বেলা পোৱাৰ্চ

ডেনৰী বাটিষ্টা টেলৰ^১ (জন্ম: বেলিন্ডা মেৰী মাকাডেংডেং বাতুম্বাকল; ৯ ফেব্ৰুৱাৰী, ১৯৯৭^২), পেছাদাৰীভাৱে বেলা পোৱাৰ্চ (ইংৰাজী ভাষা: Bella Poarch; জন্ম: ১৯৯৭) নামেৰে জনাজাত এগৰাকী আমেৰিকা যুক্তৰাষ্ট্ৰন চচিয়েল মিডিয়া ব্যক্তিত্ব আৰু গায়িকা। ২০২০ চনৰ আগষ্ট মাহত টিকটক প্লেটফৰ্মত আটাইতকৈ বেছি লাইক পোৱা এটা ভিডিঅ' সৃষ্টি কৰি তেওঁ জনপ্ৰিয়তা লাভ কৰে, য'ত তেওঁ মিলি বি-ৰ "এম টু দ্য বি" গীতটোত ওঁঠ মিলাইছিল। তেওঁ এই প্লেটফৰ্মত চতুৰ্থ সৰ্বাধিক ফ'ল'ৱাৰ থকা ব্যক্তি আৰু ফিলিপাইনৰ সৰ্বাধিক ফ'ল'ৱাৰ থকা ব্যক্তি।^৩৪৫৬

প্ৰাৰম্ভিক জীৱন আৰু সামৰিক কেৰিয়াৰ

পোৱাৰ্চে ১৯৯৭ চনৰ ৯ ফেব্ৰুৱাৰীত^৭ ফিলিপাইনত জন্মগ্ৰহণ কৰিছিল। তেওঁৰ জন্মৰ নাম আছিল বেলিন্ডা মেৰী মাকাডেংডেং বাতুম্বাকল। তিনি বছৰ বয়সলৈকে তেওঁক আইতাকে বস্তি এলেকাত ডাঙৰ-দীঘল কৰিছিল আৰু তাৰ পিছত তেওঁক তোলনীয়া হিচাপে গ্ৰহণ কৰা হৈছিল।^৮ তেওঁৰ তোলনীয়া পিতৃ এজন আমেৰিকান যিয়ে আমেৰিকা যুক্তৰাষ্ট্ৰৰ সামৰিক বাহিনীত সেৱা আগবঢ়াইছিল আৰু তোলনীয়া মাতৃ এগৰাকী ফিলিপিনো।

এটা সাক্ষাৎকাৰত পোৱাৰ্চে উল্লেখ কৰিছে যে তেওঁ আৰু তেওঁৰ তোলনীয়া ভাতৃ গোটেই শৈশৱকালত সামৰিক বাহিনীত ভৰ্তি হোৱালৈকে তীব্ৰ শাৰীৰিক আৰু আৱেগিক নিৰ্যাতনৰ বলি হৈছিল। তেওঁ তেওঁৰ তোলনীয়া পিতৃ-মাতৃ আৰু তিনিগৰাকী তোলনীয়া ভাই-ভনীৰ সৈতে এখন ফাৰ্মত বাস কৰিছিল। মাত্ৰ সাত বছৰ বয়সৰ পৰাই ফাৰ্মখনত তেওঁৰ বহুত দায়িত্ব আছিল। পোৱাৰ্চৰ পিতৃ আছিল মৌখিক আৰু শাৰীৰিকভাৱে নিৰ্যাতনকাৰী, আনহাতে তেওঁৰ মাতৃয়ে ইয়াত হস্তক্ষেপ কৰা নাছিল যদিও সকলো জানি-বুজি মৌন আছিল।

১৩ বছৰ বয়সত পোৱাৰ্চ আৰু তেওঁৰ পৰিয়াল ছান ফ্ৰান্সিস্কোলৈ যায়। ইয়াৰ পিছত পিতৃৰ বাইপাছ চাৰ্জাৰীৰ বাবে তেওঁলোক টেক্সাছলৈ স্থানান্তৰিত হয়।^৯ পোৱাৰ্চ আমেৰিকা যুক্তৰাষ্ট্ৰৰ নৌসেনাৰ এজন প্ৰাক্তন সৈনিক।^১০ তেওঁ ২০১৭ চনত এভিয়েশ্যন অৰ্ডিনেন্সমেন হিচাপে নৌসেনাত নামভৰ্তি কৰিছিল।^১১১২ তেওঁ জাপান আৰু হাৱাইত তিনি বছৰ ধৰি সেৱা আগবঢ়াইছিল।^১৩

