ভদ্ৰন (পৰিচালক)

ভদ্ৰন মাট্টেল হৈছে এগৰাকী ভাৰতীয় চলচ্চিত্ৰ পৰিচালক আৰু লেখক। তেওঁৰ কৰ্মৰাজিত মূলতঃ ভুলভাৱে কৰা সন্তান প্ৰতিপালনৰ বাবে সৃষ্টি হোৱা বলিদান, মানসিক আঘাত আৰু পৰিত্ৰাণ, পিতৃত্বৰ অৱমাননাৰ লগতে শৈশৱৰ যন্ত্ৰণাসমূহক ফঁহিয়াই দেখুওৱা হয়। তেওঁৰ চলচ্চিত্ৰসমূহত প্ৰায়েই জীৱ-জন্তু, চৰাই-চিৰিকটি, বাইবেলৰ প্ৰসংগ আৰু কেৰালাৰ এক বিশেষ অঞ্চলৰ স্বেচ্ছাচাৰী খ্ৰীষ্টান সংস্কৃতিৰ দৰে বিষয়সমূহক ৰূপকাত্মকভাৱে উপস্থাপন কৰা দেখা যায়।

১৯৮৬ চনত তেওঁ পুমুখপ্পদিয়িল নিন্নেয়ুম কাথু চলচ্চিত্ৰখনৰ বাবে শ্ৰেষ্ঠ মালয়ালম পৰিচালকৰ ফিল্মফেয়াৰ বঁটা লাভ কৰে। ইয়াৰ পিছত তেওঁ ক্ৰমে ১৯৯০ আৰু ১৯৯৫ চনত আয়াৰ দ্য গ্ৰেট আৰু স্পডিকম ছবিৰ বাবে শ্ৰেষ্ঠ পৰিচালকৰ শ্ৰেণীত আৰু দুটাকৈ ফিল্মফেয়াৰ বঁটা লাভ কৰিবলৈ সক্ষম হয়।

মাট্টেলৰ পৰিচালনাৰ ভিতৰত উল্লেখযোগ্য ছবিসমূহ হৈছে— গুণ্ডাগিৰিৰ আধাৰত নিৰ্মিত ছবি স্পডিকম (১৯৯৫), মানসিক ভৱিষ্যদৰ্শনৰ থ্ৰিলাৰ আয়াৰ দ্য গ্ৰেট (১৯৯০), এখন অনুসন্ধানমূলক বিদ্যালয়ৰ ড্ৰামা অলিম্পিয়ান এন্থনি এডাম (১৯৯৯), এজন অতিষ্ঠূল তত্ত্বাৱধায়কৰ পিতৃত্বৰ ওপৰত আধাৰিত চলচ্চিত্ৰ আংকল বান (১৯৯১), এক মানসিক পাৰিবাৰিক ড্ৰামা পুমুখপ্পদিয়িল নিন্নেয়ুম কাথু (১৯৮৬), সংগীতধৰ্মী ছবি ইদনাঝিয়িল ওৰু কালোচা (১৯৮৭), এজন শক্তিশালী ভূমি অত্যাচাৰীৰ চৰিত্ৰ সম্বলিত ছবি উদয়ন (২০০৫) আৰু ভাৰতীয় ৰাজনৈতিক থ্ৰিলাৰ যুৱতুৰ্কী (১৯৯৬) আদি। অভিনেতা মোহনলাল আৰু মামুটী ভদ্ৰনৰ নিয়মীয়া সহকৰ্মী হৈ পৰিছিল।^১

কেৰিয়াৰ

তেওঁ সুপ্ৰিয়া প্ৰডাকচন হাউচৰ বেনাৰত নিৰ্মিত ৰাজহংসন ছবিত হৰিহৰণৰ অষ্টম সহকাৰী পৰিচালক হিচাপে কাম কৰিছিল। ৰাজহংসন ছবিৰপৰা আৰম্ভ কৰি তেওঁ পৰিচালক হৰিহৰণক ১৪খন ছবিত এজন শিকাৰুৰপৰা সহযোগী পৰিচালক পৰ্যন্ত পদোন্নতি লাভ কৰি সহায় কৰিছিল।

তেওঁ পৰিচালনা কৰা প্ৰথমখন চলচ্চিত্ৰ ১৯৮২ চনত মুক্তি পাইছিল। শংকৰ, মোহনলাল, মেনকা আৰু কলা ৰঞ্জিনী অভিনীত এই ছবিখনৰ নাম আছিল এণ্টে মোহংগল পুৱানিঞ্জু। ভদ্ৰনৰ চলচ্চিত্ৰসমূহে অতিবাস্তৱবাদৰ সৈতে সংমিশ্ৰিত সাধাৰণ মানুহৰ জীৱনৰপৰা অনুপ্ৰেৰণা লাভ কৰিছিল। ১৯৮৩ চনত তেওঁ মামুটী, মোহনলাল আৰু মাধৱী অভিনীত চংগাথম (মালয়ালম) মুক্তি দিয়ে। সেই সময়ত ভদ্ৰনে বছৰত ২-৩ খনকৈ ছবি নিৰ্মাণ কৰাত গুৰুত্ব দিছিল।^২

