মই কিয় নাস্তিক

মই কিয় নাস্তিক (Why I Am an Atheist, मैं नास्तिक क्यों हूँ) হৈছে ভাৰতীয় বিপ্লৱী ভগত সিঙে ১৯৩০ চনত লাহোৰ কেন্দ্ৰীয় কাৰাগাৰত বন্দী হৈ থকাৰ সময়ত লিখা ৰচনা-শৈলীৰ প্ৰবন্ধ।^১২ উক্ত প্ৰবন্ধটোৰ যোগেদি তেওঁ তেওঁৰ ধৰ্মীয় বন্ধুসকলৰ উত্তৰ দিছিল, যিয়ে তেওঁক নিজৰ অহংকাৰৰ বাবে নাস্তিক হোৱা বুলি ভাবিছিল।^৩

বুৰঞ্জীবিদ বিপিন চন্দ্ৰৰ মতে, ভগত সিঙে কাৰাগাৰত বহু গ্ৰন্থ আৰু প্ৰবন্ধ ৰচনা কৰিছিল যদিও ইয়াৰে অধিকাংশই ধ্বংস হৈছিল। এই প্ৰবন্ধটো কেনেবাকৈ পিতৃৰ জৰিয়তে কাৰাগাৰৰ পৰা ওলাই আহি লালা লাজপত ৰায়ে প্ৰতিষ্ঠা কৰা দ্য পিপল কাকতত প্ৰকাশ পাইছিল৷^৪

পটভূমি

ভগত সিং আছিল ভাৰতীয় স্বাধীনতা সংগ্ৰামৰ বিপ্লৱী দল “হিন্দুস্তান ছ'চিয়েলিষ্ট ৰিপাব্লিকান এছ'চিয়েচন”ৰ সদস্য।^৫ তেওঁ এজন নাস্তিক আছিল যিয়ে সমাজবাদত বিশ্বাস কৰিছিল, আৰু অৰাজকতাবাদৰ ওপৰত কেইবাটাও প্ৰবন্ধ লিখিছিল।^৬৭ ১৯২৯ চনৰ ৮ এপ্ৰিলত কেন্দ্ৰীয় বিধানসভাৰ বোমা বিস্ফোৰণৰ গোচৰত তেওঁক গ্ৰেপ্তাৰ কৰা হয় আৰু ১৪ বছৰৰ যাৱজ্জীৱন কাৰাদণ্ড বিহা হয়। ১৯২৮ চনত লালা লাজপত ৰায়ৰ মৃত্যুৰ প্ৰতিশোধ হিচাপে সুখদেৱ থাপাৰ, শিৱৰাম ৰাজগুৰু আৰু ভগত সিঙে হত্যা কৰা উপ-আৰক্ষী অধীক্ষক জন চণ্ডাৰছৰ হত্যাৰ গোচৰত তেওঁক পুনৰ গ্ৰেপ্তাৰ কৰা হয়।^৮ ভগত সিং লাহোৰ কাৰাগাৰত থকাৰ সময়ত আন এজন স্বাধীনতা সংগ্ৰামী বাবা ৰণধীৰ সিংও একেখন কাৰাগাৰতে আছিল। ৰণধীৰ সিং আছিল ভগৱানক বিশ্বাস কৰা এজন ধৰ্মীয় ব্যক্তি। তেওঁ ১৯৩০ চনৰ ৪ অক্টোবৰত মৃত্যুদণ্ডৰ শাৰীত থকাসকলৰ বাবে সংৰক্ষিত কোঠাত বন্দী হৈ থকা ভগত সিঙক তেওঁ লগ পায়। ভগৎ সিং নাস্তিক বুলি গম পাই তেওঁ গভীৰভাৱে আঘাত পায়। ভগৎ সিঙক তেওঁ ঈশ্বৰৰ অস্তিত্বৰ বিষয়ে পতিয়ন নিয়াবলৈ চেষ্টা কৰিছিল যদিও বিফল হৈছিল। খং নিয়ন্ত্ৰণ কৰিব নোৱাৰি বাবা ৰণধীৰ সিঙে ভগৎ সিঙক ঠাট্টা কৰি ক'লে, "আপুনি খ্যাতিৰ বাবে মূৰ ঘমাই আছে, আপুনি অহংকাৰী; ই আপোনাৰ আৰু ঈশ্বৰৰ মাজত ক'লা পৰ্দা টানিছে।" ইয়াৰ উত্তৰত তেওঁ "Why I am an Atheist" নামৰ এটা ৰচনা-শৈলীৰ প্ৰবন্ধ লিখিছিল।^২ ভগৎ সিঙে ১৯৩০ চনৰ ৫ আৰু ৬ অক্টোবৰ তাৰিখে উক্ত প্ৰবন্ধটো লিখিছিল।^৯ ১৯৩০ চনৰ ৭ অক্টোবৰত ভগৎ সিং, সুখদেৱ আৰু ৰাজগুৰুক চণ্ডাৰছৰ হত্যাকাণ্ডৰ গোচৰত দোষী সাব্যস্ত কৰি মৃত্যুদণ্ড ঘোষণা কৰা হয় আৰু ১৯৩১ চনৰ ২৩ মাৰ্চত লাহোৰৰ কাৰাগাৰত তেওঁলোকক ফাঁচী দিয়া হয়।^১০

