অসম শক্তি উৎপাদন নিগম লিমিটেড

অসম শক্তি উৎপাদন নিগম লিমিটেড (Assam Power Generation Corporation Limited; চমুকৈ APGCL) হৈছে অসম চৰকাৰধীন ৰাজহুৱা খণ্ডৰ এক উদ্যোগ। পূৰ্বৰ অসম ৰাজ্যিক বিদ্যুৎ পৰিষদক পুনৰ্গঠন কৰি ২০০৩ চনত বিদ্যুৎ আইন'২০০৩ৰ অধীনত এই কোম্পানীটোৰ জন্ম দিয়া হয়। ব্যৱসায়িক কাম-কাজ আৰম্ভ হয় ২৯ এপ্ৰিল ২০০৪ৰ পৰা।

অসম ৰাজ্যত প্ৰয়োজন হোৱা বিদ্যুতৰ চাহিদা পূৰাবলৈ সৰ্বোচ্চ পৰিমাণৰ বিদ্যুৎ শক্তিৰ উৎপাদন কৰাটোৱেই এই বিশেষ কোম্পানীৰ মুখ্য উদ্দেশ্য।^১ বৰ্তমান কোম্পানীৰ নিজা উৎপাদন হৈছে ৩৮০.২ মেগাৱাট। ইয়াৰে ৩০% উৎপাদন জল-বিদ্যুৎ প্ৰকল্প আৰু ৭০% উৎপাদন তাপ বিদ্যুৎ প্ৰকল্পৰ পৰা আহৰণ কৰা হয়।^২

লক্ষ্য

কোম্পানীৰ লক্ষ্য হৈছে "বহনক্ষম ভিত্তিত আৰু প্ৰতিযোগিতামূলক মূল্যত নিৰ্ভৰযোগ্য আৰু মানবিশিষ্ট বিদ্যুৎ শক্তি উপলব্ধ কৰোৱা।"^৩

কাৰ্যক্ষম প্ৰকল্প

বৰ্তমান সময়ত এই কোম্পানীৰ অধীনত পাঁচটা সৰু-বৰ প্ৰকল্প কাৰ্যক্ষম হৈ আছে। সেইকেইটা হৈছে-

1. নামৰূপ তাপ বিদ্যুৎ কেন্দ্ৰ, ডিব্ৰুগড়। (৯৯.৫ মেগাৱাট)
2. লাকুৱা তাপ বিদ্যুৎ কেন্দ্ৰ, চৰাইদেউ। (৯৭.২ মেগাৱাট)
3. লাকুৱা তাপ বিদ্যুৎ প্ৰকল্প, চৰাইদেউ। (৭০ মেগাৱাট)
4. কাৰ্বি লাংপি জল-বিদ্যুৎ প্ৰকল্প। (১০০ মেগাৱাট)
5. মিনট্ৰিয়াং ক্ষুদ্ৰ জল-বিদ্যুৎ প্ৰকল্প (দ্বিতীয় পৰ্যায়)। (১৩.৫ মেগাৱাট)^৪

নিৰ্মীয়মান প্ৰকল্প

নামৰূপৰ বিদ্যুৎ কেন্দ্ৰস্থিত বৰ্তমানৰ ঠাইতে এটা নতুন ১০০ মেগাৱাট শক্তিসম্পন্ন প্ৰকল্পৰ নিৰ্মাণ কৰি থকা হৈছে। নামৰূপ প্ৰতিষ্ঠাপন শক্তি প্ৰকল্প হিচাপে ইয়াৰ নামকৰণ কৰা হৈছে।^৫

বিশেষ পদাধিকাৰী

বৰ্তমান এপিজিচিএলৰ অধ্যক্ষ হৈছে বিনোদ কুমাৰ পিপাৰছেনিয়া আৰু শ্ৰীমতি কল্যাণী বৰুৱা হৈছে শক্তি উৎপাদন কোম্পানীটোৰ পৰিচালন সঞ্চালক।^৬