মাৰ্বল গুহা, ক্ৰিমিয়া

মাৰ্বল গুহা (Мра́морная пещера, Мармурова печера) ক্ৰিমিয়াৰ চাটিৰ-দাগ পৰ্বতমালাৰ নিম্ন মালভূমিত অৱস্থিত এটা গুহা। ই এটা জনপ্ৰিয় পৰ্যটনস্থলী আৰু ইউৰোপৰ অধিক পৰ্যটক অহা গুহাসমূহৰ ভিতৰত অন্যতম।^১

গুহাটো ইয়াৰ অনন্য প্ৰাকৃতিক সৌন্দৰ্যৰ বাবে আন্তঃৰাষ্ট্ৰীয়ভাৱে পৰিচিত। গুহাবিজ্ঞানীসকলে ইয়াক পৃথিৱীৰ আটাইতকৈ সুন্দৰ গুহাসমূহৰ ভিতৰত অন্যতম বুলি গণ্য কৰে। ২০০৮ চনত মাৰ্বল গুহাক ইউক্ৰেইনৰ সাতটা প্ৰাকৃতিক আশ্চৰ্যৰ অন্যতম হিচাপে নিৰ্বাচিত কৰা হয়।^২৩

গুহাটোৰ প্ৰৱেশদ্বাৰ সমুদ্ৰপৃষ্ঠৰপৰা প্ৰায় ৯২০ মিটাৰ উচ্চতাত অৱস্থিত। ইয়াৰ ভিতৰত প্ৰাকৃতিকভাৱে সৃষ্টি হোৱা বিভিন্ন শিলাস্তৰ, স্তালেকটাইট, স্তালেগমাইট, শিলৰ স্তম্ভ আৰু অন্যান্য চূণশিলৰ গঠন দেখা যায়।^৪

ইতিহাস

১৯৮৭ চনত চিম্ফেৰোপলৰ এটা গুহাবিজ্ঞানী দলে বিন-বাশ-কোবা আৰু ছুুক-কোবা গুহাৰ মাজত এটা নতুন গুহা আৱিষ্কাৰ কৰে। গুহাটোত বহুতো হ'ল আৰু দীঘলীয়া গেলেৰীৰে গঠিত এটা জটিল ভূ-গৰ্ভস্থ ব্যৱস্থা আছিল।^৫

নতুন গুহাটোৰ নাম মাৰ্বল গুহা ৰখা হয়। প্ৰথম অৱস্থাত ইয়াক "আফগান" নামেও কোৱা হৈছিল। গুহাটো মাৰ্বল সদৃশ চূণশিলৰ স্তৰত গঠিত হোৱা বাবে ইয়াৰ নাম মাৰ্বল গুহা হয়।^৫

১৯৮৮ চনত গুহাবিজ্ঞান পৰ্যটনৰ বাবে অনিক্স-টুৰ কেন্দ্ৰ স্থাপন কৰা হয়। ইয়াৰ পিছত গুহাটোত পৰ্যটকৰ বাবে পথ নিৰ্মাণ কৰা হয়, হাতল স্থাপন কৰা হয় আৰু বৈদ্যুতিক পোহৰৰ ব্যৱস্থা কৰা হয়।^৬

১৯৮৯ চনত মাৰ্বল গুহা পৰ্যটকৰ বাবে মুকলি কৰা হয়। তাৰ পিছৰেপৰা গুহাটোৰ অধিক ভিতৰুৱা অংশসমূহো পৰ্যটনৰ বাবে ক্ৰমে সজাই তোলা হৈছে।^৭

১৯৯২ চনত মাৰ্বল গুহা সজ্জিত গুহাসমূহৰ আন্তঃৰাষ্ট্ৰীয় সংস্থাৰ সৈতে জড়িত হয়।

গুহাটোৰ গঠন

মাৰ্বল গুহাৰ ভিতৰত বিভিন্ন আকৃতি আৰু আকাৰৰ বহুতো ভূ-গৰ্ভস্থ কক্ষ আৰু গ্যালাৰী আছে। গুহাটোত দেখা পোৱা প্ৰাকৃতিক শিলৰ গঠনৰ ভিতৰত স্তালেকটাইট, স্তালেগমাইট, শিলৰ স্তম্ভ, শিলৰ ফুল আৰু কেলচাইটৰ অন্যান্য গঠন উল্লেখযোগ্য।

গুহাটোৰ পৰ্যটন পথৰ মুঠ দৈৰ্ঘ্য প্ৰায় ডেৰ কিলোমিটাৰ। গুহাটোৰ অনুসন্ধান কৰা কক্ষসমূহৰ মুঠ দৈৰ্ঘ্য দুই কিলোমিটাৰতকৈ অধিক আৰু ইয়াৰ গভীৰতা প্ৰায় ৬০ মিটাৰ।^৮

