সীমা পৰিহাৰ

সীমা পৰিহাৰ এগৰাকী ভাৰতীয় ৰাজনীতিবিদ আৰু প্ৰাক্তন ডকাইত। তেওঁ সমাজবাদী পাৰ্টিৰ সদস্য আছিল।^১ পৰিহৰে দাবী কৰে যে তেওঁৰ প্ৰেৰণা হৈছে ফুলন দেৱী, যি দস্যুৰাণী হিচাপে পৰিচিত আছিল আৰু ৰাজনীতিবিদ হোৱাৰ আগতে ডকাইত আছিল।^১ সীমাই ২০১০ চনত বিগ বছত প্ৰতিযোগী হিচাপে অংশগ্ৰহণ কৰিছিল।

জীৱনী

সীমা পৰিহাৰৰ জন্ম হৈছিল ভাৰতৰ উত্তৰ প্ৰদেশৰ ঔৰীয়াত এটা দৰিদ্ৰ পৰিয়ালত। ১৯৮৩ চনত উত্তৰ প্ৰদেশৰ বাৱিনে নামৰ গাঁৱৰপৰা ১৩ বছৰ বয়সত ডকাইত লালা ৰাম আৰু কুছুমা নিয়ানে তেওঁক অপহৰণ কৰি নিয়ে আৰু পিছত নিজেই ডকাইত হৈ পৰে।^২ ১৯৮৬ চনত ডকাইত নিৰ্ভয় সিং গুজ্জাৰৰ সৈতে বিবাহপাশত আবদ্ধ হয় যদিও পিছলৈ লালা ৰামলৈ উভতি যায়।^৩ পৰিহাৰ তেওঁৰ দলটোৰ নেতা হৈ পৰে, আৰু বিহাণ্ড জংঘল আৰু চম্বল নদীৰ আশে-পাশে থকা অঞ্চলত লুণ্ঠন, অপহৰণ আৰু হত্যাকাণ্ডত লিপ্ত হয়।^২৪ কেৰিয়াৰৰ সময়ছোৱাত ৭০ জন লোকক হত্যা, ২০০ জন লোকক অপহৰণ কৰাৰ লগতে ৩০টা ঘৰ লুট-পাত কৰে। ২০০০ চনৰ জুন মাহত ১৮ বছৰ ধৰি ডকাইতি কৰাৰ পাছত উত্তৰ প্ৰদেশ আৰক্ষীৰ ওচৰত আত্মসমৰ্পণ কৰে।^২৫ ৮টা হত্যা আৰু আধা ডজন অপহৰণকে ধৰি ২৯টা অভিযোগৰ সন্মুখীন হ'বলগীয়া হয়।^১৬ ২০০১ চনৰ আগষ্ট মাহত তেওঁ কয় যে তেওঁ ৰাজনৈতিক দলসমূহৰপৰা প্ৰস্তাৱ লাভ কৰিছে।^৬

২০০২ চনৰ উত্তৰ প্ৰদেশ বিধানসভা নিৰ্বাচনত পৰিহাৰে শিৱসেনাক সমৰ্থন কৰে।^৫ ২০০৬ চনৰ নৱেম্বৰ মাহত তেওঁ ভাৰতীয় ন্যায় পাৰ্টিত যোগদান কৰে,^৭ আৰু ২০০৭ চনত মিৰ্জাপুৰ-ভাদোহী লোকসভাৰ উপ-নিৰ্বাচনৰ প্ৰাৰ্থী হিচাপে প্ৰতিদ্বন্দ্বিতা কৰে।^১৮

২০০৮ চনৰ জানুৱাৰী মাহত তেওঁ লোক জনশক্তি পাৰ্টিলৈ যায় আৰু সেই বছৰৰ অক্টোবৰ মাহত সমাজবাদী পাৰ্টিলৈ স্থানান্তৰিত হয়।^৫ ২০০৮ চনৰ অক্টোবৰ মাহলৈকে তেওঁৰ বিৰুদ্ধে থকা ১৫টা অপৰাধমূলক গোচৰৰপৰা তেওঁক দোষমুক্ত কৰা হৈছিল আৰু বাকী ১৪টা গোচৰৰ বাবে জামিনত আছিল।^৫

২০১১ চনত সীমা পৰিহাৰক দুৰ্নীতি বিৰোধী সংস্থা ৰাষ্ট্ৰীয় দুৰ্নীতি নিৰ্মূলকৰণ পৰিষদৰ মহিলা শাখাৰ মুৰব্বী হিচাপে নিযুক্তি দিয়া হয়।^৯

জনপ্ৰিয় সংস্কৃতি

সীমা পৰিহাৰে ৱাউণ্ডেড - দ্য বেণ্ডিট কুইন ছবিখনত অভিনয় কৰিছিল। এই ছবিখন হিন্দী চিনেমাৰ প্ৰথম দৃষ্টান্ত য'ত এগৰাকী "দস্যুৰাণীয়ে" নিজৰ বাস্তৱ জীৱনৰ কাহিনী পৰ্দাত অভিনয় কৰিছিল। ২০০৬ চনত চাম্বল উপত্যকাৰ স্থানত শ্বুট কৰা এই ছবিখনে ২০০৫ চনত লেষ্টাৰ এক্সপ' বলীউড চলচ্চিত্ৰ মহোৎসৱ (যুক্তৰাজ্য)ত সমালোচক বঁটা লাভ কৰে।^১০ ২০১০ চনত সীমা পৰিহৰে ভাৰতীয় ৰিয়েলিটি টিভি শ্ব’ বিগ বছৰ ৪ নং ছিজনতো অংশগ্ৰহণ কৰে। এই অনুষ্ঠানটো ২০১০ চনৰ ৩ অক্টোবৰৰপৰা কালাৰছত প্ৰচাৰিত হয় আৰু পৰিহাৰক ৭৬ দিনত (১১ সপ্তাহ) ঘৰৰপৰা উচ্ছেদ কৰা হয়।^১১ বিগ বছত অংশগ্ৰহণ কৰাৰ পূৰ্বে সীমা পৰিহাৰ জেলত আছিল আৰু এই কাৰ্যসূচীত হাজিৰ হোৱাৰ অনুমতি বিচাৰি এলাহাবাদ উচ্চ ন্যায়ালয়ত আবেদন দাখিল কৰিছিল। এলাহাবাদ উচ্চ ন্যায়ালয়ে প্ৰথমে তেওঁৰ হাজিৰ হোৱাৰ আবেদন নাকচ কৰিছিল।^১২