ছি-ইয়ন

পাৰ্ক জং-হিউন (ইংৰাজী ভাষা: Park Xi-yeon; জন্ম: ১৪ নৱেম্বৰ, ২০০০), যিগৰাকী পেছাদাৰীভাৱে পাৰ্ক ছি-ইয়ন নামেৰে পৰিচিত, এগৰাকী দক্ষিণ কোৰিয়াৰ অভিনেত্ৰী।^১২ প্ৰাক্তন শিশু অভিনেত্ৰী, গায়িকা আৰু মডেল পাৰ্ক ছি-ইয়নে ২০১৭ চনত গাৰ্ল গ্ৰুপ পিষ্টিনৰ সদস্য হিচাপে আনুষ্ঠানিকভাৱে আত্মপ্ৰকাশ কৰাৰ পূৰ্বে ৯ বছৰ ধৰি প্লেডিছ এণ্টাৰটেইনমেণ্টৰ অধীনত প্ৰশিক্ষণ লৈছিল। ২০১৭ চনৰ এপ্ৰিলৰপৰা ২০১৮ চনৰ জানুৱাৰীলৈকে তেওঁ চা ইউন-উৰ সৈতে দক্ষিণ কোৰিয়াৰ সংগীত অনুষ্ঠান শ্ব’! মিউজিক ক’ৰৰ আঁত ধৰিছিল।

প্ৰাৰম্ভিক জীৱন

ছি-ইয়নৰ জন্ম হৈছিল ২০০০ চনৰ ১৪ নৱেম্বৰত দক্ষিণ কোৰিয়াৰ আনিয়াঙত।^১৩ সৰু কালত তেওঁ বিভিন্ন কোম্পানী আৰু সামগ্ৰীৰ কেইবাটাও বিজ্ঞাপনত অভিনয় কৰিছিল, যাৰ ভিতৰত কোৰিয়ান এয়াৰৰ এখন সুৰক্ষা ভিডিঅ’ আছিল অন্যতম।^৪ ইয়াৰ উপৰি তেওঁ কেইখনমান ধাৰাবাহিক আৰু চলচ্চিত্ৰ যেনে ফাদাৰ এণ্ড ছান: দ্য ষ্ট’ৰী অফ মেন্সিয়াছ (২০০৪) আৰু দ্য কাট (২০০৭) ত সৰু চৰিত্ৰত অভিনয় কৰিছিল। তেওঁ প্লেডিছ এণ্টাৰটেইনমেণ্টত অডিচন দিছিল আৰু কোম্পানীটোৰ অধীনত ন বছৰ ধৰি প্ৰশিক্ষণ লৈছিল। প্ৰশিক্ষাৰ্থী হিচাপে তেওঁ একেটা লেবেলৰে অন্যান্য শিল্পী যেনে আফটাৰ স্কুল আৰু অৰেঞ্জ কেৰামেলৰ সংগীত ভিডিঅ’ত অভিনয় কৰিছিল।^১৫

কেৰিয়াৰ

২০১৬–২০১৯: প্ৰডিউচ ১০১, পিষ্টিনৰ সৈতে আত্মপ্ৰকাশ আৰু গোট ভংগ

পাৰ্ক ছি-ইয়ন নামেৰে তেওঁ নিজৰ কোম্পানীৰ আন ছয়গৰাকী মহিলা প্ৰশিক্ষাৰ্থীৰ সৈতে এমনেটৰ চাৰ্ভাইভেল প্ৰগ্ৰেম প্ৰডিউচ ১০১-ত যোগদান কৰিছিল। এই অনুষ্ঠানৰ লক্ষ্য আছিল দক্ষিণ কোৰিয়াৰ বিভিন্ন মনোৰঞ্জন কোম্পানীৰ ১০১ গৰাকী মহিলা প্ৰশিক্ষাৰ্থীৰ মাজৰপৰা এঘাৰ জনীয়া এটা গাৰ্ল গ্ৰুপ গঠন কৰা, যিয়ে ৱাই.এম.চি. এণ্টাৰটেইনমেণ্টৰ অধীনত এবছৰৰ বাবে প্ৰচাৰ চলাব।^৬ এই অনুষ্ঠানটো ২০১৬ চনৰ ২২ জানুৱাৰীৰপৰা ১ এপ্ৰিললৈ সম্প্ৰচাৰিত হৈছিল। তেওঁ চূড়ান্ত তালিকাত স্থান লাভ কৰাত ব্যৰ্থ হয় আৰু অনুষ্ঠানটোৰ দশম খণ্ডত ২৫ তম স্থান লাভ কৰে।