পৰ্যটন পথ

গুহাৰ ভিতৰৰ পৰ্যটন পথত কেইবাটাও উল্লেখযোগ্য কক্ষ আৰু গ্যালাৰী আছে। ইয়াৰ ভিতৰত ৰূপকথা গ্যালাৰী, বাঘ পথ, পুনৰ্গঠন কক্ষ, গোলাপী কক্ষ, ৰাজপ্ৰাসাদ কক্ষ, আশা কক্ষ, বাৰাণ্ডা কক্ষ আৰু দীপাধাৰ কক্ষ উল্লেখযোগ্য।

ৰূপকথা গেলেৰীত বিভিন্ন আকৃতিৰ প্ৰাকৃতিক শিলৰ গঠন দেখা যায়। ইয়াৰ পিছত থকা বাঘ পথত বহুতো স্তালেকটাইট আছে।

পুনৰ্গঠন কক্ষ গুহাটোৰ আটাইতকৈ বৃহৎ কক্ষসমূহৰ ভিতৰত অন্যতম। ইয়াৰ দৈৰ্ঘ্য ১০০ মিটাৰতকৈ অধিক আৰু উচ্চতা প্ৰায় ২৮ মিটাৰ। ই ক্ৰিমিয়াৰ গুহাসমূহৰ ভিতৰত আটাইতকৈ ডাঙৰ কক্ষ আৰু ইউৰোপৰ সজ্জিত গুহাৰ বৃহৎ কক্ষসমূহৰ ভিতৰতো অন্যতম।^৯

গোলাপী কক্ষৰ ওপৰৰ অংশত গোলাপৰ দৰে আকৃতিৰ শিলৰ গঠন দেখা যায়। ৰাজপ্ৰাসাদ কক্ষত "ৰজা" আৰু "ৰাণী" নামেৰে জনাজাত শিলৰ স্তম্ভ আছে।

দীপাধাৰ কক্ষলৈ যোৱা পথত স্তালেকটাইটৰ এখন ঘন "অৰণ্য" দেখা যায়। এই কক্ষৰ ছাদত কেলচাইটৰ ফুলৰ দৰে গঠনৰ মাজত বহুতো দীপাধাৰৰ আকৃতিৰ শিলৰ গঠন ওলমি আছে। কিছুমান গঠন প্ৰায় মজিয়ালৈকে নামি আহিছে।

পৰ্যটনৰ মূল পথ ইয়াতে শেষ হয়। ইয়াৰ উপৰি গুহাটোৰ ভিতৰত ভূমিস্খলন কক্ষ, নলা কক্ষ, চকলেট কক্ষ আৰু হেলিক্টাইট কক্ষ নামেৰে জনাজাত আন কেইবাটাও কক্ষ আছে।

প্ৰাকৃতিক গুৰুত্ব

মাৰ্বল গুহা মাৰ্বল সদৃশ চূণশিলৰ ভিতৰত হোৱা কাৰ্ষ্ট প্ৰক্ৰিয়াৰ ফলত সৃষ্টি হৈছে। পানীৰ দীৰ্ঘকালীন ক্ষয় আৰু চূণশিলৰ ভিতৰত সংঘটিত ৰাসায়নিক প্ৰক্ৰিয়াৰ ফলত গুহাৰ বিভিন্ন কক্ষ, গেলেৰী আৰু শিলৰ গঠন সৃষ্টি হৈছে।

গুহাটোৰ বিশেষত্ব হৈছে ইয়াৰ বৃহৎ ভূ-গৰ্ভস্থ কক্ষ, বিভিন্ন আকৃতিৰ শিলৰ গঠন আৰু প্ৰাকৃতিক সজ্জা। এই বৈশিষ্ট্যসমূহৰ বাবে গুহাটো গুহাবিজ্ঞান আৰু প্ৰকৃতি পৰ্যটনৰ ক্ষেত্ৰত গুৰুত্বপূৰ্ণ।

ইউক্ৰেইনৰ প্ৰাকৃতিক আশ্চৰ্য

২০০৮ চনত অনুষ্ঠিত ইউক্ৰেইনৰ "সাতটা প্ৰাকৃতিক আশ্চৰ্য" কাৰ্যসূচীৰ দ্বিতীয় পৰ্যায়ত মাৰ্বল গুহাক বিজয়ী সাতটা প্ৰাকৃতিক স্থানৰ ভিতৰত অন্তৰ্ভুক্ত কৰা হয়। সেই তালিকাত মাৰ্বল গুহাৰ সৈতে আন ছয়টা স্থান আছিল আছকানীয়া-নোভা, বুহৰ গ্ৰেনাইট-স্তেপ অঞ্চল, ডনিষ্টাৰ গিৰিখাত, পডিলস্কি টভট্ৰি, স্বিতিয়াজ হ্ৰদ আৰু ছিনেভিৰ হ্ৰদ।^১০

বাহ্যিক সংযোগ

• Pictures of Marble Cave with route description