মনীষা কল্যাণ

মনীষা কল্যাণ (জন্ম ২৭ নৱেম্বৰ ২০০১) এগৰাকী ভাৰতীয় পেছাদাৰী ফুটবলাৰ যিয়ে গ্ৰীক এ ডিভিজন ক্লাব পিএঅ'কে আৰু ভাৰতীয় মহিলা জাতীয় দলৰ বাবে ফৰৱাৰ্ড হিচাপে খেলে।^১২ ২০২০–২১ চনৰ এআইএফএফৰ বছৰৰ উদীয়মান ফুটবলাৰ আৰু ২০২২–২৩ চনৰ এআইএফএফৰ বছৰৰ শ্ৰেষ্ঠ মহিলা খেলুৱৈৰ বঁটা লাভ কৰে।^৩৪ তেওঁ ইউএফএ মহিলা চেম্পিয়নছ লীগত খেলা প্ৰথমগৰাকী ভাৰতীয় ফুটবলাৰ।^৫

আৰম্ভণি জীৱন

মনীষাৰ জন্ম হৈছিল পঞ্জাৱৰ হৰ্ছিয়াৰপুৰ জিলাত অৱস্থিত মুগগোৱালত। সন্ত আত্তৰ সিং খালছা ছিনিয়ৰ ছেকেণ্ডাৰী স্কুলত অধ্যয়ন কৰি মেহৰ চন্দ মহাজন ডি এ ভি কলেজ ফৰ উইমেনৰ পৰা স্নাতক ডিগ্ৰী লাভ কৰে। ১৩ বছৰ বয়সৰ পৰাই ফুটবল খেলিবলৈ আৰম্ভ কৰে।^৬ ব্ৰহ্মজিৎ সিং আছিল সেই প্ৰশিক্ষক যিয়ে কল্যাণৰ প্ৰতিভাক তেওঁৰ গাঁও মুগগোৱালৰ চৰকাৰী মধ্যবিদ্যালয়ত পি ই শিক্ষক হিচাপে দেখা পাইছিল।^৭

ক্লাব কেৰিয়াৰ

গোকুলাম কেৰালা

২০১৮ চনত মনীষাই নৱগঠিত ইণ্ডিয়ান উইমেনছ লীগ ক্লাব গোকুলাম কেৰালাৰ সৈতে চুক্তিবদ্ধ হয়।^৮ ২০১৯–২০ চনৰ আই ডব্লিউ এল অভিযানত গোকুলামৰ সফলতাত গুৰুত্বপূৰ্ণ ভূমিকা পালন কৰিছিল। কেনক্ৰে এফ চিৰ বিৰুদ্ধে তেওঁ ২টা গ'ল দিয়ে, য'ত তেওঁৰ দলটোৱে ১-১০ গ'লত জয়লাভ কৰে, চেথু এফ চিৰ বিৰুদ্ধে তেওঁলোকৰ ছেমি ফাইনেলতো এটা গ'ল দিয়ে।^৯১০ প্ৰতিযোগিতাখনত ৩টা গ'ল দি প্ৰতিযোগিতাখনৰ উদীয়মান খেলুৱৈ হিচাপে নিৰ্বাচিত হয়।^১১

২০২১ চনত তেওঁ ভাৰতৰ পৰা শীৰ্ষ পৰ্যায়ৰ এছিয়ান প্ৰতিযোগিতাত গ'ল দিয়া প্ৰথমগৰাকী মহিলা খেলুৱৈ হিচাপে পৰিগণিত হয়,^১২ যেতিয়া তেওঁ ২০২১ চনৰ এ এফ চি মহিলা ক্লাব চেম্পিয়নশ্বিপৰ খেলখনত ১৪ নৱেম্বৰত উজবেকিস্তানৰ মহিলা দল এফ চি বুনয়ডক'ৰৰ বিৰুদ্ধে গ'ল দিয়ে, যিখন খেলত তেওঁলোকে পূৰ্ণকালীন সময়ত ৩-১ গ'লত জয়লাভ কৰে।^{১৩১৪১৫}

