লেছলি এম. কে

লেছলি এম. কে (ইংৰাজী ভাষা: Leslie M. Kay) এগৰাকী আমেৰিকা যুক্তৰাষ্ট্ৰন স্নায়ুবিজ্ঞানী আৰু চিকাগো বিশ্ববিদ্যালয়ৰ মনোবিজ্ঞান বিভাগৰ এগৰাকী অধ্যাপিকা। তেওঁৰ গৱেষণাই ঘ্ৰাণেন্দ্ৰীয় বাল্বৰ স্নায়ুশৰীৰবিজ্ঞান আৰু আচৰণগত পৰিপ্ৰেক্ষিতে কেনেকৈ সংবেদনশীল প্ৰক্ৰিয়াকৰণত প্ৰভাৱ পেলায় সেই বিষয়ে অধ্যয়ন কৰে।^১

কে-ই ছেইণ্ট জনছ কলেজৰ পৰা স্নাতক শিক্ষা গ্ৰহণ কৰে আৰু কেলিফৰ্ণিয়া বিশ্ববিদ্যালয়, বাৰ্কলেৰ পৰা জৈৱ পদাৰ্থ বিজ্ঞানত পিএইচডি ডিগ্ৰী লাভ কৰে।^২ ১৯৯৫ চনত পিএইচডি সম্পূৰ্ণ কৰাৰ পিছত তেওঁ কেলিফৰ্ণিয়া ইনষ্টিটিউট অৱ টেকন’লজীত গাইলছ লৰেণ্টৰ অধীনত এটা প’ষ্টডক্টৰেল গৱেষণা প্ৰকল্প সমাপ্ত কৰে।^৩ ২০০০ চনত তেওঁ চিকাগো বিশ্ববিদ্যালয়ৰ মনোবিজ্ঞান বিভাগত সহকাৰী অধ্যাপিকা হিচাপে নিযুক্তি লাভ কৰে। ২০০৮ চনৰ পৰা ২০১৪ চনলৈকে তেওঁ চিকাগো বিশ্ববিদ্যালয়ৰ ইনষ্টিটিউট ফৰ মাইণ্ড এণ্ড বায়’লজীৰ সঞ্চালিকা হিচাপে কাৰ্যনিৰ্বাহ কৰিছিল।

কৰ্মজীৱন

কে-ই ১৯৮৩ চনত নিউ মেক্সিকোৰ ছাণ্টা ফেত অৱস্থিত ছেইণ্ট জনছ কলেজৰ পৰা কলা শাখাৰ স্নাতক ডিগ্ৰী লাভ কৰে। ছেইণ্ট জনছ কলেজৰ পৰা স্নাতক ডিগ্ৰী লাভ কৰাৰ পিছত তেওঁ ১৯৮৫ চনলৈকে লছ আলামোছ নেচনেল লেবৰেটৰীত জেনে বেংক প্ৰকল্পত কাম কৰিছিল। কে-ই ১৯৮৫ চনত কেলিফৰ্ণিয়া বিশ্ববিদ্যালয়, বাৰ্কলেত পিএইচডি আৰম্ভ কৰে, কিন্তু ১৯৮৬ চনৰ পৰা ১৯৯০ চনলৈ তেওঁ বিৰতি লয়। এই সময়ছোৱাত তেওঁ ইণ্টেলিজেনেটিক্সত জেনে বেংকৰ এজন বিশ্লেষক আৰু প্ৰগ্ৰামাৰ লগতে এজন বৈজ্ঞানিক সমীক্ষক হিচাপে কাম কৰিছিল। কে-ই ১৯৯৫ চনত উপদেষ্টা ৱাল্টাৰ জেকচন ফ্ৰিমেন ৩য়ৰ অধীনত কেলিফৰ্ণিয়া বিশ্ববিদ্যালয়, বাৰ্কলেৰ পৰা জৈৱ পদাৰ্থ বিজ্ঞানত পিএইচডি লাভ কৰে। তেওঁৰ গৱেষণা পত্ৰৰ শীৰ্ষক আছিল ডাইনামিক ইণ্টাৰেকচন অৱ অলফেক্টৰী এণ্ড লিম্বিক চিষ্টেমছ ডিউৰিং অলফেক্টৰী পাৰচেপচন।^৪

১৯৯৫ চনৰ পৰা ২০০০ চনলৈকে কে কেলিফৰ্ণিয়া ইনষ্টিটিউট অৱ টেকন’লজীত জীৱবিজ্ঞান আৰু কম্পিউটেশ্যনেল নিউৰ’ছায়েন্সৰ প’ষ্টডক্টৰেল ফেলো আছিল। কেলটেকত উপদেষ্টা গাইলছ লৰেণ্টৰ লেবৰেটৰীত প’ষ্টডক্টৰেল প্ৰশিক্ষণৰ সময়ত তেওঁ অধ্যয়ন কৰিছিল যে ঘ্ৰাণেন্দ্ৰীয় বাল্বৰ মিত্ৰল কোষবোৰৰ সঁহাৰি কেনেকৈ গোন্ধৰ আচৰণগত পৰিপ্ৰেক্ষিতৰ দ্বাৰা প্ৰভাৱিত হয়।^৩৫

