আয়া উৱেটো

আয়া উৱেটো (Aya Ueto; জন্ম: ১৪ ছেপ্টেম্বৰ ১৯৮৫) এগৰাকী জাপানী ভাষা অভিনেত্ৰী, গায়িকা আৰু টেলিভিছন ব্যক্তিত্ব। ১৯৯৭ চনত উৱেটোৱে সপ্তম জাপান বিছোজো প্ৰতিযোগিতাত অংশগ্ৰহণ কৰি বিশেষ জুৰী বঁটা লাভ কৰিছিল।^১ ইয়াৰ ঠিক পিছতেই উৱেটোৱে অস্কাৰ প্ৰমচন নামৰ টেলেণ্ট এজেঞ্চীত যোগদান কৰে আৰু গীত, নৃত্য আৰু অভিনয়ৰ প্ৰশিক্ষণ ল’বলৈ আৰম্ভ কৰে। ১৯৯৯ চনত তেওঁ আন তিনিগৰাকী সহযোগীৰ সৈতে মিলি 'জেড-১' নামৰ এটা ছোৱালীৰ বেণ্ড গঠন কৰে। ২০০২ চনত এই গোটটো ভাঙি যায় আৰু সেই বছৰৰে শেষৰফালে উৱেটোৱে পনি কেনিয়নৰ সৈতে চুক্তিবদ্ধ হৈ তেওঁৰ প্ৰথমটো একক গীত "পিউৰনেছ" মুকলি কৰে। তেতিয়াৰেপৰা তেওঁ পাঁচখন ষ্টুডিঅ' এলবাম মুকলি কৰিছে আৰু তেওঁৰ দহটা গীত 'অৰিকন'ৰ শীৰ্ষ দহটা একক গীতৰ তালিকাত স্থান লাভ কৰিছে।

তেৰ বছৰ বয়সত উৱেটোৱে ১৯৯৯ চনৰ থ্ৰিলাৰ ছবি চাৎচুজিনশ্বা: কিলাৰ অৱ পেৰাইচো-ৰ জৰিয়তে অভিনয়ত আত্মপ্ৰকাশ কৰে। ২০০১ চনত উৱেটোৱে টিবিএছৰ নাটক ৩-নেন বি-গুমি কিন্পাচি-চেনচেই-ৰ ষষ্ঠ ছিজনত অভিনয় কৰে। লিংগ ডিছফ’ৰিয়া থকা এগৰাকী হাইস্কুলীয়া ছাত্ৰীৰ চৰিত্ৰত তেওঁ কৰা অভিনয়ে সমালোচকৰ প্ৰশংসা লাভ কৰে আৰু ইয়াৰ ফলত তেওঁ কেইবাটাও মুখ্য ভূমিকা আৰু বিজ্ঞাপনত কাম কৰাৰ সুযোগ পায়। ইয়াৰদ্বাৰাই উৱেটো জাপানৰ এগৰাকী অতি পৰিচিত মুখ হিচাপে প্ৰতিষ্ঠিত হয়।^২ ২০০৪ চনৰপৰা উৱেটোৱে পাঁচবাৰকৈ বাৰ্ষিক 'চিএম কুইন' (বিজ্ঞাপনৰ ৰাণী) খিতাপ দখল কৰিছে।^৩ উৱেটোৱে দুটাকৈ টেলিভিছন ড্ৰামা একাডেমী বঁটা জয় কৰিছে— এটা ২০০৪ চনত স্পৰ্টছ ড্ৰামা ছিৰিজ এচ অ' নেৰায়ে! -ত শ্ৰেষ্ঠ অভিনেত্ৰীৰ বাবে আৰু আনটো ২০১০ চনত ধাৰাবাহিক নাগাৰেবোশ্বি-ত শ্ৰেষ্ঠ সহ অভিনেত্ৰীৰ বাবে। ইয়াৰ পিছত তেওঁ এটেনচন প্লিজ (২০০৬) ৰ ৰিমেক, বেংকিং ড্ৰামা হানজাওয়া নাওকি (২০১৩) আৰু হিৰুগাও (২০১৪)-ত অভিনয় কৰে।^৪

উৱেটোৱে ২০০৩ চনত ৰিউহেই কিটামুৰাৰ ব্লকবাষ্টাৰ ছবি আজুমি-ৰ জৰিয়তে ডাঙৰ পৰ্দাত ভৰি দিয়ে, যাৰ বাবে তেওঁ জাপান একাডেমী বঁটাৰ শ্ৰেষ্ঠ অভিনেত্ৰীৰ মনোনয়ন লাভ কৰিছিল। ইয়াৰ পিছত তেওঁ ইয়াৰ ছিকুৱেল আজুমি ২: ডেথ অৰ লাভ (২০০৫) আৰু মাৰি ইয়ামাজাকিৰ মাংগা ধাৰাবাহিকৰ আধাৰত নিৰ্মিত ছবি থাৰ্মে ৰোমাই (২০১২)-ত অভিনয় কৰে।^৫ ২০১৭ চনত উৱেটোৱে ধাৰাবাহিক হিৰুগাও-ৰ চলচ্চিত্ৰ সংস্কৰণত অভিনয় কৰিছিল।

