মাধৱী ৱাৎসলা এন্থনী

কঙ্গানিগে মাধৱী ৱাৎসলা এন্থনী (জন্ম: ৬ আগষ্ট ১৯৮৮), যিগৰাকী জনপ্ৰিয়ভাৱে মাধৱী ৱাৎসলা নামেৰে পৰিচিত, শ্ৰীলংকান চিনেমাৰ এগৰাকী অভিনেত্ৰী।^১ জনপ্ৰিয় দূৰদৰ্শন সংগীত অনুষ্ঠান 'হাপান পাদুৰা'ৰ জৰিয়তে শিশু শিল্পী হিচাপে কেৰিয়াৰ আৰম্ভ কৰা মাধৱীয়ে এগৰাকী গায়িকা, নৃত্যশিল্পী, মডেল আৰু দূৰদৰ্শন উপস্থাপিকা হিচাপেও খ্যাতি অৰ্জন কৰিছে।^২৩

ব্যক্তিগত জীৱন

১৯৮৮ চনৰ ৬ আগষ্টত শ্ৰীলংকাৰ কলম্বোত এক শিল্পী পৰিয়ালৰ জ্যেষ্ঠ সন্তান হিচাপে তেওঁৰ জন্ম হৈছিল।^৪ তেওঁৰ পিতৃ জেকচন এন্থনী শ্ৰীলংকাৰ চলচ্চিত্ৰ, থিয়েটাৰ আৰু টেলিভিছনৰ এগৰাকী জনপ্ৰিয় অভিনেতা।^৫ জেকচনক শ্ৰীলংকাৰ অন্যতম বহুমুখী অভিনেতা বুলি গণ্য কৰা হয় আৰু তেওঁ পৰিচালক, প্ৰযোজক, গায়ক, চিত্ৰনাট্যকাৰ, দূৰদৰ্শন উপস্থাপক, ঔপন্যাসিক, স্তম্ভলেখক, গীতিকাৰ, ইতিহাসবিদ আৰু ভ্ৰমণকাৰী হিচাপে কাম কৰি আহিছে। তেওঁৰ মাতৃ কুমাৰী সন্দালতা মুনাসিংহেও শ্ৰীলংকাৰ চলচ্চিত্ৰ, থিয়েটাৰ আৰু টেলিভিছনৰ এগৰাকী জনপ্ৰিয় গায়িকা আৰু অভিনেত্ৰী।^৬

মাধৱীয়ে ১৯৯৪ চনৰ পৰা ২০০৩ চনলৈ হোলী ক্ৰছ কলেজত শিক্ষা গ্ৰহণ কৰিছিল। তাৰ পিছত ২০০৩ চনত তেওঁ বাম্বালপিটিয়াৰ হোলী ফেমিলী কনভেণ্টত ভৰ্তি হয় আৰু মেট্ৰিক (O/Ls) উত্তীৰ্ণ হয়।^৭ পিছলৈ তেওঁ বিশাখা বিদ্যালয়ৰ পৰা উচ্চতৰ মাধ্যমিক (A/Ls) সম্পূৰ্ণ কৰে। ২০১৩ চনত তেওঁ কেলানিয়া বিশ্ববিদ্যালয়ৰ পৰা পুৰাতত্ত্ব বিষয়ত স্নাতক ডিগ্ৰী লাভ কৰে। বৰ্তমান তেওঁ কলম্বো বিশ্ববিদ্যালয়ৰ পৰা পৰ্যটন অৰ্থনীতি আৰু হোটেল মেনেজমেণ্ট বিষয়ত স্নাতকোত্তৰ ডিগ্ৰী লাভৰ বাবে অধ্যয়ন কৰি আছে।^৮

তেওঁৰ খুৰাক সেনাকা টাইটাছ এন্থনী এজন জনপ্ৰিয় অভিনেতা আৰু সাংবাদিক আছিল, যিয়ে ২০১৭ চনৰ ২৩ অক্টোবৰত ছিংগাপুৰত বৃক্ক আৰু যকৃতৰ বিফলতাৰ বাবে মৃত্যুবৰণ কৰিছিল।^৯১০ তেওঁৰ আন এজন খুৰাক সুদত এন্থনীও টেলিভিছনৰ এজন জনপ্ৰিয় অভিনেতা।

মাধৱীৰ দুজন সৰু ভায়েক আছে: অকিলা ধনুৰ্ধৰা আৰু সজিতা এন্থনী। অকিলা চলচ্চিত্ৰ আৰু টেলিভিছনৰ এজন জনপ্ৰিয় অভিনেতা যিয়ে 'চিৰি পৰাকুম' আৰু 'এড্ৰেছ না' আদি ছবিত অভিনয় কৰিছিল। সৰু ভায়েক সজিতা এজন জনপ্ৰিয় অভিনেতা আৰু গায়ক যিয়ে শিশু শিল্পী হিচাপে কেৰিয়াৰ আৰম্ভ কৰিছিল। সজিতা 'সূৰ্য অৰণা', 'কুৰুলু পিহাতু', 'আবা'ৰ লগতে বঁটা বিজয়ী টেলিভিছন ধাৰাবাহিক 'বোহিমিয়ানুৱা' আৰু 'নাদাগমকাৰায়ো'ত কেইবাটাও জনপ্ৰিয় চৰিত্ৰত অভিনয় কৰিছে।^১১১২

তেওঁ পূৰ্বে ২০১০ চনত প্ৰবীণ অভিনেতা হেমচিৰি লিয়ানাগেৰ পুত্ৰ চিকিৎসক আলোক লিয়ানাগেৰ সৈতে বিবাহপাশত আৱদ্ধ হৈছিল। অৱশ্যে ২০১৬ চনত তেওঁলোকৰ বিবাহ বিচ্ছেদ ঘটে। পৰৱৰ্তী সময়ত তেওঁ শ্ৰীলংকান এয়াৰলাইনছৰ বিমান পৰিচাৰক মিলন ছিলভাৰ সৈতে বিবাহপাশত আৱদ্ধ হৈছিল যদিও ২০২৩ চনত তেওঁলোকৰো বিবাহ বিচ্ছেদ হয়। চন্দীপা জয়কোডীৰ ঘৰত অনুষ্ঠিত হোৱা এক উৎসৱত তেওঁ প্ৰথমবাৰৰ বাবে মিলনক লগ পাইছিল। ২০১৯ চনৰ ১৮ জানুৱাৰীত তেওঁৰ দুজন ভায়েকৰ সৈতে একেলগে তেওঁৰ বিয়া সম্পন্ন হৈছিল।

বাহ্যিক সংযোগ

• Madhavee Wathsala on ইউটিউব
• Madhavee Anthony: Adare Onakere (feat. Raj Thillaiyampalam) - Single
• Madhavee Wathsala photo shoot
• Madhavee again becomes a bride
• විවාහයෙන් පස්සේ දකින දකින අය මාධවීට කියන කතාව
• "Love depends on the little things over the big things in life" - Madhavi Wathsala
• දරු තිදෙනා අතිනත ගත් දා ජැක්සන් කුමාරි සංවේදී වූ හැටි