ্ডিয়ানৰ টম প্ৰেষ্টনে গাৰফিল্ডৰ অভিনয়ক "সমযে সময়ে মনোমুগ্ধকৰ" বুলি কয়।^২৩

২০১০ চনত গাৰফিল্ডে দ্য ছ’ছিয়েল নেটৱৰ্ক ছবিত এডুৱাৰ্ডো ছেভেৰিণৰ চৰিত্ৰত অভিনয় কৰে যিয়ে হাৰ্ভাৰ্ডত পঢ়ি থাকোঁতে সহপাঠী মাৰ্ক জাকাৰবাৰ্গৰ লগত লগ হৈ ফেইচবুকৰ জন্ম দিছিল।^১৮ গাৰফিল্ডে কয় যে এক বাস্তৱ ব্যক্তিৰ চৰিত্ৰত অভিনয় কৰিবলৈ পায় তেওঁ "এক গধূৰ দায়িত্ব বহন কৰা" যেন লাগিছিল।^১৮ ইয়াত কৰা অভিনয়ৰ জৰিয়তে গাৰফিল্ডে বিশ্বজোৰা খ্যাতি আৰু জনপ্ৰিয়তা লাভ কৰে আৰু শ্ৰেষ্ঠ সহঃ-অভিনেতা আৰু শ্ৰেষ্ঠ ঊৰ্ধগামী তাৰকাৰ বাফটা বঁটা তথা শ্ৰেষ্ঠ সহঃ-অভিনেতাৰ গোল্ডেন গ্লোব বঁটাৰ মনোনয়ন লাভ কৰে।^২৪২৫ বিবিচিৰ মাৰ্ক কাৰ্মোডে গাৰফিল্ডে অস্কাৰ বঁটাৰ মনোনয়ন নোপোৱাত অসন্তুষ্টি প্ৰকাশ কৰে।^২৬ লছ এঞ্জেলছ টাইমছ, এণ্টাৰটেইনমেণ্ট ৱিকলী, দ্য নিউ য়ৰ্কাৰ আদি আলোচনীয়েও গাৰফিল্ডৰ অভিনয়ৰ প্ৰশংসা কৰে।^{২৭২৮২৯}

দ্য অমেইজিং স্পাইডাৰমেন (২০১০–বৰ্তমানলৈ)

"I see it as a massive challenge in many ways... To make it authentic. To make the character live and breathe in a new way. The audience already has a relationship with many different incarnations of the character. I do, as well. I'm probably going to be the guy in the movie theater shouting abuse at myself. But I have to let that go. No turning back. And I wouldn't want to."
— —Garfield on accepting the role of Peter Parker / Spider-Man.^৩০

মাৰ্চ, ২০১২ত গাৰফিল্ডে ডেথ অৱ এ ছেলছ্মেন নাটৰ জৰিয়তে ব্ৰডৱে থিয়েটাৰত অভিনয়ৰ পাতনি মেলে আৰু শ্ৰেষ্ঠ অভিনেতাৰ টনী এৱাৰ্ড লাভ কৰে।^৩১৩২ ইয়াৰ পিছত গাৰফিল্ডে মাৰ্ক ৱেবৰ দ্য অমেইজিং স্পাইডাৰমেনত এম্মা ষ্ট’নৰ বিপৰীতে পিটাৰ পাৰ্কাৰ/স্পাইডাৰমেনৰ চৰিত্ৰত অভিনয় কৰে।^{৩৩৩৪৩৫} গাৰফিল্ডে কয় যে প্ৰথমবাৰ স্পাইডাৰমেনৰ সাজযোৰ পিন্ধোতে তেওঁৰ চকুপানী ওলাইছিল আৰু সেই সাজযোৰত তেওঁ কোনো "যোগ্য মানুহা"ক কল্পনা কৰিছিল।^৩৬ অৱশ্যে গাৰফিল্ডৰ অভিনয়ে উচ্চ প্ৰসংসা লাভ কৰে।^৩৭ স্লেট মেগাজিন ৰ ডেনা ষ্টিভান্সৰ মতে গাৰফিল্ডে চৰিত্ৰটিক আগতকৈ অধিক আৱেদনময়ী আৰু অধিক ৰহস্যময় কৰি তোলে।^৩৮ ২০১২ চনৰ ছেপ্টেম্বৰ মাহত ঘোষণা কৰা হয় যে পৰৱৰ্তী স্পাইডাৰমেন চলচ্চিত্ৰটো গাৰফিল্ডে অভিনয় কৰিব।^৩৯৪০ ইয়াৰ উপৰিও গাৰফিল্ডে একে নামৰ উপন্যাসৰ পৰা নিৰ্মাণ হ’বলগীয়া ছাইলেন্স নামৰ ছবি খনত ফাডাৰ ৰড্ৰিগজৰ চৰিত্ৰত অভিনয় কৰিব।^৪১

ব্যক্তিগত জীৱন

এণ্ড্ৰিউ গাৰফিল্ড আমেৰিকা আৰু য়ুনাইটেড কিংদম উভয় দেশৰে নাগৰিক। ^৪২৪৩ ২০০৯ চনত ছানডে’ হেৰাল্ডক দিয়া এক সাক্ষাত্কাৰত তেওঁ কয় "দুয়োখন দেশকেই মই ঘৰ বুলি ভাবো। কোনোবা এঠাইত থাকি কম ভাল লাগে বা বেছি ভাল লাগে বুলি ভবাৰ পৰিৱৰ্তে সংস্কৃতিৰ এই বিভিন্নতা মই উপভোগ হে কৰোঁ"।^৪২ তেওঁ নিজৰ ব্যক্তিগত জীৱনৰ কথাবোৰ ৰাজহুৱা নকৰে আৰু সমলিংগৰ বিবাহক সমৰ্থন কৰে।^{৪৪৪৫৪৬} দ্য অমেইজিং স্পাইডাৰমেনত গাৰফিল্ডে এম্মা ষ্ট’নৰ সৈতে অভিনয় কৰাৰ পিছত দুয়োৰে মাজত এক মধূৰ সম্পৰ্ক গঢ় লৈ উঠে।^৪৭ 2012 ত য়ুএছএ টুডেৰ সৈতে হোৱা এক সাক্ষাত্কাৰত গাৰফিল্ডে কয়, "বৰ্তমান আমি দুয়ো কেৱল সহঃশিল্পী। শীঘ্ৰেই এম প্ৰযোজকো হ’ব। এয়া কিছু ব্যক্তিগত কথা আৰু এয়াই আমাৰ কাম"।^৪৪ আনহাতে এই বিষয়ত ষ্ট’নে কয়: "এইটো কথা জানি এক প্ৰশান্তি পোৱা যায় যে তুমি যি কোৱা তাত কেৱল তোমাৰহে নিয়ন্ত্ৰণ আছে। মানুহেতো যি মন যায় তাকে কয়। তোমাৰ নিজৰ মুখেৰে নোলোৱালৈকে তোমাৰ মনৰ কথা কোনেও জানিব নোৱাৰে। "।^৪৪

চলচ্চিত্ৰপঞ্জী

কথাছবি

টেলিভিছন

থিয়েটাৰ