চিকাগো বিশ্ববিদ্যালয়ত কে-ই ২০০৮ চনৰ পৰা ২০১৪ চনলৈ ইনষ্টিটিউট ফৰ মাইণ্ড এণ্ড বায়’লজীৰ সঞ্চালিকা হিচাপে আৰু ২০১৪ চনৰ পৰা ২০১৬ চনলৈকে ইন্টিগ্ৰেটিভ নিউৰ’ছায়েন্স স্নাতক কাৰ্যসূচীৰ মুৰব্বী হিচাপে কাম কৰিছিল। তেওঁ চিকাগো বিশ্ববিদ্যালয়ৰ গ্ৰছমেন ইনষ্টিটিউট ফৰ নিউৰ’ছায়েন্সৰো এগৰাকী সদস্য। কে বিহেভিয়াৰেল নিউৰ’ছায়েন্স আৰু জাৰ্নেল অৱ নিউৰ’ফিজিঅ’লজীকে ধৰি একাধিক সমনীয়া-সমীক্ষিত বৈজ্ঞানিক আলোচনীৰ সম্পাদক। পৰিপ্ৰেক্ষিতে কেনেকৈ স্নায়ুতন্ত্ৰক পুনৰ্গঠন কৰে সেই সম্পৰ্কে কৰা গৱেষণাৰ বাবে কে-ই ২০১৮ চনত এটা ডিএআৰপিএ (DARPA) অনুদান লাভ কৰিছিল।^৬ কে-ই এনআইডিচিডিৰ (NIDCD) জৰিয়তে তেওঁৰ গৱেষণাৰ বাবে একাধিক নেচনেল ইনষ্টিটিউট অফ হেলথ (NIH) অনুদানো লাভ কৰিছে। ইয়াৰ উপৰিও ২০১৭ চনত ফ্ল’ৰিডা বিশ্ববিদ্যালয়ৰ চেণ্টাৰ ফৰ স্মেল এণ্ড টেষ্ট ছেমিনাৰ ছিৰিজৰ অংশ হিচাপে ভাষণ দিবলৈ তেওঁক আমন্ত্ৰণ জনোৱা হৈছিল আৰু তাত তেওঁ ঘ্ৰাণেন্দ্ৰীয় প্ৰক্ৰিয়াকৰণত স্নায়বিক দোলন আৰু পৰিপ্ৰেক্ষিতৰ বিষয়ে এটা উপস্থাপন আগবঢ়াইছিল।^৩

ব্যক্তিগত জীৱন

কে এগৰাকী লেচবিয়ান। কলেজৰ চতুৰ্থ বৰ্ষত পঢ়ি থকাৰ সময়তে তেওঁ নিজৰ যৌন পৰিচয় ৰাজহুৱা কৰিছিল আৰু চাকৰিৰ বাবে আবেদন কৰা সময়ছোৱাৰ বাহিৰে তেওঁৰ সমগ্ৰ কৰ্মজীৱনত তেওঁ এগৰাকী মুক্তমনা ব্যক্তি হিচাপে পৰিচিত।^৭ কে-ই তেওঁৰ পত্নীৰ সৈতে ২০ বছৰতকৈও অধিক সময় ধৰি বিবাহপাশত আৱদ্ধ হৈ আছে আৰু তেওঁলোকৰ দুটা প্ৰাপ্তবয়স্ক সন্তান আছে। তেওঁ ৫০০ কুইয়াৰ বিজ্ঞানীৰ এগৰাকী সদস্য আৰু বিজ্ঞানৰ ক্ষেত্ৰত এলজিবিটিকিউ (LGBTQ) দৃশ্যমানতাৰ প্ৰসাৰৰ বাবে কাম কৰে।

কে এগৰাকী ইহুদী ধৰ্মাৱলম্বী মহিলা আৰু তেওঁ ২০১৩ চনৰ পৰা ২০১৫ চনলৈকে কেএএম ইছায়া ইজৰাইলৰ উপ-সভানেত্ৰী আৰু ২০১৫ চনৰ পৰা ২০১৬ চনলৈকে কোষাধ্যক্ষ হিচাপে কাৰ্যনিৰ্বাহ কৰিছিল।

বহিঃসংযোগ

• চিকাগো বিশ্ববিদ্যালয়ত থকা কে লেব