১৯৮৭ চনত মুক্তি পোৱা ইদনাঝিয়িল ওৰু কালোচা চলচ্চিত্ৰখনে এগৰাকী বয়স্ক মহিলাৰ প্ৰতি এজন কিশোৰৰ মনত গঢ়ি উঠা প্ৰেমৰ ভাবনাক ফঁহিয়াই দেখুৱাইছে। এই ছবিত বিনীথে কিশোৰ চৰিত্ৰটোত আৰু কাৰ্তিকাই সেই বয়স্ক মহিলাগৰাকীৰ চৰিত্ৰত অভিনয় কৰিছিল যিগৰাকী তেওঁৰ আকৰ্ষণৰ কেন্দ্ৰবিন্দু হৈ পৰে।

১৯৯০ চনত মুক্তিপ্ৰাপ্ত আয়াৰ দ্য গ্ৰেট আছিল ভদ্ৰনৰদ্বাৰা পৰিচালিত এখন মানসিক থ্ৰিলাৰ চলচ্চিত্ৰ, য'ত মামুটীয়ে মুখ্য চৰিত্ৰত অভিনয় কৰিছিল আৰু ইয়াত পেৰুমনৰ ৰেল দুৰ্ঘটনাৰ প্ৰসংগ উত্থাপন কৰা হৈছিল।

১৯৯৫ চনত মুক্তি পোৱা স্পডিকম আছিল ভদ্ৰনৰদ্বাৰা ৰচিত আৰু পৰিচালিত এখন একচন-ড্ৰামা চলচ্চিত্ৰ। এই প্ৰিজমে বগা পোহৰক সাতটা স্পষ্ট ৰঙৰ বৰ্ণালীত বিভক্ত কৰে। ছবিখনৰ এই শীৰ্ষকটোৱে প্ৰতিফলিত কৰে যে কেনেকৈ মানুহে নিজৰ ব্যক্তিগত লাভৰ বাবে পৰিস্থিতিক ধাৰাবাহিকভাৱে নিজৰ অনুকূলে ব্যৱহাৰ কৰে।^৩ এই চলচ্চিত্ৰখন ১৯৯৫ চনত কেৰালাৰ সৰ্বাধিক উপাৰ্জনকাৰী ছবিসমূহৰ ভিতৰত অন্যতম আছিল আৰু ই প্ৰায় ৮ কোটি টকা সংগ্ৰহ কৰিছিল। ই ১৯৯৫ চনৰ আটাইতকৈ দীৰ্ঘদিন ধৰি চলা ছবিও আছিল, যিখনে শ্ৰেষ্ঠ অভিনেতাৰ কেৰালা ৰাজ্যিক চলচ্চিত্ৰ বঁটা আৰু শ্ৰেষ্ঠ অভিনেতাৰ ফিল্মফেয়াৰ বঁটা লাভ কৰিবলৈ সক্ষম হৈছিল। স্পডিকম আছিল ভদ্ৰনৰ আটাইতকৈ সফল ব্যাৱসায়িক ছবি, যিখনে কেৰালাৰ চলচ্চিত্ৰ সংস্কৃতিত এক সুকীয়া স্থান লাভ কৰিছে।

২০১৯ চনত ভদ্ৰনে ঘোষণা কৰে যে তেওঁৰ পৰৱৰ্তী ছবিখন মোহনলালৰ সৈতে হ'ব, যাৰ নাম হ'ব জুথান। ই তেওঁলোকৰ পুনৰ একত্ৰিত হোৱাক চিহ্নিত কৰিব।^৪ লগতে ২০১৯ চনতে যেতিয়া চলচ্চিত্ৰ পৰিচালক বিজু জে কাটাক্কলে ঘোষণা কৰিছিল যে তেওঁ স্পডিকম ছবিৰ ছিকুৱেল নিৰ্মাণ কৰিব, তেতিয়া ভদ্ৰনে ইয়াৰ তীব্ৰ বিৰোধিতা কৰিছিল আৰু সেই প্ৰকল্পটো বন্ধ কৰিবলগীয়া হৈছিল।^৫

চলচ্চিত্ৰপঞ্জী

পৰিচালক হিচাপে