ৰিচা ঘোষ

ৰিচা ঘোষ (ইংৰাজী: Richa Ghosh; জন্ম: ২৮ ছেপ্টেম্বৰ ২০০৩) এগৰাকী ভাৰতীয় আন্তঃৰাষ্ট্ৰীয় ক্ৰিকেটাৰ। তেওঁ ভাৰতীয় মহিলা জাতীয় দলত উইকেট-কীপাৰ বেটাৰ হিচাপে খেলি থাকে।^১ ঘৰুৱা ক্ৰিকেটত বংগ আৰু মহিলা প্ৰিমিয়াৰ লীগত ৰয়েল চেলেঞ্জাৰ বেংগালুৰু দলক প্ৰতিনিধিত্ব কৰে। ২০২৫ চনৰ মহিলা ক্ৰিকেট বিশ্বকাপ, ২০২২ চনৰ মহিলা এছিয়া কাপ, ২০২২ চনৰ এছিয়ান গেমছত স্বৰ্ণ পদক আৰু ২০২৩ চনৰ অনুৰ্ধ্ব-১৯ টি২০ বিশ্বকাপ জয় কৰা ভাৰতীয় দলৰ অংশ আছিল।

কেৰিয়াৰ

২০২০ চনত, মাত্ৰ ১৬ বছৰ বয়সতে, ঘোষক ২০২০ চনৰ আইচিচি মহিলা টি২০ বিশ্বকাপৰ বাবে ভাৰতৰ দলত অন্তৰ্ভুক্ত কৰা হৈছিল।^২৩৪ একে মাহতে তেওঁ ২০২০ চনৰ ত্ৰিদেশীয় শৃংখলাৰ বাবেও ভাৰতৰ দলত স্থান লাভ কৰে।^৫ ১২ ফেব্ৰুৱাৰী ২০২০ তাৰিখে অষ্ট্ৰেলিয়াৰ বিৰুদ্ধে ত্ৰিশৃংখলাৰ অন্তিম খেলত তেওঁ মহিলা টি২০ আন্তঃৰাষ্ট্ৰীয়ত অভিষেক কৰে।^৬

মে’ ২০২১ত তেওঁ প্ৰথমবাৰৰ বাবে কেন্দ্ৰীয় চুক্তি লাভ কৰে।^৭

আগষ্ট ২০২১ত অষ্ট্ৰেলিয়া ভ্ৰমণৰ বাবে ভাৰতৰ দলত অন্তৰ্ভুক্ত কৰা হয়।^৮৯১০ ২১ ছেপ্টেম্বৰ ২০২১ তাৰিখে অষ্ট্ৰেলিয়াৰ বিৰুদ্ধে মহিলা এদিনীয়া আন্তঃৰাষ্ট্ৰীয়ত অভিষেক কৰে।^১১

২০২১–২২ চনৰ মহিলা বিগ বেছ লীগ মৌচুমত তেওঁ হ’বাৰ্ট হাৰিকেইনছৰ হৈ খেলিছিল।^১২ জানুৱাৰী ২০২২ত নিউজিলেণ্ডত অনুষ্ঠিত মহিলা এদিনীয়া বিশ্বকাপৰ বাবে ভাৰতৰ দলত স্থান লাভ কৰে।^১৩

২০২৩ চনৰ মহিলা প্ৰিমিয়াৰ লীগৰ নিলামত তেওঁ ১.৯০ কোটি টকাত ৰয়েল চেলেঞ্জাৰ বেংগালুৰুৰ সৈতে চুক্তিবদ্ধ হয়।^১৪

ডিচেম্বৰ ২০২৩ত অষ্ট্ৰেলিয়াৰ বিৰুদ্ধে শৃংখলাৰ বাবে ভাৰতৰ দলত অন্তৰ্ভুক্ত কৰা হয়।^১৫ ২১ ডিচেম্বৰ ২০২৩ তাৰিখে মহিলা টেষ্টত অভিষেক কৰে।^১৬ ২০২৪ চনৰ আইচিচি মহিলা টি২০ বিশ্বকাপৰ বাবেও ভাৰতৰ দলত অন্তৰ্ভুক্ত হয়।^১৭

১৯ ডিচেম্বৰ ২০২৪ তাৰিখে পশ্চিম ইণ্ডিজৰ বিৰুদ্ধে তৃতীয় টি২০ত তেওঁ যুগ্ম-দ্ৰুততম অৰ্ধশতকৰ অভিলেখ গঢ়ে।^১৮

২০২৫ চনৰ মহিলা ক্ৰিকেট বিশ্বকাপত দক্ষিণ আফ্ৰিকাৰ বিৰুদ্ধে তেওঁ ৯৪ ৰান সংগ্ৰহ কৰি ৮ নম্বৰ স্থানত সৰ্বাধিক ৰানৰ অভিলেখ গঢ়ে।^১৯২০

খেলপথাৰৰ বাহিৰত

২০২৫ চনৰ ৪ ডিচেম্বৰ তাৰিখে পশ্চিম বংগ আৰক্ষীত সন্মানীয় উপ-আৰক্ষী অধীক্ষক হিচাপে নিযুক্তি লাভ কৰে।^২১