সংগীত জীৱন

২০২০ চনৰ জানুৱাৰী মাহত পোৱাৰ্চে তেওঁৰ টিকটক একাউণ্টটো খোলে। ২০২০ চনৰ এপ্ৰিল মাহৰ পৰা তেওঁ গেমিং আৰু কচপ্লে’ সমলৰ ওপৰত ভিত্তি কৰি টিকটকত সক্ৰিয়ভাৱে ভিডিঅ’ প'ষ্ট কৰিবলৈ আৰম্ভ কৰে। ২০২০ চনৰ আগষ্ট মাহত তেওঁ বিশেষ চৰ্চালৈ আহে, যেতিয়া তেওঁৰ লিপ চিংকিং (ওঁঠ মিলোৱা) ভিডিঅ’সমূহ ভাইৰেল হৈ পৰে। বিশেষকৈ মিলি বি-ৰ "এম টু দ্য বি" গীতটোৰ সৈতে কৰা ভিডিঅ’টোৱে সৰ্বাধিক জনপ্ৰিয়তা লাভ কৰে। গীতটোৰ তালে তালে ছন্দময়ভাৱে মূৰ জোকাৰি কৰা তেওঁৰ জুম-ইন ভিডিঅ’টো ইমানেই ভাইৰেল হৈছিল যে ই টিকটকৰ সৰ্বকালৰ আটাইতকৈ বেছি লাইক পোৱা ভিডিঅ’ হিচাপে পৰিগণিত হয়। টিকটকৰ এই সফলতাৰ পিছত তেওঁ এটা ইউটিউব চেনেল আৰু এটা টুইটাৰ পেজ মুকলি কৰে।

পোৱাৰ্চ তেওঁৰ আলপাকা নামৰ খেলনা পুতলাটোৰ বাবেও পৰিচিত।^১৪১৫ ২০২০ চনত তেওঁ 'আৰআইপিএনডিপি এক্স পাকা ক'লাব'ৰেচন' নামৰ এক সীমিত কাপোৰৰ সংগ্ৰহ মুকলি কৰে।^১৬

২০২০ চনৰ ডিচেম্বৰ মাহত পোৱাৰ্চৰ বৰ্ধিত জনপ্ৰিয়তাই শীৰ্ষবিন্দু স্পৰ্শ কৰে যেতিয়া খবৰ ওলায় যে দুটা বৃহৎ পেছাদাৰী ই-স্পৰ্টচ সংস্থা — ১০০ থিভছ আৰু ফেজ ক্লেনে তেওঁৰ প্ৰতি আগ্ৰহ প্ৰকাশ কৰিছে। সেই সময়ত লাইভ ষ্ট্ৰীমাৰ আৰু গেমৰ হিচাপে থকা পোৱাৰ্চক তেওঁলোকে নিজৰ বেনাৰত সমল স্ৰষ্টা হিচাপে ল’ব বিচাৰিছিল।^১৭

২০২১ চনৰ মে' মাহত পোৱাৰ্চে ৱাৰ্নাৰ ৰেকৰ্ডছৰ সৈতে এটা ৰেকৰ্ডিং চুক্তিত স্বাক্ষৰ কৰে। ১৪ মে'ত পোৱাৰ্চে তেওঁৰ প্ৰথমটো একক গীত "বিল্ড এ বিটচ" মুক্তি দিয়ে।^১৮ তেওঁ জনাইছিল যে এই গীতটো তেওঁৰ শৈশৱত নিৰ্যাতিত হোৱা অভিজ্ঞতাৰ দ্বাৰা অনুপ্ৰাণিত।^১৯ তেওঁ প্ৰকাশ কৰিছিল যে, "ডাঙৰ হৈ আহোঁতে মই নিৰ্যাতনৰ সন্মুখীন হৈছিলোঁ... মই বিচাৰিছিলোঁ মোৰ প্ৰথম গীতটোৰ অৰ্থ ভাল হওক আৰু ই বহুত মানুহক নিজৰ প্ৰতি অধিক আত্মবিশ্বাসী হ’বলৈ সহায় কৰক।" গীতটোৰ সৈতে সংলগ্ন সংগীত ভিডিঅ’টোক বিলবোৰ্ডে "আধুনিক পপৰ এক দুঃসাহসী আৰু কৃষ্ণ হাস্যৰসপূৰ্ণ অংশ" বুলি অভিহিত কৰিছিল। এই ভিডিঅ'টো চাব আৰবান হিচাপে পৰিচিত প্ৰযোজক-গীতিকাৰ ডেনিয়েল ভাৰ্জিল মাইচনয়ুভৰ সহযোগত নিৰ্মাণ কৰা হৈছিল। ভিডিঅ’টোত ভালকিৰে, মিয়া খলিফা, ব্ৰেটমেন ৰক আৰু জেদএইচচি-ৰ দৰে বহুকেইগৰাকী বিশিষ্ট ইণ্টাৰনেট ব্যক্তিত্বক দেখা গৈছিল।^২০

১০০ থিভছৰ পডকষ্ট 'দ্য কাৰেজ এণ্ড নাদেশ্বট শ্ব''-ৰ এটা খণ্ডত^২১ পোৱাৰ্চে কৈছিল যে তেওঁ সৰুৰে পৰাই এগৰাকী গায়িকা হ’ব বিচাৰিছিল।^২২

