স্বপ্না বৰ্মন

স্বপ্না বৰ্মন ( Swapna Barman; জন্ম: ২৯ অক্টোবৰ ১৯৯৬) এগৰাকী ভাৰতীয় হেপ্টাথ্লীট। ২০১৮ চনৰ এছিয়ান গেমছত সোণৰ পদক লাভ কৰাৰ লগতে ২০১৭ চনৰ এছিয়ান এথলেটিকছ চেম্পিয়নশ্বিপত হেপ্টাথলনত প্ৰথম স্থান লাভ কৰে।^১ ২০১৯ চনৰ আগষ্ট মাহত তেওঁক অৰ্জুন বঁটাৰে সন্মানিত কৰা হয়।^২ ২০২২ চনত ভাৰতীয় ৰাষ্ট্ৰীয় গেমছত হাই জাম্প আৰু হেপ্টাথলনত স্বৰ্ণ পদক লাভ কৰিছিল।

কৃতিত্ব

বৰ্মনৰ জন্ম হৈছিল ১৯৯৬ চনত পশ্চিম বংগৰ জলপাইগুৰিৰ ওচৰৰ ঘোষপাৰা গাঁৱৰ এটা দৰিদ্ৰ ৰাজবংশী পৰিয়ালত।^৩ অস্বাভাৱিক যদিও তেওঁৰ প্ৰতিখন ভৰিত ছটাকৈ আঙুলি আছিল।^৪ মাতৃ বসনা চাহ বাগিচাত কাম কৰিছিল আৰু পিতৃ পঞ্চানন বৰ্মন ৰিক্সাচালক আছিল আৰু ২০১৩ চনত ষ্ট্ৰোকত আক্ৰান্ত হৈ শয্যাশায়ী আছিল, যাৰ ফলত তেওঁৰ চাৰিটা সন্তানৰ জীৱন ধাৰণ সমস্যা হৈ পৰিছিল। স্বপ্নাই সেয়ে পৰিমিত খাদ্য পোৱাত অসুবিধা পাইছিল^১ আৰু তেওঁৰ অস্বাভাৱিক ভৰি দুখন অতিৰিক্ত সমস্যাৰ কাৰণ হৈ পৰিছিল, কাৰণ তেওঁ দৌৰিবৰ বাবে বহল দৌৰৰ জোতা কিনিব নোৱাৰিছিল।^৪ স্বপ্নাই নিজৰ পুৰস্কাৰৰ ধনেৰে কেঁচা বেৰৰ ঘৰত থকা পৰিয়ালটো চোৱাচিতা কৰে।^৫ ২০১৬ চনত তেওঁ এথলেটিকছত লাভ কৰা সফলতাৰ স্বীকৃতি স্বৰূপে ১৫০,০০০ টকাৰ জলপানি লাভ কৰে।^৪ তেওঁ কলকাতাৰ স্প’ৰ্টছ অথৰিটি অৱ ইণ্ডিয়া কেম্পাছত প্ৰশিক্ষণ লয়।

২০১৬ চনত ৰাহুল দ্ৰাবিড় এথলীট মেণ্টৰশ্বিপ প্ৰগ্ৰেমৰ জৰিয়তে গ'স্প'ৰ্টছ ফাউণ্ডেচনে তেওঁক সহায় কৰে।^৪

২০১৮ চনৰ এছিয়ান গেমছত সোণৰ পদক লাভ কৰিছিল বৰ্মনে, থুঁতৰিৰ আঘাতৰ পিছতো তেওঁ এই সফলতা লাভ কৰিছিল।^৬ ২০১৭ চনৰ এছিয়ান এথলেটিকছ চেম্পিয়নশ্বিপৰ অন্তিম ইভেণ্ট – মহিলা হেপ্টাথলন^১ যিটো আছিল ৮০০ মিটাৰ য'ত তেওঁ চতুৰ্থ স্থান লাভ কৰিছিল। কিন্তু বৰ্মনে তেওঁৰ বহু ব্যক্তিগত অভিলেখ ভংগ কৰিছিল আৰু তেওঁ পূৰ্বৰ ছটা ইভেণ্টৰ পৰা সোণৰ পদক লাভ কৰিবলৈ যথেষ্ট পইণ্ট লাভ কৰিছিল।^১

২০২১ চনৰ ফেডাৰেচন কাপ চিনিয়ৰ এথলেটিকছ চেম্পিয়নশ্বিপত হেপ্টাথলনত সোণৰ পদক লাভ কৰাৰ লগতে ২০২২ চনত ৰাষ্ট্ৰীয় গেমছত হেপ্টাথলনত অংশগ্ৰহণ কৰে। ১.৮৩ মিটাৰ উচ্চতাৰে হাই জাম্প গেমছৰ অভিলেখ ভংগ কৰি অভাৱনীয় সোণৰ পদক লাভ কৰে। জেভেলিন আৰু ১০০ মিটাৰ হাৰ্ডলছতো প্ৰথম স্থান লাভ কৰিছিল। হেপ্টাথলনৰ বাবে সোণৰ পদক লাভ কৰি তেওঁ জনাইছিল যে যদি তেওঁৰ কিছুমান সহায়ক কৰ্মচাৰীৰ পৃষ্ঠপোষকতা থাকিলহেঁতেন, তেন্তে তেওঁ আৰু অধিক স্ক'ৰ কৰিলেহেঁতেন।^৭