ভূমিকা দাশ

ভূমিকা দাশ (ইংৰাজী ভাষা: Bhoomika Dash) এগৰাকী ভাৰতীয় অভিনেত্ৰী আৰু ধ্ৰুপদী ওডিছী নৃত্যশিল্পী, যিয়ে ওড়িয়া ভাষা চলচ্চিত্ৰ জগতত কৰা অভিনয়ৰ বাবে পৰিচিত।^১ তেওঁ শিশু শিল্পী হিচাপে ৰুমকু ঝুমনা নামৰ ওড়িয়া চলচ্চিত্ৰখনৰ জৰিয়তে আত্মপ্ৰকাশ কৰিছিল আৰু পৰৱৰ্তী সময়ত তু মো লাভ ষ্টৰী বোলছবিখনত মুখ্য অভিনেত্ৰী হিচাপে অভিনয় কৰিছিল।^২

প্ৰাৰম্ভিক জীৱন

২০০৩ চনৰ ২২ জানুৱাৰীত ওড়িশাৰ ভুৱনেশ্বৰত তৃপ্তি আৰু প্ৰসন্ন কুমাৰ দাশৰ ঘৰত ভূমিকাৰ জন্ম হৈছিল।^৩ তেওঁ ভুৱনেশ্বৰৰ ডিএভি পাব্লিক স্কুল (ইউনিট-৮)ৰপৰা স্কুলীয়া শিক্ষা লাভ কৰিছিল আৰু বৰ্তমান ভুৱনেশ্বৰৰ ইনষ্টিটিউট অৱ ডেণ্টাল চাইন্সেছৰপৰা বিডিএছ অধ্যয়ন কৰি আছে।^৪

কেৰিয়াৰ

শিশু শিল্পী হিচাপে

ভূমিকাই ২০১৩ চনত ওড়িয়া চলচ্চিত্ৰ ৰুমকু ঝুমনাত এগৰাকী শিশু শিল্পী হিচাপে ওড়িয়া চলচ্চিত্ৰ জগতত অভিনয় আৰম্ভ কৰিছিল।^৫৬ এই চলচ্চিত্ৰখনৰ নিৰ্দেশনা দিছিল তাপস সৰঘৰিয়াই।^৭৮ এই ছবিখনত ভূমিকাৰ সৈতে হৰিহৰ মহাপাত্ৰ, মিহিৰ দাস, হৰ পট্টনায়ক, প্ৰিয়া চৌধুৰী প্ৰমুখে অভিনয় কৰিছিল। ইয়াৰ পিছত তেওঁ তৰংগ চিনে প্ৰডাকচনৰ ছবি গপ হ’লে বি সতাত এগৰাকী শিশু শিল্পী হিচাপে অভিনয় কৰে। এই চলচ্চিত্ৰখনৰ বাবে ভূমিকাই ৫-ম তৰংগ চিনে বঁটাত শ্ৰেষ্ঠ শিশু শিল্পীৰ বঁটা লাভ কৰিছিল।^৯

অভিনেত্ৰী হিচাপে

ভূমিকা দাশে ২০১৪ চনত হৰিহৰ মহাপাত্ৰৰ সৈতে ৰুমকু ঝুমনা বোলছবিত এগৰাকী শিশু শিল্পী হিচাপে অভিনয় জীৱনৰ পাতনি মেলিছিল, যাৰ বাবে তেওঁ শ্ৰেষ্ঠ শিশু শিল্পীৰ ওড়িশা ৰাজ্যিক চলচ্চিত্ৰ বঁটা লাভ কৰিছিল।^৩ দাসে তু মো লাভ ষ্টৰী বোলছবিখনৰ জৰিয়তে ওলিউডত এগৰাকী মুখ্য অভিনেত্ৰী হিচাপে আত্মপ্ৰকাশ কৰে।^২ ২০১৫ চনত তেওঁ গপ হ’লে বি সতা বোলছবিত বৰ্ষা প্ৰিয়দৰ্শিনীৰ শৈশৱৰ চৰিত্ৰত অভিনয় কৰিছিল। তেওঁ পঢ়া-শুনাৰ লগতে ওলিউডত অভিনয় জীৱন অব্যাহত ৰাখিছিল। ইয়াৰ পিছত তেওঁ বাবুছানৰ বিপৰীতে হিৰো নং ১ বোলছবিত মুখ্য অভিনেত্ৰী হিচাপে অভিনয় কৰে। ২০১৯ চনত তেওঁ একে নামৰ কিংবদন্তি ছবিখনৰ আধুনিক ৰূপান্তৰ নায়কৰা না দেৱদাসত 'পাৰো'ৰ চৰিত্ৰত অভিনয় কৰিছিল।^১০১১