নায়ং আৰু কিউলকিউং আই.অ’.আই.-ৰ প্ৰচাৰত ব্যস্ত থকাৰ সময়তে ছি-ইয়ন আৰু প্লেডিছ এণ্টাৰটেইনমেণ্টৰ আন চাৰিগৰাকী বাদ পৰা মহিলা প্ৰশিক্ষাৰ্থীৰ লগতে ছং-ইয়ন, য়েহানা আৰু কাইলাক লগ ধৰি 'প্লেডিছ গাৰ্লজ' নামৰ প্ৰাক-আত্মপ্ৰকাশ গোটটোৰ অধীনত প্ৰচাৰ চলাইছিল। ২০১৬ চনৰ ২৭ জুনত তেওঁলোকে উই নামৰ চিংগলটো মুক্তি দিয়ে, যিটো তেওঁ আন তিনিগৰাকী সদস্যৰ সৈতে মিলি লিখিছিল।^৭ ছি-ইয়নে মে’ মাহৰপৰা ছেপ্টেম্বৰ মাহলৈ গোটটোৰ সৈতে সাপ্তাহিক কনচাৰ্টত অংশ লৈছিল। ২০১৭ চনৰ ৬ জানুৱাৰীত তেওঁলোকে নিজৰ গোটটোৰ নাম ঘোষণা কৰে আৰু অৱশেষত ২০১৭ চনৰ ২১ মাৰ্চত ১০ জনীয়া গাৰ্ল গ্ৰুপ পিষ্টিন হিচাপে আনুষ্ঠানিকভাৱে আত্মপ্ৰকাশ কৰে। তেওঁলোকৰ প্ৰথমটো ই.পি. আছিল হাই! পিষ্টিন আৰু ইয়াৰ মুখ্য চিংগল আছিল উই উ।^৮৯ ছি-ইয়নে এই এলবামটোৰ প্ৰস্তুতিত অংশগ্ৰহণ কৰিছিল আৰু ইয়াৰ অন্যতম ট্ৰেক "অ’ভাৰ এন অ’ভাৰ" তেওঁ আৰু আন পাঁচগৰাকী সদস্যই লিখিছিল।

২২ এপ্ৰিলত তেওঁ এষ্ট্ৰ’ৰ সদস্য চা ইউন-উৰ সৈতে দক্ষিণ কোৰিয়াৰ সংগীত অনুষ্ঠান শ্ব’! মিউজিক ক’ৰৰ আঁতধৰোঁতা হিচাপে নিৰ্বাচিত হয়।^১০ ২০১৭ চনৰ আগষ্ট মাহত পিষ্টিনে তেওঁলোকৰ দ্বিতীয়টো ই.পি. স্কুল আউট মুক্তি দিয়ে। এই এলবামৰ দুটা গীত ছি-ইয়নে সহ-সুৰাৰোপ কৰিছিল আৰু তিনিটা গীতৰ কথা তেওঁ সহ-লিখন কৰিছিল।^১১

২০১৯ চনৰ ২৪ মে’ত পিষ্টিন আনুষ্ঠানিকভাৱে ভংগ হয়।^১২ প্লেডিছ এণ্টাৰটেইনমেণ্টে ঘোষণা কৰে যে ছি-ইয়নে লেবেলটো ত্যাগ কৰিব।^১৩

২০২০–বৰ্তমান: অভিনয়লৈ পৰিৱৰ্তন

২০২০ চনৰ মে' মাহত পাৰ্ক ছি-ইয়নে তেওঁৰ ইনষ্টাগ্ৰাম একাউণ্টৰ জৰিয়তে ঘোষণা কৰে যে তেওঁ এগৰাকী অভিনেত্ৰী হিচাপে নিজৰ কেৰিয়াৰ আগবঢ়াই নিব আৰু এখন স্বতন্ত্ৰ চলচ্চিত্ৰত কাম কৰি আছে, যাৰ নাম পিছলৈ ডিয়েটাৰ ফাইটৰ ৰখা হৈছিল।^১৪১৫ ২০২০ চনৰ জুলাই মাহত পাৰ্কে 'চু ইয়ন কাং এণ্টাৰটেইনমেণ্ট'ৰ সৈতে চুক্তিবদ্ধ হয়।^১৬ ২০২১ চনৰ জুলাই মাহত ২৫ তম বুচিয়ন আন্তঃৰাষ্ট্ৰীয় ফেণ্টাচিক চলচ্চিত্ৰ মহোৎসৱত ডিয়েটাৰ ফাইটৰ প্ৰদৰ্শিত হয়, য’ত পাৰ্কে তেওঁৰ অভিনয়ৰ বাবে 'ফেণ্টাচিক এক্টৰ জুৰীছ স্পেচিয়েল মেনচন এৱাৰ্ড' লাভ কৰে।^১৭

২০২৩ চনৰ ১৪ নৱেম্বৰত ঘোষণা কৰা হয় যে পাৰ্কে 'চেৰ’ এক্টৰ্ছ'ৰ সৈতে এক চুক্তিত স্বাক্ষৰ কৰিছে।^১৮