ৰাকেশ কুমাৰ

ৰাকেশ কুমাৰ (Rakesh Kumar, জন্ম ১৩ জানুৱাৰী ১৯৮৫) এগৰাকী ভাৰতীয় পেৰা-ধনুৰ্বিদ।^১ তেওঁ পুৰুষৰ কম্পাউণ্ড অপেন প্ৰতিযোগিতাত প্ৰতিদ্বন্দ্বিতা কৰে।^২ ২০২৪ চনত পেৰিছত অনুষ্ঠিত গ্ৰীষ্মকালীন পেৰালিম্পিকত তেওঁ ভাৰতক প্ৰতিনিধিত্ব কৰিবলৈ যোগ্যতা অৰ্জন কৰে।^৩ ২০২৪ চনৰ পেৰিছ পেৰালিম্পিকত তেওঁ শীতল দেৱীৰ সৈতে আৰ্চাৰীৰ মিশ্ৰিত দল কমপাউণ্ড প্ৰতিযোগিতাত ব্ৰঞ্জৰ পদক অৰ্জন কৰে।

খেলুৱৈ জীৱন

তেওঁ জাপানৰ টকিঅ'ত অনুষ্ঠিত ২০২০ চনৰ গ্ৰীষ্মকালীন পেৰালিম্পিকত ভাৰতক প্ৰতিনিধিত্ব কৰিছিল।^৪৫ ২০২১ চনৰ ফেব্ৰুৱাৰী মাহত ডুবাইত অনুষ্ঠিত হোৱা ৭ম ফাজ্জা পেৰা আৰ্চাৰী বিশ্ব ৰেংকিং প্ৰতিযোগিতাৰ পুৰুষৰ কম্পাউণ্ড অপেন শাখাত তেওঁ সোণৰ পদক লাভ কৰে।^৬৭ তেওঁ ভাৰতৰ সৰ্বোচ্চ ৰেংকিঙৰ কম্পাউণ্ড আৰ্চাৰ আৰু তেওঁৰ বিশ্ব ৰেংকিং ১১ নং স্থানত আছে।^৪

ৰাকেশ কুমাৰ ২০১৮ চনত ইউৰোপীয় চাৰ্কিট ২য় লেগত দলীয় প্ৰতিযোগিতাত সোণৰ পদক লাভ কৰা দলৰ অংশ আছিল। লগতে তেওঁ ২০১৯ চনত ৫ম ফাজ্জা পাৰা আৰ্চাৰী বিশ্ব ৰেংকিং প্ৰতিযোগিতাত মিশ্ৰিত দলীয় ইভেণ্টত ব্ৰঞ্জৰ পদক লাভ কৰা দলটোৰ অংশ আছিল।^৪

তেওঁ শ্ৰী মাতা বৈষ্ণো দেৱী শ্ৰাইন ব'ৰ্ডৰ ক্ৰীড়া কমপ্লেক্সত প্ৰশিক্ষণ লৈছিল আৰু তেওঁ জম্মুৰ কাটৰাৰ বাসিন্দা।^৮৯

২০২৪ চনত পেৰিছত অনুষ্ঠিত গ্ৰীষ্মকালীন পেৰালিম্পিকত তেওঁ ভাৰতক প্ৰতিনিধিত্ব কৰিছিল। এই প্ৰতিযোগিতাত তেওঁ শীতল দেৱীৰ সৈতে অপেন মিশ্ৰিত দল কম্পাউণ্ড প্ৰতিযোগিতাত ব্ৰঞ্জৰ পদক লাভ কৰে।