জীৱনী

আয়া উৱেটোৰ জন্ম টকিঅ'ৰ নেৰিমাত হৈছিল।^৬ তেওঁৰ পিতৃ হোক্কাইডোৰ চুটচুৰ আৰু মাতৃ ওকিনৱাৰ ইশ্বিগাকি দ্বীপৰ নিবাসী আছিল।^৭ উৱেটোৱে অভিনয় জগতত আত্মপ্ৰকাশ কৰাৰ কিছুসময়ৰ পাছতে তেওঁৰ পিতৃ-মাতৃৰ বিবাহ বিচ্ছেদ হয়। তিনিটা সন্তানৰ ভিতৰত তেওঁ মাজু আছিল; তেওঁৰ এজন ককায়েক (শুন) আৰু এজন ভায়েক (মাকোটো) আছে।^৬ তুলনামূলকভাৱে এটা দৰিদ্ৰ পৰিয়ালত ডাঙৰ-দীঘল হোৱাৰ পিছতো উৱেটোৱে পিয়ানো, আধুনিক বেলে নৃত্য, সন্তৰণ আৰু জিমনাষ্টিকছ শিকিছিল।^১

ব্যক্তিগত জীৱন

সম্পৰ্ক আৰু বিবাহ

উৱেটোৱে ২০১০ চনৰ এপ্ৰিল মাহত বিচ্ছেদ হোৱাৰ পূৰ্বে আঠ বছৰ ধৰি 'ভি-৬' বেণ্ডৰ জাপানী গায়ক আৰু অভিনেতা গো মৰিটাৰ সৈতে ডেটিং কৰিছিল।^৮ ২০১০ চনৰ অক্টোবৰ মাহত বাতৰি প্ৰকাশ পাইছিল যে তেওঁ 'এক্সাইল' বেণ্ডৰ নেতা হিৰোৰ সৈতে সম্পৰ্কত আছে।^৯ ২০১২ চনৰ ছেপ্টেম্বৰ মাহত উৱেটোৱে তেওঁৰ অফিচিয়েল ৱেবছাইটত পোষ্ট কৰা এটা হাতে লিখা পত্ৰৰ জৰিয়তে ঘোষণা কৰে যে তেওঁ আৰু হিৰোৱে উৱেটোৰ ২৭সংখ্যক জন্মদিনত বিবাহ পঞ্জীয়ন কৰিছে।^১০

২০১৫ চনৰ ১৯ আগষ্টত উৱেটো আৰু তেওঁৰ স্বামীয়ে তেওঁলোকৰ প্ৰথম সন্তান, এগৰাকী কন্যা সন্তানক আদৰণি জনায়।^১১১২ চৰকাৰী সংবাদ মাধ্যমে ঘোষণা কৰিছিল যে ২০১৯ চনৰ ২৭ জুলাইত এই দম্পতীয়ে তেওঁলোকৰ দ্বিতীয় সন্তান, এজন পুত্ৰ সন্তানক আদৰণি জনাইছে।^১৩ ২০২৩ চনৰ ২২ জুনত তেওঁ তেওঁলোকৰ তৃতীয় সন্তান আৰু দ্বিতীয় পুত্ৰ জন্ম দিয়ে।^১৪

পৰোপকাৰ

২০১১ চনৰ এপ্ৰিল মাহত উৱেটোৱে অভিজ্ঞ অভিনেতা টেটছুয়া ৱাটৰী আৰু হিৰোশ্বি টাচিৰ সৈতে মিলি ২০১১ চনৰ তোহোকু ভূমিকম্প আৰু চুনামিৰ ফলত ক্ষতিগ্ৰস্ত মিয়াগি প্ৰদেশৰ ইশ্বিনোমাকিৰ দুৰ্যোগত আক্ৰান্ত লোকসকলক খাদ্য আৰু অন্যান্য সাহায্য সামগ্ৰী বিতৰণ কৰিছিল।^১৫

অন্যান্য

উৱেটো গায়িকা বেকীৰ ঘনিষ্ঠ বন্ধু। ২০০০ চনত মৰ্নিং শ্ব’ ওহা ষ্টাৰ-ত লগ পোৱাৰ পিছৰেপৰা দুয়ো একেলগে টেলিভিছনত দেখা দি আহিছে।