শিৱালিকা ওবেৰয়

শিৱালিকা ওবেৰয় (জন্ম: ২৪ জুলাই ১৯৯৫)^১ — এগৰাকী ভাৰতীয় অভিনেত্ৰী যিয়ে হিন্দী ভাষা চলচ্চিত্ৰত অভিনয় কৰে।^২ তেওঁৰ প্ৰাৰম্ভিক অভিনয় জীৱনৰ কামসমূহৰ ভিতৰত য়ে চালী আশিকী (২০১৯) আৰু খোদা হাফিজ (২০২০) অন্যতম।^৩৪

প্ৰাৰম্ভিক জীৱন আৰু শিক্ষা

ওবেৰয়ৰ মাতৃ চাৰিনা ওবেৰয় এগৰাকী শিক্ষয়িত্ৰী আছিল। তেওঁৰ ককাক মহাবীৰ ওবেৰয় (যাৰ মৃত্যুৰ সময়ত শিৱালিকাৰ পিতৃ অতি কম বয়সীয়া আছিল) ১৯৬৭ চনত চেবা এণ্ড হাৰকিউলিচ নামৰ এখন বলিউডৰ ছবি নিৰ্মাণ কৰিছিল।^৫

ওবেৰয়ে মুম্বাইৰ আৰ্য বিদ্যা মন্দিৰ স্কুল আৰু জামনাবাই নাৰ্চী স্কুলত শিক্ষা গ্ৰহণ কৰিছিল। তেওঁ মুম্বাই বিশ্ববিদ্যালয়ৰপৰা ইংৰাজী আৰু মনোবিজ্ঞান বিষয়ত স্নাতক ডিগ্ৰী লাভ কৰে। স্নাতক ডিগ্ৰী লাভ কৰি থকাৰ সময়তে তেওঁ অনুপম খেৰৰ এক্টিং ইনষ্টিটিউট অ্যাক্টৰ প্ৰিপেয়াৰ্ছৰপৰা ৩ মহীয়া ডিপ্লমা পাঠ্যক্ৰম সম্পন্ন কৰিছিল।^৫

কেৰিয়াৰ

স্নাতক ডিগ্ৰী লাভ কৰাৰ অলপ পাছতেই তেওঁ নাদিয়াডৱালা গ্ৰেণ্ডছন এণ্টাৰটেইনমেণ্টত কাম কৰিবলৈ আৰম্ভ কৰে আৰু কিক (২০১৪) আৰু হাউচফুল ৩ (২০১৬) ছবিৰ সহকাৰী পৰিচালক হিচাপে কাম কৰে।^৬ ইয়াৰ পিছত তেওঁ চলচ্চিত্ৰৰ বাবে অডিচন দিবলৈ আৰম্ভ কৰে আৰু প্ৰথমখন ছবিত কাম পোৱাৰ আগতে বিজ্ঞাপন আৰু মডেলিং নিযুক্তি গ্ৰহণ কৰে।^৭

অভিনয়ত প্ৰৱেশ কৰাৰ আগতে ওবেৰয়ে নাদিয়াডৱালা গ্ৰেণ্ডছন এণ্টাৰটেইনমেণ্ট প্ৰডাকচনৰ ছবি কিক (২০১৪) আৰু হাউচফুল ৩ (২০১৬)ত সহকাৰী পৰিচালক হিচাপে কাম কৰিছিল। তেওঁ ২০১৯ চনত অমৰীশ পুৰীৰ নাতি বৰ্ধন পুৰীৰ সৈতে ৰোমাণ্টিক থ্ৰিলাৰ ছবি য়ে চালী আশিকীৰ জৰিয়তে অভিনয় জীৱনৰ পাতনি মেলে।^৮ এই ছবিখন চেৰাগ ৰূপাৰেলৰদ্বাৰা পৰিচালিত আৰু পেন ইণ্ডিয়া লিমিটেড তথা অমৰীশ পুৰী ফিল্মছে প্ৰযোজনা কৰিছিল।^৯ ফাৰুক কবিৰৰদ্বাৰা পৰিচালিত আৰু বিদ্যুৎ জামুৱালৰ সৈতে তেওঁৰ দ্বিতীয়খন ছবি খোদা হাফিজ ২০২০ চনৰ ১৪ আগষ্টত মুক্তি পায়।^১০১১

ব্যক্তিগত জীৱন

২০১৮ চনৰ ১৫ জানুৱাৰীত ওবেৰয়ে তেওঁৰ দীৰ্ঘদিনীয়া প্ৰেমিক অভিনেতা কৰম ৰাজপালৰ সৈতে বাগদান সম্পন্ন কৰা বুলি বাতৰি প্ৰকাশ পাইছিল।^১২ অৱশ্যে ২০১৯ চনৰ নৱেম্বৰ মাহত তেওঁ বাগদানৰ বাতৰি অস্বীকাৰ কৰে আৰু ইয়াক মিছা বুলি অভিহিত কৰে।^১৩

২০২২ চনৰ ২৪ জুলাইত ওবেৰয়ে চলচ্চিত্ৰ নিৰ্মাতা অভিষেক পাঠকৰ সৈতে বাগদান সম্পন্ন কৰে।^১৪১৫ ২০২৩ চনৰ ফেব্ৰুৱাৰী মাহত তেওঁলোকে গোৱাত বিবাহপাশত আবদ্ধ হয়।^১৬