২০২২ চনৰ ১২ আগষ্টত পোৱাৰ্চে তেওঁৰ প্ৰথমখন ই পি (বৰ্ধিত প্লে’) ডলছ মুক্তি দিয়ে। ইয়াত তেওঁৰ পূৰ্বৰ একক গীতসমূহ— "বিল্ড এ বিটচ", "ইনফাৰ্নো" আৰু "ডলছ"-ৰ লগতে নতুন ট্ৰেক "ভিলেন", "নো মেনছ লেণ্ড" আৰু "লিভিং হেল" অন্তৰ্ভুক্ত কৰা হৈছে। ই পি-খনৰ সৈতে একেলগে "লিভিং হেল"-ৰ এটা সংগীত ভিডিঅ’ মুক্তি পায়। "ডলছ"-ৰ সংগীত ভিডিঅ’টোত অভিনয় কৰাৰ উপৰিও গ্ৰাইমছে "নো মেনছ লেণ্ড" গীতটোত কণ্ঠদান কৰিছে।^২৩ ৰোলিং ষ্টোনে ই পি-খনৰ ডাৰ্ক পপ সুৰৰ প্ৰশংসা কৰিছিল।^২৪ ইয়াৰ উপৰিও ২০২২ চনত ডব্লিউডব্লিউই-ৰ 'এক্সট্ৰিম ৰুলছ' ইভেণ্টৰ বাবে "ভিলেন" গীতটো ব্যৱহাৰ কৰা হৈছিল। ২০২৩ চনৰ ১৫ ছেপ্টেম্বৰত তেওঁ লাউভৰ সৈতে "ক্ৰাছ" নামৰ এটা গীত আৰু সংগীত ভিডিঅ’ মুক্তি দিয়ে।^২৫

ব্যক্তিগত জীৱন

পোৱাৰ্চ লছ এঞ্জেলছত বাস কৰে।^২৬ তেওঁ এগৰাকী কচপ্লেয়াৰ।^২৭২৮

ক'ভিড-১৯ মহামাৰীৰ সময়ত এছিয়ীয় মূলৰ লোকসকলৰ বিৰুদ্ধে বৃদ্ধি পোৱা ঘৃণাৰ বিৰুদ্ধে তেওঁ চচিয়েল মিডিয়াৰ জৰিয়তে এছিয়ান-আমেৰিকান সম্প্ৰদায়ৰ প্ৰতি সমৰ্থন আগবঢ়াইছে।^২৯ তেওঁ 'ভৌগ' আলোচনীৰ সৈতে হোৱা কথা-বতৰাত নিজৰ অভিজ্ঞতা ভাগ কৰি কৈছিল যে ফিলিপাইনৰ পৰা আমেৰিকা যুক্তৰাষ্ট্ৰলৈ অহাৰ পিছত এগৰাকী এছিয়ীয় কিশোৰী হিচাপে তেওঁ "ভিন্ন ব্যৱহাৰ" আৰু "হঠাতে আক্ৰমণ"ৰ বলি হৈছিল।^৩০

২০২০ চনৰ ছেপ্টেম্বৰ মাহত কোৰীয় চচিয়েল মিডিয়া ব্যৱহাৰকাৰীসকলে পোৱাৰ্চক তেওঁৰ এটা ভিডিঅ'ত 'ৰাইজিং ছান ফ্লেগ'ৰ দৰে এক টাটু থকাৰ বাবে সমালোচনা কৰিছিল। টাটুটোৱে জাপানী সাম্ৰাজ্যবাদৰ এক প্ৰতীকক বুজাইছিল যিটো পূব এছিয়াৰ লোকসকলৰ বাবে অপমানজনক বুলি গণ্য কৰা হয়। ইয়াৰ বাবে তেওঁ ক্ষমা বিচাৰে আৰু ইয়াক ঢাকি দিয়ে, পৰৱৰ্তী সময়ত টাটুটো সম্পূৰ্ণৰূপে আঁতৰাই পেলায়।^৩১৩২

২০১৯ চনত তেওঁ টাইলাৰ পোৱাৰ্চৰ সৈতে বিবাহপাশত আৱদ্ধ হৈছিল। ২০২২ চনৰ নৱেম্বৰত তেওঁ বিবাহ বিচ্ছেদৰ বাবে আৱেদন কৰে।^৩৩ ২০২৩ চনৰ অক্টোবৰ মাহত তেওঁলোকৰ বিবাহ বিচ্ছেদ চূড়ান্ত হয়।^৩৪

২০২১ চনৰ আগষ্ট মাহত তেওঁ প্ৰকাশ কৰিছিল যে তেওঁ যৌন নিৰ্যাতনৰ বলি হৈছিল।^৩৫৩৬