বেলা হাদিদ

ইজাবেলা খাইৰ হাদিদ (ইংৰাজী ভাষা: Bella Hadid; জন্ম ৯ অক্টোবৰ, ১৯৯৬) এগৰাকী আমেৰিকান মডেল।^১ হাদিদে আন্তঃৰাষ্ট্ৰীয় Vogue আলোচনীৰ মুঠ ৩৫টা কভাৰত উপস্থিত হৈছে।^২ ২০২২ চনত তেওঁক ব্ৰিটিছ ফেশ্বন কাউন্সিলৰদ্বাৰা ‘‘মডেল অৱ দ্য য়েৰ’’ হিচাপে মনোনীত কৰা হয়।^৩ ২০২৩ চনত Time আলোচনীয়ে তেওঁক তাৰ বাৰ্ষিক তালিকাত অন্তৰ্ভুক্ত কৰি বিশ্বৰ ১০০ গৰাকী আটাইতকৈ প্ৰভাৱশালী ব্যক্তিৰ ভিতৰত এজন হিচাপে স্বীকৃতি দিয়ে।^৪

হাদিদে ১৬ বছৰ বয়সত মডেলিং জীৱন আৰম্ভ কৰে। ২০১৪ চনৰ আগষ্ট মাহত তেওঁ IMG Models-ৰ সৈতে চুক্তিবদ্ধ হয় আৰু তাৰ পৰৱৰ্তী মাহতে নিউয়ৰ্ক মহানগৰ ফেশ্বন উইকত প্ৰথমবাৰৰ বাবে অংশগ্ৰহণ কৰে।^৫ ২০১৬ চনত Models.com-ৰ উদ্যোগী পেছাদাৰীসকলৰ ভোটত তেওঁ ‘‘মডেল অৱ দ্য য়েৰ’’ হিচাপে নিৰ্বাচিত হয়।^৬ ২০১৭ চনত, একে বছৰত পাঁচখন আন্তঃৰাষ্ট্ৰীয় Vogue ছেপ্টেম্বৰ সংখ্যাত উপস্থিত হৈ তেওঁ ডাউজেন ক্ৰ'ছৰ এক অভিলেখ ভংগ কৰে।^৭, হাদিদ বিশ্বৰ আটাইতকৈ অধিক উপাৰ্জন কৰা মডেলসকলৰ ভিতৰত অন্যতম আছিল আৰু তেওঁ প্ৰায় ১৯ মিলিয়ন আমেৰিকান ডলাৰ উপাৰ্জন কৰিছিল।^৮

জীৱনৰ আৰম্ভণি

হাদিদৰ জন্ম ৯ অক্টোবৰ, ১৯৯৬ তাৰিখে আমেৰিকা যুক্তৰাষ্ট্ৰৰ ৱাশ্বিংটন, ডি. চি.ত হয় আৰু তেওঁ দক্ষিণ কেলিফৰ্ণিয়াত ডাঙৰ-দীঘল হয়।^৯১০১

তেওঁৰ পিতৃ মোহাম্মদ হাদিদ এজন পেলেষ্টিনীয়-আমেৰিকান ৰিয়েল এষ্টেট ডেভেলপাৰ আৰু মাতৃ য়োলান্দা হাদিদ (জন্মনাম ভান ডেন হেৰিক) এগৰাকী নেদাৰলেণ্ডছৰ প্ৰাক্তন মডেল।^{১১১২১৩}

পিতৃৰ জৰিয়তে হাদিদে অষ্টাদশ শতিকাৰ মাজভাগত উত্তৰ পেলেষ্টিনৰ শাসক দাহিৰ আল-উমৰৰ বংশধৰ হোৱাৰ দাবী কৰে।^১৪১৫

তেওঁৰ এগৰাকী ডাঙৰ ভগ্নী জিজি হাদিদ আৰু এগৰাকী সৰু ভাতৃ আছে, দুয়োজনে মডেল।^১৬ ইয়াৰ উপৰি তেওঁৰ পিতৃৰফালৰপৰা দুগৰাকী ডাঙৰ অৰ্ধ-ভগ্নী আছে।^১৭

