সৌন্দৰ্য প্ৰতিযোগিতা

সৌন্দৰ্য প্ৰতিযোগিতা (ইংৰাজী ভাষা: Beauty pageant) হ’ল এনে এক প্ৰতিযোগিতা য’ত প্ৰতিযোগীসকলক বিভিন্ন শাৰীৰিক আৰু মানসিক গুণাগুণৰ ওপৰত ভিত্তি কৰি বিচাৰ আৰু স্থান নিৰ্ধাৰণ কৰা হয়। নাম অনুসৰি, সৌন্দৰ্য প্ৰতিযোগিতাসমূহে পৰম্পৰাগতভাৱে প্ৰতিযোগীৰ শাৰীৰিক আকৰ্ষণীয়তাৰ বিচাৰত গুৰুত্ব দিয়ে, কেতিয়াবা কেৱল ইয়াৰ ওপৰতে ভিত্তি কৰি; কিন্তু বেছিভাগ আধুনিক সৌন্দৰ্য প্ৰতিযোগিতাই এতিয়া প্ৰতিযোগীসকলক "আভ্যন্তৰীণ সৌন্দৰ্য"ৰ ওপৰত ভিত্তি কৰিও বিচাৰ কৰিবলৈ পৰিসৰ বৃদ্ধি কৰিছে—য’ত তেওঁলোকৰ ব্যক্তিত্ব, বুদ্ধিমত্তা, প্ৰতিভা, নৈতিক চৰিত্ৰ আৰু দান-বৰঙণি আদি ব্যক্তিগত বৈশিষ্ট্যসমূহ অন্তৰ্ভুক্ত থাকে। যদিও ইয়াক সাধাৰণতে মহিলাকেন্দ্ৰিক প্ৰতিযোগিতা হিচাপে গণ্য কৰা হয়, তথাপিও পুৰুষৰ সৌন্দৰ্য প্ৰতিযোগিতা আৰু শিশুসকলৰ বাবেও সৌন্দৰ্য প্ৰতিযোগিতা দেখা পোৱা যায়।

সৌন্দৰ্য প্ৰতিযোগিতা শব্দটোৱে মূলতঃ চাৰিটা প্ৰধান সৌন্দৰ্য প্ৰতিযোগিতাক বুজায়: মিছ ইউনিভাৰ্ছ, মিছ ৱৰ্ল্ড, মিছ ইণ্টাৰনেশ্যনেল আৰু মিছ আৰ্থ।^১২৩ বছৰি হাজাৰ হাজাৰ সৌন্দৰ্য প্ৰতিযোগিতা অনুষ্ঠিত হয়,^৪ কিন্তু এই চাৰিটা প্ৰতিযোগিতাক আটাইতকৈ মৰ্যাদাপূৰ্ণ বুলি গণ্য কৰা হয়,^৫ আৰু সংবাদ মাধ্যমত এইসমূহৰ ব্যাপক চৰ্চা তথা সম্প্ৰচাৰ কৰা হয়।^৬৭ একেবাৰে প্ৰথম আনুষ্ঠানিক সৌন্দৰ্য প্ৰতিযোগিতাসমূহ ১৯ শতিকাত অনুষ্ঠিত হৈছিল, যদিও অনুৰূপ অনানুষ্ঠানিক অনুষ্ঠানসমূহ অন্ততঃ উত্তৰ-ধ্ৰুপদী যুগৰে পৰা চলি আহিছে। আধুনিক সৌন্দৰ্য প্ৰতিযোগিতাসমূহ প্ৰথমে ২০ শতিকাৰ আৰম্ভণিতে প্ৰতিষ্ঠা কৰা হৈছিল আৰু ২০ শতিকাৰ মাজভাগত আন্তঃৰাষ্ট্ৰীয় প্ৰতিযোগিতাসমূহৰ প্ৰতিষ্ঠাৰ দ্বাৰা ইয়াৰ জনপ্ৰিয়তা বৃদ্ধি পাইছিল। ২১ শতিকাত এই প্ৰতিযোগিতাসমূহৰ সংস্কাৰে কেৱল শাৰীৰিক চেহেৰাৰ ওপৰত গুৰুত্ব দিয়াৰ পৰিৱৰ্তে অন্যান্য বৈশিষ্ট্যসমূহক অধিক গুৰুত্ব দিবলৈ আৰম্ভ কৰে।

সৌন্দৰ্য প্ৰতিযোগিতাসমূহ সাধাৰণতে বহুতৰপীয়া হয়, য’ত স্থানীয় প্ৰতিযোগিতাসমূহে ডাঙৰ প্ৰতিযোগিতাসমূহৰ বাবে প্ৰতিযোগী নিৰ্বাচন কৰে; উদাহৰণস্বৰূপে, আন্তঃৰাষ্ট্ৰীয় প্ৰতিযোগিতাসমূহৰ বাবে হাজাৰ হাজাৰ স্থানীয় প্ৰতিযোগিতা অনুষ্ঠিত হয়। প্ৰতিখন প্ৰতিযোগিতাৰ উদ্যোক্তাসকলে প্ৰতিযোগিতাৰ নিয়মসমূহ নিৰ্ধাৰণ কৰিব পাৰে, য’ত প্ৰতিযোগীৰ বয়সৰ সীমাও অন্তৰ্ভুক্ত থাকে। নিয়মানুসৰি প্ৰতিযোগীসকল অবিবাহিত হোৱাৰ লগতে তেওঁলোকৰ চৰিত্ৰ শুদ্ধ হোৱা, অপেশাদাৰী হোৱা আৰু অন্যান্য চৰ্তৰ উপৰিও প্ৰচাৰৰ বাবে উপলব্ধ হোৱাটো প্ৰয়োজনীয় হ’ব পাৰে। ইয়াৰ উপৰিও আনুষ্ঠানিক সাজ-পাৰ, সাতুৰিবলৈ ব্যৱহাৰ কৰা পোছাক, খেলৰ সাজ-পাৰ বা ডিজাইনাৰ কাপোৰৰ দৰে সাজ-পাৰৰ মানদণ্ডও নিৰ্ধাৰণ কৰিব পাৰে যাৰ ওপৰত প্ৰতিযোগীসকলক বিচাৰ কৰা হ’ব। সৌন্দৰ্য প্ৰতিযোগিতাসমূহৰ সম্ভাব্য পুৰস্কাৰসমূহৰ ভিতৰত খিতাপ, টিয়ৰা, মুকুট, চেছ, ফুলৰ থোপা, ৰাজদণ্ড, সঞ্চয় বণ্ড, জলপানি আৰু নগদ ধন অন্তৰ্ভুক্ত থাকিব পাৰে।^৮ সৌন্দৰ্য প্ৰতিযোগিতাৰ বিজয়ীক সাধাৰণতে মহিলাৰ ক্ষেত্ৰত 'বিউটি কুইন' আৰু পুৰুষৰ ক্ষেত্ৰত 'বিউটি কিং' বুলি কোৱা হয়। প্ৰতিযোগিতাৰ বিভাগসমূহৰ মাজত পাৰ্থক্য স্পষ্ট কৰিবলৈ প্ৰায়ে মিছ, মিচেছ বা এম এছ আৰু টিন (Teen) আদি খিতাপত ভাগ কৰা হয়। প্ৰতিযোগীসকলৰ স্থান নিৰ্ধাৰণক প্লেচমেণ্ট বুলি কোৱা হয়।^৯