লিম না-য়ং

লিম না-য়ং (ইংৰাজী ভাষা: Lim Na-young; জন্ম: ১৮ ডিচেম্বৰ, ১৯৯৫) এগৰাকী দক্ষিণ কোৰিয়াৰ অভিনেত্ৰী, গায়িকা আৰু ৰেপাৰ। এমনেটৰ ৰিয়েলিটী চাৰ্ভাইভেল শ্ব’ প্ৰডিউচ ১০১-ৰ প্ৰথম ছিজনত দশম স্থান দখল কৰি তেওঁ জনপ্ৰিয়তা লাভ কৰিছিল। তেওঁ দক্ষিণ কোৰিয়াৰ গাৰ্ল গ্ৰুপ আই.অ’.আই. (I.O.I) আৰু পিষ্টিনৰ প্ৰাক্তন সদস্য তথা দলনেত্ৰী আছিল।

প্ৰাৰম্ভিক জীৱন আৰু শিক্ষা

লিম না-য়ঙৰ জন্ম হৈছিল ১৯৯৫ চনৰ ১৮ ডিচেম্বৰত কোৰিয়া প্ৰজাতন্ত্ৰৰ ছিউল বিশেষ চহৰৰ গোৱানাক জিলাত।^১ তেওঁ মুহাক গাৰ্লছ হাইস্কুলত অধ্যয়ন কৰিছিল আৰু ডংডুক ৱিমেন্স ইউনিভাৰ্চিটিৰপৰা স্নাতক ডিগ্ৰী লাভ কৰিছিল।^২

কেৰিয়াৰ

২০১৬: প্ৰডিউচ ১০১ আৰু আই.অ’.আই.-ৰ সৈতে আত্মপ্ৰকাশ

২০১৬ চনৰ ২২ জানুৱাৰীৰপৰা ১ এপ্ৰিললৈ লিমে এমনেটৰ ৰিয়েলিটী চাৰ্ভাইভেল শ্ব’ প্ৰডিউচ ১০১-ত অংশগ্ৰহণ কৰিছিল, য’ত দক্ষিণ কোৰিয়াৰ বিভিন্ন সংস্থাৰ ১০১ গৰাকী মহিলা প্ৰশিক্ষাৰ্থীয়ে অংশ লৈছিল।^৩ প্লেডিছ এণ্টাৰটেইনমেণ্টৰপৰা অহা পাঁচগৰাকী অংশগ্ৰহণকাৰী বাদ পৰিছিল আৰু কেৱল লিম আৰু কিউলকিউংহে আই.অ’.আই.-ৰ চূড়ান্ত তালিকাত স্থান লাভ কৰিছিল। তেওঁ মুঠ ১,৩৮,৭২৬টা ভোট লাভ কৰি দশম স্থান দখল কৰিছিল।^৪ ৪ মে’ত আই.অ’.আই.-য়ে তেওঁলোকৰ প্ৰথমটো ই.পি. ক্ৰিচালিছ আৰু ইয়াৰ মুখ্য চিংগল ড্ৰিম গাৰ্লছৰ জৰিয়তে আত্মপ্ৰকাশ কৰে।^৫

২০১৭–২০১৯: আই.অ’.আই. আৰু পিষ্টিন ভংগ

২০১৭ চনৰ ২৯ জানুৱাৰীত আই.অ’.আই. ভংগ হোৱাৰ পিছত প্লেডিছ এণ্টাৰটেইনমেণ্টে ঘোষণা কৰে যে লিম আৰু কিউলকিউঙে ২১ মাৰ্চত পিষ্টিনৰ সদস্য হিচাপে আত্মপ্ৰকাশ কৰিব। একেদিনাই পিষ্টিনে তেওঁলোকৰ প্ৰথমটো ই.পি. হাই! পিষ্টিন আৰু ইয়াৰ মুখ্য চিংগল উই উ মুক্তি দিয়ে।^৬

২০১৮ চনৰ ১৭ মে’ত প্লেডিছ এণ্টাৰটেইনমেণ্টে পিষ্টিনৰ চাব-গ্ৰুপ পিষ্টিন ভি গঠন কৰে আৰু লিম ইয়াৰ অন্যতম সদস্য হিচাপে নিৰ্বাচিত হয়। তেওঁলোকে ২৮ মে’ত চিংগল এলবাম লাইক এ ভি-ৰ জৰিয়তে আত্মপ্ৰকাশ কৰে।^৭

