অসমীয়া বনৰীয়া চিকা

অসমীয়া বনৰীয়া চিকা (Assam mole shrew, Anourosorex assamensis) কেৱল উত্তৰ-পূব ভাৰতত দেখা পোৱা এটা চিকাজাতীয় জন্তু।^১ এই জন্তুবিধৰ বিষয়ে বৈজ্ঞানিক তথ্য তেনেই সীমিত। কিন্তু জন্তুবিধ অসমকে ধৰি উত্তৰ পূৰ্বাঞ্চলত বহুলভাৱে বিস্তৃত বুলি ধাৰণা কৰা হয়।^২

বিস্তৃতি

অসম, মেঘালয়, মণিপুৰ, নাগালেণ্ড আৰু অৰুণাচল প্ৰদেশত ই স্থানিক জন্তু। জন্তুবিধ এই ৰাজ্যকেইখনত সাগৰ পৃষ্ঠৰ ১৫০০-৩১০০ মিটাৰ পৰ্য্যন্ত উচ্চতাত দেখা পোৱা যায়।^২

আচৰণ

অসমীয়া বনৰীয়া চিকাই গাতৰ ভিতৰত বাস কৰে। জন্তুবিধ প্ৰাকৃতিক আৰু নগৰীয়া দুয়োবিধ পৰিবেশতে সহজে অভিযোজিত হৈ পৰা দেখা যায়। অধোক্ৰান্তীয় আৰু ক্ৰান্তীয় অৰণ্যৰ উপৰিও শিলাময় গুহা আৰু নলা-নৰ্দমাতো এই চিকাই বাস কৰে। এই বনৰীয়া চিকাৰ জনসংখ্যা সম্পৰ্কে কোনো তথ্য উপলব্ধ হোৱা নাই।^২