এপলন লেডিজ

২০২২ চনৰ ৩ জুলাইত আনুষ্ঠানিকভাৱে ঘোষণা কৰা হয় যে কল্যাণে লিমাছলস্থিত চাইপ্ৰ'ছৰ প্ৰথম বিভাগৰ ক্লাব এপলন লেডিজৰ সৈতে চুক্তিবদ্ধ হয়।^১৬ ১৮ আগষ্টত তেওঁ ক্লাবটোৰ হৈ অভিষেক ঘটায়, ইউএফএ মহিলা চেম্পিয়নছ লীগৰ কোৱালিফাইং ৰাউণ্ডত ৰিগাছ এফ এছৰ বিৰুদ্ধে ৩-০ গ'লত জয়লাভ কৰি ৬০ মিনিটত বিকল্প হিচাপে খেলিছিল।^১৭১৮

২০২২ চনৰ ২ অক্টোবৰত চাইপ্ৰাছৰ প্ৰথম বিভাগৰ এখন খেলত এৰিছ লিমাছলৰ বিৰুদ্ধে ক্লাবৰ হৈ প্ৰথমটো গ’ল দিয়ে। যেতিয়া এপলন লিমাছলে ২০২২–২৩ চনৰ চাইপ্ৰ'ছ মহিলা লীগ জয় কৰে, তেতিয়া তেওঁ ইউৰোপীয় চেম্পিয়নশ্বিপ জয় কৰা প্ৰথমগৰাকী ভাৰতীয় মহিলা হিচাপে পৰিগণিত হয়।^১৯ ২০২২–২৩ চনৰ পেনচিপ্ৰিয়ান ফুটবলাৰ্ছ এছ'চিয়েচন (PASP)ৰ মহিলা দলত তেওঁক অন্তৰ্ভুক্ত কৰা হৈছিল।^২০

PAOK

২০২৪ চনৰ ১৫ জুলাইত আনুষ্ঠানিকভাৱে ঘোষণা কৰা হয় যে কল্যাণে থেছালনিকিৰ গ্ৰীক এ ডিভিজন ক্লাব পিএঅ'কেৰ সৈতে চুক্তিবদ্ধ হয়।^২১২২

সন্মান

ভাৰত

• SAFF মহিলা চেম্পিয়নশ্বিপ: ২০১৯
• দক্ষিণ এছিয়ান গেমছ স্বৰ্ণ পদক: ২০১৯
• তুৰ্কী মহিলা কাপ ৰানাৰ্ছ আপ: ২০২৪^২৩

গোকুলাম কেৰালা

• ইণ্ডিয়ান মহিলা লীগ: ২০১৯–২০, ২০২১–২২

এপ'লন

• চাইপ্ৰাছৰ প্ৰথম বিভাগ: ২০২২–২৩, ২০২৩–২৪^২৪
• চাইপ্ৰ'ছ মহিলা কাপ: ২০২২–২৩^২৫
• চাইপ্ৰ'ছ মহিলা ছুপাৰ কাপ: ২০২৩^২৬

ব্যক্তিকেন্দ্ৰিক

• ইণ্ডিয়ান উইমেনছ লীগৰ হিৰো অৱ দ্য লীগ: ২০২১–২২
• ইণ্ডিয়ান মহিলা লীগৰ উদীয়মান খেলুৱৈ: 2019–20
• AIFF ৰ বছৰৰ শ্ৰেষ্ঠ মহিলা খেলুৱৈ: ২০২১–২২,^২৭ 2022–23^২৮
• AIFF মহিলাৰ বছৰৰ উদীয়মান ফুটবলাৰ: ২০২০–২১^২৯
• PASP শ্ৰেষ্ঠ ১১ মহিলা বঁটা: ২০২২–২৩^২০
• দ্য টাইম্‌ছ অৱ ইণ্ডিয়া ট'ইছা বছৰৰ ফুটবলাৰ: ২০২১^৩০
• তুৰ্কী মহিলা কাপ শ্ৰেষ্ঠ মিডফিল্ডাৰ: ২০২৪^২৩