২০১৯ চনৰ ২৪ মে’ত পিষ্টিন আনুষ্ঠানিকভাৱে ভংগ হয়^৮ আৰু প্লেডিছ এণ্টাৰটেইনমেণ্টে ঘোষণা কৰে যে লিমে লেবেলটো ত্যাগ কৰিব।^৯ ২২ আগষ্টত তেওঁ চাবলাইম আৰ্টিষ্ট এজেন্সীৰ সৈতে এক একচেটিয়া চুক্তিত স্বাক্ষৰ কৰে।^১০ চাৰিদিন পাছত তেওঁক পৰ্যটনস্থলী ইনচাদঙৰ প্ৰচাৰ ৰাষ্ট্ৰদূত হিচাপে নিৰ্বাচিত কৰা হয়।^১১

২০২০–বৰ্তমান: একক কেৰিয়াৰৰ আৰম্ভণি

২০২১ চনৰ ২৮ জানুৱাৰীত লিমে ৰহস্যধৰ্মী ধাৰাবাহিক ফ্লাৱাৰ অফ ইভিলত কিশোৰী ডো হেই-চুৰ চৰিত্ৰত অভিনয় কৰি অভিনয় জীৱনৰ পাতনি মেলে। একে বছৰতে তেওঁ ৱেব ড্ৰামা চামাৰ গাইজত তেওঁৰ আই.অ’.আই.-ৰ প্ৰাক্তন সতীৰ্থ কাং মি-নাৰ সৈতে প্ৰথমবাৰৰ বাবে মুখ্য চৰিত্ৰত অভিনয় কৰে।^১২ ১ এপ্ৰিলত নিশ্চিত কৰা হয় যে গটচেভেনৰ (Got7) চয় ইয়ং-জাইৰ সৈতে লিমক লেভিছ ৰেডৰ (Levi's Red) প্ৰচাৰমূলক শিল্পী হিচাপে নিৰ্বাচিত কৰা হৈছে।^১৩ ৭ এপ্ৰিলত মুক্তি পোৱা চামাৰ গাইজৰ সংগীতত লিমে "চ’ চ’" (So So) গীতটোত কণ্ঠদান কৰে।^১৪ তেওঁ টুৱেণ্টি হেকাৰৰ জৰিয়তে চলচ্চিত্ৰ জগতত আত্মপ্ৰকাশ কৰে আৰু ছবিখনৰ বাবে "নট জাষ্ট ফ্ৰেণ্ডছ" গীতটো গায়।^১৫ ইয়াৰ উপৰি ১৫ এপ্ৰিলত মুক্তি পোৱা টুৱেণ্টি হেকাৰৰ সংগীতৰ চতুৰ্থ অংশত তেওঁ "উইথ অল মাই হাৰ্ট" আৰু "লাইক দ্য টু অফ আছ" শীৰ্ষক দুটা গীত মুকলি কৰে।^১৬ ৭ মে’ত মুক্তি পোৱা কে.বি.এচ.২-ৰ (KBS2) ধাৰাবাহিক ইমিটেশ্যনত তেওঁ এটা সহযোগী চৰিত্ৰত অভিনয় কৰে।^১৭ তেওঁ কে.বি.এচ.১-ৰ (KBS1) ধাৰাবাহিক অ’ভাৰ টু ইউত হিউন-আৰ মুখ্য চৰিত্ৰত অভিনয় কৰিবলৈ সাজু হৈছিল। ২৯ জুনত লিমক আই লাভড ইউ নামৰ সংগীত নাটকখনত অভিনয় কৰিবলৈ নিশ্চিত কৰা হয়, যাৰ প্ৰিমিয়াৰ ১৪ আগষ্টত হৈছিল। ১ ডিচেম্বৰত লিমক হ্ৰস্ব দৈৰ্ঘ্যৰ ভৌতিক ছবি ৪:৪৪ ছেকেণ্ডৰ বাবে বাছনি কৰা হয়, যিখন ২০২৪ চনৰ ১ নৱেম্বৰত মুক্তি পাইছিল।^১৮১৯

২০২৩ চনৰ ৭ জুলাইত ঘোষণা কৰা হয় যে লিমে 'এচেনডিঅ’'ৰ (Ascendio) সৈতে এক চুক্তিত স্বাক্ষৰ কৰিছে।^২০ একে বছৰতে তেওঁক ঘৰুৱা ধাৰাবাহিক আনপ্ৰেডিক্টেবল ফেমিলিত অভিনয় কৰিবলৈ বাছনি কৰা হয়। ২০২৪ চনৰ ১৯ ফেব্ৰুৱাৰীত তেওঁ নতুনকৈ প্ৰতিষ্ঠিত 'মাস্ক ষ্টুডিঅ’'ৰ সৈতে এক একচেটিয়া চুক্তিত স্বাক্ষৰ কৰে।^২১ ২৬ ছেপ্টেম্বৰত তেওঁক কোৰিয়ান-জাপানীজ যুটীয়া সংগীত ধাৰাবাহিক নেবিউলাত অভিনয়ৰ বাবে মনোনীত কৰা হয়।^২২