২০২৫ চনৰ মে’ মাহত, হাদিদ আৰু তেওঁৰ ভগ্নী জিজিয়ে এক যৌথ বিবৃতিত ঘোষণা কৰে যে পিতৃৰ জৰিয়তে তেওঁলোকৰ এগৰাকী সৰু অৰ্ধ-ভগ্নী আছে, যাৰ নাম আইদান নিক্স। তেওঁলোকে ২০২৩ চনৰ শেষভাগত নিক্সৰ সৈতে যোগাযোগ স্থাপন কৰা বুলি জানিবলৈ দিয়ে। নিক্সৰ মাতৃ টেৰী হেটফিল্ড ডাল আৰু মোহাম্মদ হাদিদৰ মাজত হোৱা স্বল্পকালীন সম্পৰ্কৰ ফলস্বৰূপে নিক্সৰ জন্ম হৈছিল, যি সম্পৰ্ক য়োলান্দাৰ সৈতে বিবাহ বিচ্ছেদৰ পিছত হৈছিল।^১৮

হাদিদ আৰু তেওঁৰ সহোদৰসকল চাণ্টা বাৰবাৰাত থকা এখন ৰেঞ্চত ডাঙৰ হয়।^১৯ প্ৰায় দহ বছৰ পাছত পৰিয়ালটো বেভাৰ্লী হিল্‌ছলৈ স্থানান্তৰিত হয়।^২০ ২০২৫ চনৰ জানুৱাৰী মাহত দক্ষিণ কেলিফৰ্ণিয়াৰ বনজুইৰ ফলত হাদিদৰ শৈশৱৰ বাসগৃহ ধ্বংস হয়।^২১

কৈশোৰাৱস্থাত হাদিদ এগৰাকী অশ্বাৰোহী আছিল আৰু ২০১৬ গ্ৰীষ্মকালীন অলিম্পিকত প্ৰতিযোগিতা কৰাৰ সপোন দেখিছিল।^২২ যদিও তেওঁ ইকুইটেচন শাখাত অংশগ্ৰহণ কৰিছিল, যি অলিম্পিক শাখা নহয়।^২৩২৪

২০১২ চনত হাদিদ, তেওঁৰ মাতৃ আৰু ভাতৃৰ সৈতে একেলগে দীৰ্ঘমেয়াদী লাইম ৰোগ নিৰ্ণয় কৰা হয়।^২৫ উচ্চ বিদ্যালয়ত পঢ়ি থকা সময়ত হাদিদে মনোযোগ সংক্ৰান্ত সমস্যাৰ সন্মুখীন হয় আৰু তেওঁক ADHD ৰোগ ধৰা পৰে। তেওঁক Adderall ঔষধ প্ৰদান কৰা হৈছিল, কিন্তু তাৰ ফলস্বৰূপে তেওঁ এনোৰেক্সিয়া ৰোগত ভুগিবলৈ আৰম্ভ কৰে।^২

২০১৪ চনত মালিবু হাইস্কুলৰপৰা স্নাতক হোৱাৰ পিছত হাদিদে নিউয়ৰ্ক চহৰলৈ গৈ পাৰ্ছনছ স্কুল অৱ ডিজাইনত ফটোগ্ৰাফীৰ অধ্যয়ন আৰম্ভ কৰে। পিছলৈ গৈ তেওঁ মডেলিং জীৱনত মনোনিৱেশ কৰাৰ বাবে পঢ়া স্থগিত ৰাখে, যদিও ভৱিষ্যতে মডেলিং শেষ কৰাৰ পাছত পুনৰ শিক্ষালয়লৈ উভতি গৈ ফেশ্বন ফটোগ্ৰাফী ক্ষেত্ৰত আগবঢ়াৰ আগ্ৰহ প্ৰকাশ কৰিছে।^২৬