প্ৰকাশ

ভগত সিঙৰ মৃত্যুৰ পিছত এই প্ৰবন্ধটো ১৯৩১ চনৰ ২৭ ছেপ্টেম্বৰত লালা লাজপত ৰায়ৰ ইংৰাজী কাকত দ্য পিপলত প্ৰকাশিত হয়।^১১

তামিল সংস্কৰণ

প্ৰবন্ধটোৰ তামিল অনুবাদ ১৯৩৫ চনত "কুদি আৰাছি" আলোচনীত প্ৰকাশ পাইছিল। তাৰ পিছত মাদ্ৰাজ প্ৰাদেশিক নাস্তিক সন্থাৰ লগত জড়িত পি জীৱনন্দমে ইয়াক কিতাপৰ ৰূপত অনুবাদ কৰিছিল আৰু ই ভি ৰামাছামীৰ ৰিপাব্লিকা পাব্লিছিং হাউছে প্ৰকাশ কৰিছিল। কিন্তু এই গ্ৰন্থখনৰ ওপৰত নিষেধাজ্ঞা আৰোপ হৈছিল। শেহতীয়াকৈ এছ এ পেৰুমালে অনুবাদ কৰা আৰু পাৱৈ প্ৰকাশনে প্ৰকাশ কৰা "ভগৎ সিঙৰ চিঠি আৰু ৰচনা" খণ্ডটোৰ এটা সৰু অংশ মানুহৰ চাহিদাৰ প্ৰতি লক্ষ্য কৰি নিউ চেঞ্চুৰী বুক হাউচ লিমিটেডে প্ৰকাশ কৰিছে। বৰ্তমান যিহেতু মূল ইংৰাজী ভাষা প্ৰবন্ধটো উপলব্ধ নহয়, সেয়েহে তামিল ভাষা ভাষালৈ অনূদিত গ্ৰন্থখনেই অন্য ভাষালৈ অনুবাদৰ ভিত্তি।^১২১৩

উক্তি

• সমালোচনা আৰু স্বতন্ত্ৰ চিন্তাধাৰা দুয়োটা বিপ্লৱী এজনৰ অপৰিহাৰ্য গুণ।
• নিজকে বাস্তৱবাদী বুলি দাবী কৰা মানুহে প্ৰাচীন পৰম্পৰাগত সকলো বিশ্বাসক প্ৰত্যাহ্বান জনাব লাগিব।
• মই সুধিছো যে আপোনাৰ সৰ্বশক্তিমান ঈশ্বৰে প্ৰতিজন মানুহক পাপ বা অপৰাধ কৰি থকাৰ সময়ত কিয় বাধা নিদিয়ে? সেইটো তেওঁ অতি সহজে কৰিব পাৰিব লাগিছিল। তেওঁ কিয় যুদ্ধাধীন ৰজাসকলৰ যুদ্ধ মনোভাৱৰ অন্ত পেলোৱা নাছিল আৰু বিশ্বযুদ্ধৰ দুৰ্যোগৰ পৰা মানৱজাতিক ৰক্ষা কৰা নাছিল? ভাৰতক মুক্ত কৰাৰ মনোভাৱ তেওঁ কিয় ইংৰাজৰ মনলৈ সঞ্চাৰ কৰিব পৰা নাছিল?
• ভগৱানে বিচৰাৰ বাবে ইয়াত ইংৰাজৰ শাসন চলি থকা নাই। তেওঁলোকে আমাক শাসন কৰি আছে, কাৰণ তেওঁলোকৰ ক্ষমতা আছে আৰু তেওঁলোকৰ বিৰোধিতা কৰিবলৈ আমাৰ সাহস নাই। তেওঁলোকে ভগৱানৰ সহায়ত নহয়, বন্দুক, ৰাইফল, বোমা আৰু গুলী, আৰক্ষী আৰু সেনাৰ সহায়ত আমাক নিয়ন্ত্ৰণত ৰাখিছে। আমাৰ উদাসীনতাৰ বাবেই তেওঁলোকে সফলতাৰে সমাজৰ বিৰুদ্ধে আটাইতকৈ জঘন্য অপৰাধ সংঘটিত কৰিছে, এটা জাতিয়ে আন এটা জাতিক নিষ্ঠুৰভাবে শোষণ কৰি আছে। ভগৱান ক'ত আছে? তেওঁ মানৱজাতিৰ এই দুখ-কষ্টবোৰ উপভোগ কৰি আছে নেকি?

বাহ্যিক সংযোগ

• Why I am an Atheist (ইংৰাজী সংস্কৰণ, ৱিকিউৎস)
• நான் நாத்திகன் ஏன் (তামিল সংস্কৰণ, ৱিকিউৎস)
• ਮੈਂ ਨਾਸਤਿਕ ਕਿਉਂ ਹਾਂ (পঞ্জাবী সংস্কৰণ, ৱিকিউৎস)
• मैं नास्तिक क्यों हूँ (হিন্দী অনুবাদ)